ئەندامەو کۆمیتەو پەیوەندییەکاو بەری و دیپلۆماسیی کۆنگرەو ستاری، ڕووکەن ئەحمەدە، واتش، تا شۆڕشوو ژەنا وەرنیشتنە نەیاونمێ بە ژەناو وەرکەوتوو دلێڕاسەی و ئەفریقای،مەتاومێ شۆرشوو ژەنان جیهانی کەرمێوە.
ئەندامەو کۆمیتەو پەیوەندییەکاو بەری و دیپلۆماسییی کۆنگرەو ستاری، ڕووکەن ئەحمەدە، واتش: "ژەنی ئازادیوازێ مەیا و شۆڕشەکەیما وینا و ڕووبەڕوو ئا ڕاسییەی بۆوە، کە ژەنی پێویسییشا بە بنیاتنیای دیای و ڕێکوستەی وێشا بۆ."
ڕووکەن ئەحمەدە ئەندامەو لوجنەو پەیوەندییەکاو بەری و دیپلۆماسیی کۆنگرەو ستاری چەنی ئاژانسوو هەواڵوو فوراتی واتش.
کۆمیتەو دیپلۆماسی ساڵەو ٢٠١٣ ئەرەمەرزیان و ئەرەیاوناش: "قۆناغە سەرەتاییەکانە گردوو شار، مەنتێقە و کانتۆنەکانە کۆمیتەی دیپلۆماسی ئەرەمەرزیا. جە دووە-یەرە ساڵی ویەردەنە بڕێو فاڕیایێ جە شێوازوو هەرمانێ و ڕێکوستەینە کریێ. هەرمانەکێما بە ٦ بەشێ کریۆ، ڕێکوستەی، چالاکییەکێ و پەیوەندییەکاو دلێ بەرەو وەڵێ بەرۆ، سوریانە و وەرکەوتوو دلێراسەینە و جیهاننە. کۆنگرەو ستاری نوێنەرایەتییش جە لوبنان، ئەورووپای و پانیشتوو کوردستانینە هەن. ئێمە گەرەکمانە جە بڕێ دەوڵەتە عەرەبییانە نوێنەرایەتیی وەش کەرمێ، بەڵام ئاستوو برۆکراتیکینە قۆرتێ فرێنی. بەڵام ئاما ولوایەکێ بەردەوامێنێ."
ڕووکەن ئەحمەدە ئاماژەش کەرد، کە کۆشیای ژەناو کوردی جە کەسایەتیی سەکینە جانسزێ و فرەو ژەنە سەرمەشقەکانە هەرمانێ فرە بەنرخێش کەردێنێ و واتش: "چی ڕووەوە نمەتاومێ بواچمێ کە ئی کۆشیایە ئێمەوە دەسش پەنە کەردەن، بەڵام پی کۆشیایە و شۆڕشوو وەرنیشتی، ئا کۆشیایە کە لاو ژەنە گەشمەرداوە پێسە ئارین میرکانێوە کریان، بەرێ دیپلۆماسیێ فرێش ڕووەو مەنتێقەکەیرە کەردێنێوە. شۆڕشوو وەرنیشتینە ژەنی گردوو لایەنەکاو ژیواینە بەشدارێنێ، ئینەیچ کاریگەریێوە گەورەش سەروو گردوو جیهانیوە وەش کەردەن. بییەن بایسوو ئانەیە فرە جە ئینتەرناسیۆنالیستەکا بەیا دلێ ئی شۆڕشیوە. چندین فیلمێ، بەڵگەنامێ و کتێبێ سەروو ئی شۆڕشەیە وەشێ کریێنێ."
ڕووکەن ئەحمەدە واتش: "ئێمە ڕاو نوێنەرایەتییەکاماوە بەشداریی جە ئەندامێتیی بڕێ جە کۆنفرانسە جیهانییەکا کەرمێ. هەرپاسە ڕاستەوخۆ بەشداریی جە بڕێ پەیوەندییانە کەرمێ. دماو جەنگوو سەرێکانیوە، ٢٥ کۆمیتێ ژەنا ١٢ وەڵاتە جیاوازاوە گرد بوارێوەنە بە نامێ پارێزنای 'ژەناو وەرنیشتی'یوە پەشتیوانیی وەرنیشتی کەرا. دلێ کۆمیتەکەینە شناسنامە و نەتەوێ جیاوازێ هەنێ. جە کۆنفرانسەکانە چالاکیی هامبەشێچما هەنێ، ڕووەکا پێسەو ٨ مارسی و ٢٥ تشرینوو دووەمینە چالاکییەکاما پێوە کەرمێ."
ڕووکەن ئەحمەدە واتش، تا شۆڕشوو ژەنا وەرنیشتنە نەیاوۆ وەرکەوتوو دلێراسەی و ئەفریقا، نمەتاومێ جیهانییش کەرمێوە و واتش: "وەختێ ژەنی ئازادێ مەیا و شۆڕشەکەیما وینا، ڕووبەڕووێ ئا ڕاسییە باوە، کە ژەنی خەریکێ بنیاتنیای دیای وێشا و ڕێکوستەیشانێ.
ئاخروو ساڵەو ٢٠٢٣ کۆبییەیۆ وێما کەردەنما، بەتایبەتی دماو ئەرەیاونای هامپەیمانیی کۆمەڵایەتی، پەی سوریایێوە دیموکراتیکی و چارەسەروو کێشەکاو سوریا، پلانەما نییێنەرە، کە چالاکییەکاما جە چوارچوەو سوریاینە زیاتەر ورسەنگنمێ و چا چوارچوەنە پەرە بە کۆشیایما بدەیمێ. پەی پەشتیوانی جە ژەناو سویدی و بەشداریکەردەی جە تێکۆشیایشا هامکاریی پێویس کریۆ. مێزەو دیپلۆماسیی ژەنا سەرنیشتنە و وەرکەوتوو سوریاینە ئەرەمەرزیێنە و پلانە هەنە سەرێ فرەو وەڵاتا کریۆ. هەرپاسە پەی بەستەی یەرەم کۆنفرانسی دیپلۆماسی پلانە نریێنەرە."
