هیزی دووەشەممە وەزارەتوو بەروو ئەمریکای پەشتڕاسشکەرڎۊ، کە سەرەڕاو سزاکاو سەروو ئێرانی، ڕا بە ئێرانی مڎا سەدان ملوێن دۊلارۍ قەرزوو گازی و کارەبۍ جە عێراقی ورگێرۊوە.  

کۊنگرێوە ڕۊژنامەوانینە واشنتۊنوو پایتەختوو ئەمریکاینە، ماتیۊ میلەر قسەکەروو وەزارەتوو بەروو ئەمریکای پەشتڕاسش کەرڎۊ، کە عێراق زەڕەکەیش وزۊ هەژمارێوە بانکیوە، کە لاو وەڵاتوو عومانیوە بریۊ ڕاوە، ئێران متاوۊ بە بڕۍ مەرجێوە، ئا زەڕەیە بەکار بارۊ. 

هەرپاسە لاو وێشاوە ئێران هەر جە ڕۊو دووشەممەیۊ، جە ڕاو وەزارەتوو بەریوە ئەرەیاونابێش، کە عومان و قەتەر ڕازییۍ بیێنۍ، سەرپەرشتی و هەرمانگێڵنیی فاڕایۊ زەڕەکەی وزا گەرڎەنوو وێشا.

ئا قسەکەرەو وەزارەتوو بەروو ئەمریکای واتەنیچش: "متاوو پەشتڕاسیچ کەرووە، کە عومان ئامادەیی وێش بەروستەن، پەی ئانەیە بەشێوە چا زەڕیە ورگێرۊ. ئێمەیچ تەسەورما چانەن ئانەهەنگامێوە گرنگەنە."

ماتیۊ میلەر واتەنیچش"گرنگا کە ئا زەڕە عێراقنە بریۊ جبەر، چونکوم بییەن بە سەرچەمێوە دەسەڵاتی، کە ئێران دژوو هامساکەیش بەکارش مارۊ."

بارەو کۊتوبەندوو سەروو هەژمارە بانکییەکەیۊ، میلەر واتش، کە زەڕەکە تەنیا پەی ئا "چالاکییانە، کە سزاشا سەرۊ نییەنە، پێسە یارڎەیداێوە ئینسانی" هەرپاسە فاڕایۊ هەر بڕە زەڕێوە پەی هەژمارەکەی یان جە هەژمارەکەیۊ، پێویستش بە گڵۊپی سەوزوو وەزارەتوو گەنجینەو ئەمریکای هەن.

یاگۍ واتەینە، عێراق پەی هەرمانپەنەکەرڎەی وێستگەکاو بەرهەمئارڎەی کارەبۍ، پەشتی بە گازوو ئێرانی بەسۊ، هەر مانگەی وەڵینە عێراق ٢ ملیارۍ و ٧٠٠ ملوێن دۊلارۍ قەرزوو گازی و کارەباو ئێرانیش داوە، جە وەختێوەنە بە پاو محەممەد سادقی باڵیۊزوو ئێرانی  بەغڎانە ئەرەیاونانشا، کە "عێراق ١١ ملیار دۊلارۍ جە زەڕوو گازی قەرزاروو ئێرانین".

س.ز