ترەمپ سزاکاو سەرو سوریای هۊرگێرۆ
دۆناڵد ترەمپ، سەرۆکو ئەمریکای قەرارێوەش ئیمزاکەرڎ کە بە شێوێوە ڕسمی سزاکاو ئەمریکای سەرو سوریایۆ لا مڎۆ.
دۆناڵد ترەمپ، سەرۆکو ئەمریکای، ڕۆو دووەشەممەی، قەرارێوەش ئیمزا کەرڎ کە بە شێوێوە ڕسمی دمایی بە فرەو سزا ئابوورییەکا سەرو سوریای مارۆنە.
ئی قەرارە سەرو ئا قەولا بیەن کە جە گلېرۊبیەو قولەپۆپەو ڕیازینە بە ئەحمەد شەرعی سەرۆکو کاتی سوریای دریان.
کارۆلین لیویتە واتەواچەو کۆشکۊو چەرمې ئەرەیاۋناش، قەرارەکە پەی هاندای و پاڵپەشتیکەردەی وڵاتەکەین پەی سەقامگیری و ئاشتی دریان.
براد ئێسمیت، ڕاوەبەرو هەواڵگری دارایی و تیرۆرو وەزارەتو دارایی ئەمریکای ئەرەیاۋناش، ئامانجو ئی هەنگامې دمایئاردەین بە ئەرەبڕیەی دارایی مېیاننەتەوەیی سوریای و کەردەیۆ بەرەو بازرگانی جەهانی و هەرپاسە دەسپنەکەردەیۆ پەیوەندییەکا سوریاین چنی هامسایەکاش جە ناوچەکە و ئەمریکانە.
ترەمپ جە ١٣و ئایارینە، جە میانو گەشتێوەشەنە پەی ڕیازی ئەرەیاۋناش کە ئەمریکا سزاکا هۊرگێرۆ و واتەبێش، گەرەکشا دەرفەتێوە تاریخی بە حکومەتی تازەو دیمەشقی بڎۆ. دماو مانگێوە چنی ئەحمەد شەرعی سەرۆککۆمارو کاتی سوریای گلېرۊبیەیش کەرڎ.
چا کاتۆ واشنتۆن پەی ئاسانکاری گێڵایۆ سوریای پەی سیستەمو دارایی جەهانی فرەو سزاکاو سەرو سوریایش هۊرشێونێوە و پەی هاندای ڕێککۊتەی تازەی پەی ئایندەو سوریای ئەمرەو ڕاپنەدایش بەرکەرڎ.
