تولای حاتەم ئۆغۆللاریە، هامسەرۆکەو دەم پارتی سڵامش جە زینڎانیا کەرد و واتش: "ئێمە دیوارۍ زینڎانەکا وڕنمۍ، کۆشیایما بەردەوام بۆ هەتا دەروازە ئاسنینەکا تاونمێوە. ئێمە بە چەمکوو ۋێڕاوەبەری ئازاڎیی ژەنا پۍ وەڵۍ ملمۍ".
پارتوو یەکسانی و دیموکراسی گەلا (دەم پارتی) یۆ جە ئوتێلەکا شاروو ئامەڎینە بە دروشمەو "وەختوو ژەنا ئیراڎەو ژەنان" و بە زۋانی کوردی بە دروشمەو "وەختوو ژەنەکا، ئیراڎەو ژەنەکان" بەرنامەکەش ڕێکوست. بەرنامەکە بە وتارەو هامسەرۆکەو گرڎیی دەم پارتی تولای حاتەم ئۆغڵاریە دەسش پنەکەرد. حاتەم ئۆغڵاریە سەرەتا سڵامش جە ژەنە سیاسەڎمەدارە زینڎانیەکا کەرد و واتش: "چێگۆ سڵام و حورمەتوو ۋێما پۍ گرڎوو ئا هەڤاڵە ژەناما کیانمۍ کە جە زینڎانەنە گیریێنۍ. وەعد مڎەیمۍ بەردەواۍ بیمۍ جە کۆشیایما تا دیوارەکا وڕنمۍ".
حاتەم ئۆغڵاریە ئاماژەش پانەی دا کە ئانەی چۍ کریۆ جە حیچ شۊنێەوە جەهانینە مەکریۆ و جە سایەو کۊشیاو جمیەروو ژەنا کوردیوە یاۋێنۍ بە ئارۊی. حەرپاسە ئەرەیاۋناش کە وەڵۍ هۊرچنیەکانە نەک تەنیا پۍ تورکیای بەڵکم پۍ گرڎوو جەهانی نموونەن و جە درێژەو قسەکاشەنە واتش، گەل کاندیدوو ۋێش هۊرچنی و ئینە چێوێوە فرە بە قیمەتا. نزیکەو ٥ هەزارۍ جە هامڕایاما پۍ ئی وەڵۍ هۊرچنیەیە خەباتشا کەرد. سوپاسشا کەرمۍ. ئێمە ئینایمۍ پرۆسێوە فرە سەختەنە. جە گرڎ یاگێنە جەنگ هەن. جە گرڎ یاگۍ دنیێنە فاشیزم و ناسیۆنالیزم و عەقڵییەتوو پیای زاڵێنۍ سەروو گرڎ چێوێرە. ئێمە مزانمۍ کە ژەنی بەردەوام بیێنۍ بە ئامانجشا.
جە درێژەو قسەکاشەنە تولای حاتەم ئۆغڵاریە سڵامش جە گرڎوو ژەنا جەهانی کەرد هەر جە شیلیوە تا ئەرجەنتین، جە مېڎانوو تەحریریوە تا ۋەرنیشت، جە بەغڎاوە تا هۆلێر، کە ماچا "تەسلیمۍ مەبیمۍ و کۊشیەیمۍ" و پی جۊرە دمایش بە قسەکاش ئارد: سڵام جە " کلارا زەتکیۍ، ڕۆزا لۆکسەمبۆرگۍ، بەهیجا بۆرانۍ، شیرین تەکەلیۍ، ساکینەی، سەڤێ، هەڤرین خەلەفۍ. بەیدۍ با وەعدشا پنەبڎەیمۍ جە هۊرچنیەو ٣١و ئازارینە یۆ بە یۆ شارەوانییەکا بارمېوە. چێگۆ وەعد مڎەیمۍ کە سەرکۊتەی ٣١و مارسی پێشکەشوو گرڎوو ئا ژەنا دلۍ زینڎانەکا و ئەڎایا کە بەشدارێنۍ جە چالاکیی ئیشکگیریی دادپەروەرینە. حەرچنە جەنازەو رۆڵەکاشا جە ڕاو پۆستیۆ ئاردێوە، بەڵام ئەڎایا جە واتەی ئاشتی نەمردۍ. هیواو سەرکۊتەی پۍ گردیتا وازوو".
دماتەر یۊبەیۊ گرڎوو کاندیدەکا خوڵقە کریۍ بەیا سەروو شانۆی و بە جەماوەری ئشناسیۍ.
