جاک لیلیۆ ژیۋای کورداو دلۍ کامپوو لاڤریۆی کە حکومەتوو یۆنانی جە ئاکاموو فشارەکا دەوڵەتوو تورکینە وستشەرە، بە ۋێنۍ نمایشش کەردەن و چا بارۆ ماچۆ: "بە کولتور و زۋانوو ۋێشا کوردسانۍ گولانەشا وەشکەردەن".
جاک لیلیۆ ۋێنەگیری فەرەنسی بە پەشتیوانی کۆلێکتیڤوو کۆنڤۆی سۆلیداری جە شاروو لاڤریۆی یۆنانینە جە بارەو ژیۋای کوردا پەنابەریۆ جە کەمپوو ئا شارەینە نمایشگێوە ۋێناش کەردۆ.
کەمپوو لاڤریۆی ساڵەو ٢٠٢٣ جە ئاکاموو فشارەکا دەوڵەتوو تورکی جە تەرەفوو حکومەتوو یۆنانیۆ وزیارە. جە بەینوو ٢٠١٦ پۍ ٢٠٢٣ بە هەزاران ۋێنۍ جە کەمپەکەنە چرکیێنۍ. ۋێنەکۍ جە کتێبخانەو مێتیۆریتی جە ئەسینانە نمایشکریۍ.
پێشوازیێوە گەرم جە نمایشگاکەی کریا.
'کوردسانۍ گوولانە وەشکەرا'
جاک لیلیۆی فەرەنسی ژیۋای کورداو کەمپەکەیش بە هەزاران یاڎەوەریێوە تۆمار کەردەن و جە نویسیایێنە سەبارەڎ بە نمایشگاکەی ئاماژەش پانەی کەردەن، "کەس گەرەکش نیا جە یانەی و گەلەکەیش بڕیۆرە. رۆشنا جارێوە بە ئێمەش وات کە درەخت بە بێ ڕێخە مەتاوۆ بژیۋۆ. مرۆڤەکۍ سەرەڕاو ئێسی و مەینەتیەکاشا بە یۊگێرتەی و پێوەرە مژیوا. بە کولتور و زۋانوو ۋێشا زارۆڵێشا گۆرۍ کەردۍ و کوردسانۍ گولانەشا وەشکەرد. پەڕێنۍ جە هیوای، خواو هۆرپڕای کەرا. وەرم بە ڕۆو سەرکۊتەیۆ موینا و گەرەکشانە گێڵاوە پۍ ماواو ۋێشا".
'دەوڵەت مرۆڤەکا ۋەروو دەم و مەردەینە جیامازۆ'
سیاسەڎمەداروو کوردی حسێن ئەبەم بە نوێنەرایەتی ناوەنڎوو گلێرگەو دیموکراتیکی کوردی جە ئەسینا بەشداریش جە نمایشگاکەینە کەرد و سوپاسوو جاک لیلیۆیش کەرد بەمەڵامەتوو هەرمانەکاشۆ.
ئەبەم ئاماژەش پانەی کەرد کە کەمپوو لاڤریۆی خاوەن مەعنێوە تاریخیا و واتش، کەمپەکە جە تەرەفوو دەوڵەتوو تورکیوە کریان ئامانج.
ئەبەم پی جۆرە واتش: "داخەم مەشۆ ساڵەو ٢٠٢٣ کەمپەکە چۆڵکریا و مرۆڤەکێما بە تەنیا مەنۍ. دەوڵەت بۊنەو سیاسەتە چەپەڵەکاشۆ مرۆڤەکا ۋەروودەموو مەردەینە جیامازۆ".
