ئەگەر ئیساتێوە دژوو ئا هجووم و خیانەتا هەڵوێستێ قەوەتێ نەیا ئاراوە، دەسکەوتەکاو کوردی پانیشتوو کوردستانینە، ئانێ دماو ئا گردوو کۆشیای، ئازار و مەینەتییاو کیمیاییواران و ئەنفالی، کە ڕژێموو بەعسی سەروو کوردیرە ئاردێنێش، بەدەس ئامێنێ، گرد دلێنە مشانە.
دەوڵەتی تورکی ئەرەگیرکەر بەتایبەتی ماوەو ٨ ساڵان بە گردوو هێز و تەکنەلۆژیاو وێشۆ هجوومێ مکەرۆ سەروو گەریلاکاو ئازادیی کوردستانی تا ئیساتێ بۆنەو گەریلاکاو ئازادیی سەردەموو مۆدێرنیتەی دیموکراتیکیوە نەتاوانش سەربگنۆ. ئێساڵ هەوڵێ مدۆ ڕاو هێزە خایین و نۆکەرەکاشۆ پێسەو پەدەکە، هەرپاسە دەوڵەتە هەرێمییەکاوە و پەشتگیریی ناتۆیوە ئا هجوومە قڕکارییا و ئەرەگیرکەرییا بکەرۆ و بیاوۆ ئامانج.
جە ئامای دۆخی تەرسناکوو ئی دمایوە پانیشتوو کوردستانینە، کە سەروو بنەماو قۆناغێوی تازەو پلانەو قڕکەردەی کوردا –کوردە ئازاد- مکریۆنە، بەدڵنیاییەوە خائینێ و وێوەرەشێ گەورەتەرین دەورشا هەن. مزانیۆ کە دەوڵەتوو تورکی ئەرەگیرکەری سەروو بنەماو "دلێنەبەردەی و قڕکەردەی کوردا" ئەرەمەرزیان، بەردەوام جە چوارچوەو پلانەکاو هێزە هەژمونگەرا میاننەتەوەییەکا (وەڵاتاو ناتۆ)ی تا ئاستێوە یاویێنێ یاگێ و پێسەیچ هەوڵێ مدریانە، کە ڕا وەردەموو ئانەینە بگێریۆ، کە کورد بۆ ساعیبوو ئیرادەی و ستاتۆشا نەبۆ.
ئارۆنە کە هجوومە ئەرەگیرکەرییەکێ و لکنای کەوتێنێ وەروو باسیوە، تەرسیوی گەورێ ئینسا سەروو ئایندەو گەلوو کوردیوە بەتایبەتی پانیشتوو کوردستانی؛ خاڵەی سەرەکییە چێگەنە بەشداربییەی کاراو پەدەکەی و چەتەکاشا هجوومەکەنە. دەوڵەتوو تورکی ئەرەگیرکەری، کە بەتەمامی پەدەکەش وستەن چێروو کۆنترۆڵیوە، ئارۆنە داواو شناسنامەی لە هاموەڵاتاو پانیشتی مکەرۆ و بە نۆعێوە تەر پێسەو ساحێبوو ئی خاک و گەلەیە مامەڵە مکەرۆ. بێگومان ئانە کە ڕاش وەرەموو ئینەینە کەردێنۆ نەک ویانێ پەکەکەی، بەڵکوم خیانەت و بێمەژگیی پەدەکە-بنەیانەو بارزانییا- کە پەی بەرژەوەندیی بنەیانەیی و ئاساییشا گەمە بە چارەنویسوو گەلی مکەرۆ.
