ئاڵدار خەلیل ئەرەیاۋناش دۊڵەتو تورکی و چەتەکێش هرووژم مکەرا سەرو هەرێمەکاو ئیدارەو ۋێڕاوەبەری و بەتایبەت مەنبەجی، واتش: "جە ڕوانۍ تاریخی چامنەنە، پەنەوازا ورمرڎایۍ(هەڵوێست)ۍ تاریخی نیشانە بڎەیمۍ. پەنەوازا مڎرامان گۆرە بکەرمۍ".
ئەندامو دەسەو ڕاوەبەری هامسەرۆکایەتی پەیەدەی، ئاڵدار خەلیل ئەرەیاۋناش ئیدارەو ۋێڕاوەبەری دیموکراتیکی سەرنیشت و ۋەرکۊتوو سوریای سەرمەشقایەتی ئی قۆناغە تاریخیە مکەرۆ.
ئاڵدار خەلیل قسێش پەی ئاژانسوو هەواڵوو فوراتی کەردۍ و سەرنجش وست سەرو ئی خاڵا: "چی سەردەمە تاریخیەنە، سەردەمێوە تاریخی تازە پەی سوریای و گەلا سوریای منویسیۆوە. پرۆژەو ئیدارەو ۋێڕاوەبەری دیموکراتیکی سەرنیشت و ۋەرکۊتو سوریای، ڕۊشنا. پرۆژەکەما نەتەوەی دیموکراتیکا، عەیامێوەن جە چوارچێوەو ئازادی و یەکسانی گەلانە مامەڵەش کەردەن و ۋێش وەڵێوستەن. ئارۆ چنی وڕنای دەسەڵاتی دەرفەتی زیاتەر پەی وەڵێوستەی پڕۆژە دیموکراتیکەکەیما ڕەخسیان. بەڵام دۆڵەتو تورکی کە دژو پێڎابیەی ئاشتییا جە سوریانە، جە ڕاو چەتەکاشۆ هرووژم مکەرۆ سەرو ئیدارەو ۋێڕاوەبەری دیموکراتیکی سەرنیشت و ۋەرکۊتوو سوریای و مەنبەجی. پەنەوازا گەلاو عەرەبی و کوردی و ئەرمەنی و سریانی و تورکمانی و چەرکەزی دژو ئی هرووژما مڎرامان بکەرا و ئا دەسکۆتا پارێزنا کە بە ۋنەو سەڎان هەزار گەشمەرڎا و ڕەنجو گەلا و بە سەرمەشقایەتی ژەنا و جوانا بەدەس ئامێنۍ.
پەنەوازا گەلاو سەرنیشت و ۋەرکۊتوو سوریای قەرارو ئایندەو ۋێشا بڎا
جە ڕوانۍ تاریخی چامنەنە، پەنەوازا ورمرڎایۍ تاریخی نیشانە بڎەیمۍ. گرڎو گەلا سەرنیشت و ۋەرکۊتو سوریای، مشۊم پەی پارێزنای دەسکەوتەکا سەفەربەرۍ بیمۍ. ئەر ئی ۋرمرڎایە تاریخیە نیشانە بڎریۆ، ئیدارەو ۋێڕاوەبەری دیموکراتیکی سەرنیشت و ۋەرکۊتوو سوریای متاوۆ سەرمەشقایەتی ئاینڎەو سوریای بکەرۊ و ئاینڎەو سوریای دیاری بکەرۆ. بەڵام ئەر لاوازیۍ بۆ، ئا کاتە دۆڵەتو تورکی کە گەرەکشا قەیرانەو دلێینەو سوریای قووڵتەر بکەرۆوە، پلانەکاش جابەجێ مکەرۆ، ئا کاتە سوریا دماو ١٤ ساڵا گنۆ دلۍ ئێرێوە تازەی و ئی ئێرە زیاتەر تەشەنە مسانۆ. پۊکەی پەنەوازا ڕا چی هەوڵا دۆڵەتو تورکی گێرمێنە و مڎرامانی گۊرەتەر بکەرمۍ".
