"دماو زیاتەر جە دۋۍ حەفتا ئاستەیۆیش جە زینڎانو حەشدینە، سەلوان وازئارڎەو ۋېش جە هەرمانەو چەکڎارینە ئەرەیاۋنا و دماتەر کیاستشاوە پۍ کونسولخانەو تورکیای جە هۊلێر. ئیتر سەلوان دماو وازئارڎەیش جە چالاکییە سەروازیەکانە، بریا پۍ تورکیای".
سەلوان سەباح مەتی مومیکا، جە شارو قەرەقوش/حەمدانییەو دەشتەو نەینەوای، جە خێزانێوە کلدانی جە ئەڎۍ بیەن. ئاڎ ۋەڵتەر بەغڎانە ئەرەنیشتەبۍ. ساڵەو ٢٠١٤ ی بە هامکاری و سەرو داواو دەزگاو میتی تورکی، پارتو (یۊبیەی سریانی دیموقراتی)ش ئەرەمەرزنا، کە حەر ۋېچش، جە مابەینو ساڵەکا ٢٠١٤ حەتا ٢٠١٨ی سەرۆکو پارتەکەی بۍ. ئینە جە وەختېنە، کە مەسیحییەکۍ عێراقی، نزیکەو ٩٨٪ کلدانېنۍ و ئەۋۍ تەرێچشا ئاشوری و چن خێزانێوە ئەرمەنییچ جە زاخۆ هەنۍ و سریانۍ عېراقەنە نیەنۍ.
دماتەر کە میت تەرسەو ئانەیش ۋنە نیشتە، کە لایەنگرۍ یەپەگەی و پەکەکەی، دلۍ ئێزدیەکا دەشتەو نەینەواینە دەسەڵاتشا بەقوەت بۊ، ئیجارە هەمڎیسان سەلوان مومیکا، حەر بە زەڕ و داوا و پلانەو دەزگاو میتو تورکی، (کەتیبەو نسوری سریان)یش ئەرەمەرزنا، پۍ دەس گېرتەی سەرو مەنتیقەو بەرتللەیرە جە ما بەینو هۊلێری و موسلی و ئینجا قەرەقوشیرە. ئاڎ تا ئا وەختە، هەڵای بەغڎانە ژیۋۍ، بەڵام پۍ گېرتەو بەرتللەی، ساڵەو ٢٠١٦ ی ئاما هۊلێر، حەتا وەردەوام بتاۋۊ چەکو، زەڕ و ئەمرە جە میتی هۊرگېرۊ. ئاڎ بەئاسانی تاۋاش هێزەکەیش جە هۊلێرۊ پەڕچەک کەرۊ.
دماو ئانەی کە ڕەییان سالم صادق کلدانی، کە کلدانێوە ئشناس و سەلوانیا، بە وەشکەرڎەو جمیەرو (بابلییون)ی، لۋا دلۍ دەسەکا (حەشدی شەعبی) و قاسم سلێمانیچ هامکاریش کەرڎ، تاۋاش نەخشەکا میتی پۍ ئەرەگیرکەرڎەو بەرتللەی جە بنکەو تورکەکاوە نزیک بە بەعشیقەی، پوچ کەرۊوە. حەر ئاڎ سەلوانش گېرت و دماو زیاڎ جە دۋۍ حەفتا ئاستەیۊیش جە زینڎانو حەشدینە، سەلوان وازئارڎەو ۋېش جە هەرمانەو چەکڎاری ئەرەیاۋنا و دماتەر کیاستشاوە پۍ کونسولخانەو تورکیای جە هۊلێر. ئیتر سەلوان دماو وازئارڎەیش جە چالاکییە سەروازیەکا، بریا پۍ تورکیای.
ساڵەو ٢٠١٩ی وەختۍ کە دەزگاو میتی، گەرەکش بۍ فشار وزۊ سەرو یۊبیەی ئەوروپای، دەیان هەزار پەنابەرۍ سوریێش کیاستۍ ئەوروپا. دلېشانە سەڎان ئەنڎامۍ میتی، جە تورک، عەرەب، کورڎ، ئەفغانی و ئێرانیچشا دلېنەبېنۍ. سەلوان چنی ئا شەپۆلۍ، ۋېش یاۋنا ئەلمانیا و دماتەر ئاما سوید.
یۋەمین هەرمانەش پۍ میتی جە سویدەنە، کیاستەیۊیش بۍ پۍ بەغڎای حەتا بلۊنە دلۍ ڕەوتو سەدریەکا و بەشڎاری کەرۊ جە ئەرەگیرکەرڎە و سۊچنای بیناو پەرلەمانو عێراقی. ئاڎ تاۋاش ئی هەرمانۍ کەرۊ و گېڵاوە سوید.
جە دلۍ راسەو زمسانیچۊ، چنی پۆلیسی و ئەرەمەرزیاو داڎو سویدی، ئینا ملەملانېنە، پۍ ئانەی ڕاش پنە بڎریۊ بە سۊچناو قورئانی وەردەمو بالیۆزخانەو عێراقینە، حەتا داڎگا، دژ بە پەی لۋاکا پۆلیسی، ڕاش پنەدا حەتا ئی هەرمانۍ کەرۊ، بەڵام پۆلیس شۊنېوە تەرشا پۍ دیاریکەرڎ. هەڵای دیار نیا، ئی هەرمانۍ دمایشە پۍ چ لایەنېوە کەرڎېنە.
ۋێنەکە: سەلوان مۆمیکان، دلۍ ۋېنیشاندەرا ڕەوتو سەدرینە، وەردەمو بیناو پەرلەمانو عێراقینە. ۋېش ۋێنەکەش جە پەڕەو فەیسبووکو ۋېشەنە نیانەرە.
هـ . ش
