گۆشەگیری سەرو ڕابەرو گەلوو کورڎی عەبدوڵا ئۆجالانی تا مۍ قوڵتەر بۊ. ٢٨ مانگېن حیچ زانیاریېۋە جە بارەشۊ ۋەردەس نییا. داواکارییەکۍ خانەواڎەی و پاڕێزنەراش پۍ ئەنجامدای دیڎاری گرڎ جارێۋە ڕەڎ کریاۋە.

پەرلەمانتارەکۍ پارتو چەپی سەوزی سەبارەڎ بە مژارەکەی داواکاری وزانە ۋەردەمو پەرلەمانی. پەرلەمانتارەکۍ باس چانەی کەرا کە حیچ زانیاریېۋە جە عەبدوڵا ئۆجالانیۊ ۋەردەس نییا و ڕۊ دماو ڕۊی گەلوو کورڎی نیگەرانییەکېش چا بارۊ زیاتەرۍ با.

پەرلەمانتارەو بازنەو ئێلیح و پارتو چەپی سەوزی زەینەب ئۆدونجوە باسش چانەی کەرڎ کە ئاڎۍ جە وەرزی تازەو یاسا نیایرەینە بە چ جۊرۍ مژارو گۆشەگیر بەرانۍ دلۍ پەرلەمانی.

ئۆدونجوە ۋیرش ئارڎۊ کە جە ساڵەو ٢٠١٥ بە دمایۊ جە تورکیا و کورڎسانەنە سیاسەتو فشاری، نکوڵی و ئەسڕیەیۊ زیاتەرۍ بیېنۍ.

ئۆدونجوە ئەرەیاۋناش کە حکومەتو ئاکەپەی جە ڕاو دوژمنایەتیکەرڎەی کورڎاوە حۊڵ مڎۊ ۋېش خوڵقنۊ و ماچۊ: "دەسەڵاتو ئاکەپەی جە ڕاو سیاسەتو جەنگی تایبەتیۊ حۊڵ مڎۊ گەلەکەیما دلېنە بەرۊ. پۍ ئانەی قەیرانە هەمەجۊرەکۍ تورکیای چارەسەر کریا مشۊم جە زووتەرین وەختەنە دمایی بە گۆشەگیری سەرو ڕابەرو گەلوو کورڎی عەبدوڵا ئۆجالانی بېنە. ڕابەر ئاپۊ نوێنەرایەتی کۊشیای ئازاڎیی و دیموکراسی گرڎو گەلا ۋەرکەوتی میامینی بە تایبەتی گەلوو کورڎی کەرۊ. دەوڵەت و سیستم ۋەرو ئانەی درک پانەی کەرا، جە ڕاو قورستەر کەرڎەی گۆشەگیریۊ پاسە ۋیر کەرۊۋە کە کۊشیای دما وزۊ".

'سەرچەمەو گرڎو قۊرتەکا گۆشەگیرییا'

ئۆدونجوە دەسنیشانش کەرڎ کە گۆشەگیری پەرسو پاشێلکاری مافەکا مرۆڤیا و ماۋېۋە فرەن ئیمراڵی-نە جابەجۍ کریۊ و ۋاتش، "ئێمە پېسە پارتو چەپی سەوزی گۆشەگیری وزمۍ بەرنامەو هەرمانەو پەرلەمانیۊ پۍ ئانەی ڕا ۋەردەمو دیموکراسی جە تورکیانە کەرمېۋە. ئێمە پېسە پارتو چەپی سەوزی حۊڵ مڎەیمۍ چا مژارەنە ئەرکەکا ۋېما جابەجۍ کەرمۍ، بەڵام ئېمەیچ مزانمۍ ئینە وەسۍ نیا. گۆشەگیری سەرو ڕابەر ئاپۆی تەنیا پەیوەنڎیش بە گەلوو کورڎیۋە نییا، بەڵکم پەیوەسا بە مرۆڤایەتیوە. ۋەرو ئانەی مشۊم ئی مژارە نەک هەر پەرسو گەرمو دلۍ کورڎەکا، بەڵکم مشۊم بۊ بە مژارو گەرمو گرڎو گلېرگە و تورکیای. گۆشەگیری پەرسو پاشێلکاری مافەکا مرۆڤیا، حەرپۊکەی ئانەی بە ۋېش ماچۊ ئینسانەنا پەیوەنڎیش پۊشۊ هەن. ۋەرو ئانەی مشۊم ئێمە پېسە پەرلەمانتارا کورڎی رەهەنڎەکا گۆشەگیری، ئا قەیرانە سیاسی و کۆمەڵایەتیۍ کە خوڵقنانش، ۋەربەسە ئابوورییەکۍ و تاڵانکەرڎەی ژیۋگەی کە سیاسەتو جەنگی ڕاش پۍ کەرڎېنۍ وزمۍ ۋەرو باسی. مشۊم ئەرەیاۋنمېش کە ئانۍ گرڎ دماو هۊرگېرتەی گۆشەگیری، مسۆگەرکەرڎەی ئازاڎیی بەڕێز عەبدوڵا ئۆجالانی و چارەسەرکەرڎەی پەرسو کورڎی، چارەسەرۍ با".

هـ . ش