ڕۆنامەنوویس و نوویسەر فەیسەڵ ئاڤجی کە دماو ٣٠ساڵا جە زینانەنە ئازاڎ کریا، سەبارەت بە پروسەکەی پەی ئاژانسوو هەواڵوو فوراتی (ANF) قسێش کەردۍ.

فەیسەڵ ئاڤجی ڕایگەیاند: "وەڵۍ گرڎ چێوێنە پڕۆسەو ئاشتی پرۆسێوە ٥٠ ساڵەی پەیوەندیدارا بە پارتو کرێکارا کوردەسانی (پەکەکە)یۊ، پەنەوازا ئی پرۆسە پېسە چارەسەری پەی پرسو کوردی هۊرسەنگیۆ کە ماوەو ٢٠٠ سەڎ ساڵان کۊمکوش کریان و نکۆڵیش ۋنەکریان.

ئانۍ شۊنەو ئاشتیرە گېڵا یان پەنەوازشا بە ئاشتییا، تەنیا کوردەکۍ نیەنۍ. ئەر حکومەت هەنگامە پەی ئاشتی نەنیۆ، ڕووبەڕوو داواکارییەکا گەلی بۆوە.

ماوەو ٥٠ ساڵا جە تەمەنو کۆماری بە ئەوەکۊشای پەکەکەی موېیەرۆ. ئەر سەرنج بڎەیمۍ ئی پرۆسەو جەنگیە کاریگەریش سەرو گرڎو بوارەکا گلېرگەی بیەن. پۊکەی ئەرە حکومەت گەرەکش بۆ دیموکراسی بەرقەرار بۆ، مشۊم وەڵۍ گرڎ چێوێنە پرسو کوردی چارەسەر بکەرۆ."

'مشۊم دۆڵەت بە شێوێوە جددی بلۊنە دلې پرۆسەکەیۆ'

ئاڤجی ئەرەیاۋناش کە مشۊم دۊڵەتو تورکیای بە شێوێوە جددی بلۊنە دلۍ پرۆسەکەی و واتش: "پرسو کوردی تەنیا پرسو گەلو کوردی نییا، بەڵکم پرسو حکوومەتو تورکیایچا، پرسو ئاشتییا پەی گەلاو تورکیای؛ تا حکوومەت هەنگامە نەنیۆ، بەدڵنیاییوە ئاشتیێوە درێژخایەن بەدی نمۍ.

هەرپاسە چێنە دەورو ئېژا ئۆجالانی فرە گرنگا. دۆڵەتو تورکیای هەرچیش کەرڎ، نەتاواش پەکەکەی ناچار بکەرۆ دمایی بە چالاکییەکاش بارۊنە و جەنگی چەکڎاری مردنۆ. تەنیا هێزێوە کە تاواش ئی هەرمانۍ بکەرۆ تەنیا ئېژا ئۆجالان بۍ.

لایەنێوە تەر ئانەنە کە پەکەکە هەلومەرجو فاڕیای سەردەمی عال شیکەرۊوە و ۋێش جە بڕۍ مژارا سیاسی واوەی بیەیۆ ڕزگار کەرد و لوان دلې پرۆسەو فاڕیایۆ. دمایی ئارڎەی بە چالاکییەکاش چېرو نامې پەکەکەینە ماناش ئانۍ نیەنە کە دەسبەردارو گرڎ چێوۍ بیەن. سەرەڕاو ئانەی کە پەکەکە چېرو نامۍ ۋێشەنە دمایش بە چالاکیەکاش ئارڎ، بەڵام ئا بەهۍ وەشش کەردێنۍ، دیدگاکێش، شێوازو ژیۋای، دۆڵەمەڼی ڕێکوزیا کۆمەڵایەتییەکەیش و لایەنە دیموکراتیکە بەهێزەکەیشا. واتە ئانەی چێنە فاڕیان ئامرازو ئەوەکۊشایا."

'گلېرگە باوەڕیش بە قسې سەر زارەکی نییا'

ئافجی ئاماژەش پانەی دا کە دۊڵەت ۋەرا ۋەر بە گلېرگەی ۋەرپەرسا و سەبارەت بە ئاشتی واتش: "دۊڵەت مشۊم دەمودەس فاڕیای یاسایی دەس پنە بکەرۆ، گرنگتەرین کێشەو ئیساتۍ گلېرگەی بێ متمانەییا بە حکومەتی، ئی شکسو متمانەیە تەنیا عیلاقەش بە گفتوگۊکا ئاشتیۆ نییا، بەڵکم کاریگەری شکستێوە ٢٠٠ سەڎ ساڵەو تورکیایا، هۆشیاری کۆمەڵایەتی چی ڕوۆ فرە بەرزا، حکومەت هەنگامەی پەنەوازەش چی ڕوۆ نەنیێنە. بڕۍ هەرمانۍ ەکەرۆ، بەڵام وەسۍ نییەنۍ، پەی ئانەی حکومەت جارێوەتەر نەگێڵۊوە دماوە، مشۊم دەمودەس هەنگامەی یاساییە بنریۆ.

پەنەوازا حکومەت هەنگامېوە جددیە پەی جوابو هەنگامەکا پەکەکەی بنیۆ. یووەم چەمەڕاییەکۍ ئەشیۍ جە زینانەکاوە دەسشا پنەکەردەبیۍ بەتایبەت زینانییە نەوەشەکۍ. گلېرگە متمانەش تەنیا بە قسەکا حکومەتی نییا بەلکم پەنەوازش بە کرداری هەن."

'پەنەوازا دەمودەس هەنگامەی یاساییە بنریۆ'

فەیسەڵ ئاڤجی جەختش چانەی کەرڎۆ کە پەی ئانەی پرۆسەکە شکس نارۆ، پەنەوازا دەمودەس جە بواری یاسایینە هەموارکەردەیۆ ئەنجام بڎریۆ و واتش: "پڕۆسەو ئاشتی تەنیا عیلاقەدار نیا بە کوردیۆ؛ ئی پرۆسە جە ئیساتێنە ئامرازێوەن پەی فاڕیای حکومەتو تورکیای. چونکی حکومەت نمەتاوۆ بە تەنیا هەنگامېوە بنیۆ، متاوۆ سەرو بنەماو پرسو کوردی فاڕیۆ. پرسو کوردی پرسو حکومەتو تورکیایا. غەڵەتا ئی مژارە تەنیا پېسە پرسێوە کوردی هۊرسەنگنایش پەی بکریۆ جە بنەڕەتەنە ئینە پرۆسێوەن کە چنەشەنە مافە کولتووری و نەتەوەییەکۍ ئەرەگیر کریێنۍ.

پۊکەی پرۆسەو ئاشتی سەرەتاو پرۆسەو دیموکراتیزەکەردەی دۊڵەتو تورکیایچا."