خاڵێوی تەرە کە پەدەکە بە هەماهەنگیی دەوڵەتوو تورکی قڕکەری-هێزە هەژمونگەرا جیهانییەکا، بە زۆر ڕاو زەڕ-مووچەیوە، ئیرادەو گەلی سەرکوت مکەرۆ و پێسە چێشش گەرەک بۆ مکەرۆش. ئەنداموو کۆمیتەو ڕاوەبەریی پەکەکەی موراد قەرەیلان، کە چێوەڵتەر دیدارێوەنە واتەبێش "پەدەکە تا ئیساتێ ڕاسیی تارێخیی دەوڵەتوو تورکی نمەزانۆنە" بە بڕێو نموونێوە وستەبێش ڕووە، کە ئەگەر پلانەکاو دەوڵەتوو تورکی ئەرەگیرکەر بیاوا ئەنجام، ئی جارە نۆرەو خودوو پەدەکەیچ مێ. جگە جە بێکەرامەتی و خیانەتی، کە بنەیانەو بارزانیی پێسەو ڤایرۆسێوە بەردەوام گلێرگەی کوردییش نەوەش وستەن، گرد وەخت بییەن مایێ ماڕای هومێدی و کۆشیای ئازادیی گەلوو کوردی. وێش پەی وێش فرە بەڵگێ (بۆنەو ئانەیوە مزانیۆ پێویس نمەکەرۆ چێ ئاماژەشا پەنە بدریۆوە) بەرش موزانە، کە پەدەکە- بنەیانەو بارزانی پێسەو پڕۆژێوە کورستانەنە ساز کریان و پەرەش پەنە دریان. وەروو ئانەیە پێناسەو ئانەیە پەدەکە هێزێوی کوردییا گونجیا نییەن.
ئارۆ سەروو بنەماو فەرمانەکاو دەوڵەتوو تورک-میتیوە، پەدەکەی پێسەو نۆکەری و غوڵامێوی وەربەرەی ئێشکگێرییشا پەی مکەرۆ و ملۆ وەرو دەمیشا. سەردای بارزانییەکا پەی بەغدا، تارانی و چند وەڵاتێوی تەری ماوەکاو وەڵێنە، بێگومان سەروو داواکاریی دەوڵەتوو تورکیاین.
دەوڵەتوو تورکی ئەرەگیرکەری، کە بەتەنیا وێشا دەرەقەتوو گەریلاکاو ئازادیی کوردستانی نمەیانە و نمەتاوانە وەراوەرشا بمدرانە؛ هەوڵێ مدۆ کە ئا هێزە چەتە و خائینا پێسەو پەدەکەی بەکاربارۆ و پێسە بیاوۆ ئەنجام. دۆخوو ئیساتێ هەرێمەکەی بە گردوو لایەنەکاشەوە ئی ڕاسییە پەشتڕاس مکەرۆوە. دماوستەی ورچنیەیەکا، نەدای مووچەو خەڵکی، گەل، سەرکوت، گێرتەی و کوشتەی و ئڕفانای هموەڵاتە کوردا، کە ڕوانە چەکداراو پەدەکەی مکەرانەش، گرد بەشێوەنێ چی ڕاسییە.
ئانە چێگەنە یاگێ تەرسێن، ئانەنە کە موازیۆ هەڵوێستێوی وەرفراوان و کاریگەر دژوو هجوومە ئەرەگیرکەرییەکا و خیانەتوو پەدەکەی لاو گەلیوە نێ ئاراوە؛ سەرمەشقەکێ یا لایەنە ڕۆشنویرییەکێ، نویسەرێ، گەنجێ، ژەنی و وەڵاتپارێزنێ و پێشمەرگە دێرینەکێ و ......هتد.. دەوری سەرەکیی وێشا نمەگێڵنا و گەلی نمەوزانە جموجووڵۆ، ئەگەر ئیساتێوە دژوو ئا هجووم و خیانەتەیە هەڵوێستێوی زوویین و دەمودەس نەبۆ، دەسکەوتەکاو کوردا پانیشتوو کوردستانینە، کە دماو ئا گردوو کۆشیای، ئازار و مەینەتییەو کیمیاییواران، ئەنفال و هتد، کە ڕژێموو بەعسی سەروو کوردارە کەردەنش، بەدەس ئامێنێ، گرد دلێنە مشانە. دۆخێوی خەتەری چینە هەن.
