هۊنیەری نامڎار شێرکۆ بێکەس، کە ڕۊو ٤و ئابو ٢٠١٣ بە نەۋەشی سەرەتانی جە نەوەشخانەو کارۆلنسکای ستۆکهۆڵم و پایتەختو سویدی کۆچی دمایش کەرڎ، جە ١٠ەمین ساڵیاڎو فەوتیشەنە جە شارو سلێمانی یاڎەکەش بەرزڕاگیریا.

مەراسیمەکە جە پاركی ئازاڎیی شارو سلێمانی، سەرو مەزارگەو هۊنیەری، بەئاماڎەبیەی دەیان كەسا جە چین و توێژە جیاجیاکا، جەلایەنو ڕێكوزیاو شاری و بەهەماهەنگی ڕۊنامە و كورڎسانی نوێ سازکریا.

سەرەتاو مەراسیمەكەی بە دەیەقېوە مرڎای دەسش پنەکەرڎ، دماتەر چن تاجە گوڵینېوە سەرو مەزارو هۊنیەریۊ نریارە و چن قسېوە جەلایەنو رێكوزا مەراسیمەکەی و وەزیرو ڕۆشنۋیری و پارێزگارو سلێمانییوە پێشکەشکریا.

چنی ۋەنەیۊ چن كۆپلە شیعرێوە هۊنەری، ١٠ مۆمۍ جە لایەنو هۊنەراوە گیسیېنە، دماتەر جە لایەنو حەریۊ جە هونەرمەنڎا شنیار نەجیب-ۍ و سێوە كامیل-یوە چن گۆرانیۍ پێشكەش كریۍ.

جە درێژەو مەراسیمەكەینە، جەلایەن و چن هۊنەرېوە، چن پارچە شیعرێوە پێشكەش بە ڕۆحو شێركۆ بێكەسی كریا و جە دما دمایی مەراسیمەكەیچەنە، چن دیاریېوە ڕێز ۋنەنیای سەرو هۊنەرا و كەسایەتییەكارە بەشکریا.

هـ . ش