ژمارێوە پەرلەمانتارۍ ئۊروپای جە شارو ستراسبۆرگو فەرەنساینە بۊنەو یووەمین ئەرەنیشتەو پەرلەمانو ئۊروپای جە ساڵۊو ٢٠٢٥ی، سەرشا ۋنەو چالاکی ئێشکگیری دا کە پەی ئازاڎیی ڕابەر ئاپۆی ملۊڕاوە.
ئەنداماو پەرلەمانو ئۊروپای سەرشا ۋنەو ئێشکگیری ئازاڎیی دا کە پەی ئازاڎیی ڕابەر ئاپۆی و دمایئاردەی بە گۆشەگیری بەردەواما.
ئەنداماو فراکسیۆنو چەپو پەرلەمانو ئۊروپای پێرنادا بارێنا ئارزا، سباستیان ئەڤەردینگ و لەیلا چایبیە، جە فراکسیۆنو هامپەیمانی وەڵێکۊتەوازو سۆسیالیست و دیموکراتەکا پەرلەمانو ئۊروپای ئەندرێس شیدەر بەشدارۍ بێنۍ.
نوێنەرو کۆنسەو ئۊروپاو پارتو دیموکراتیکی فایەق یاگیزات و چالاکەی سیاسیەی مېیاننەتەوەییە سارا گلینە ئاماڎۍ بێنۍ.
جە سەرۋنەداکەینە تەئکید کریاوە، ڕابەر ئاپۆ سیمبولو ئاشتییا و پەی ئانەی پرۆسېوە تازەو چارەسەری بەشێوێوە تەندرووس وەڵۍ گنۆ، پەنەوازا ئازاڎ بکریۆ.
ئەندامو فراکسیۆنو چەپی جە پەرلەمانو ئۊروپای سباستیان ئەڤەردینگ ئاماژەش پانەی کەرڎ دەیان ساڵێن کوردەکۍ جە مافو بەکارئاوردەی زوانی و ژیۋای کەلتووری بێبەشێنۍ، ئازاڎیی ڕابەربڕیەیشا چنە گیریان".
ئاماژەش پانەی کەرڎ پەنەوازا پەیامو ئاشتی ڕابەر ئاپۆی بیاوۆ بە پەرلەمانو تورکیای، واتش: "پارېزنای مافو کەمەنەتەوەکا جە یۊبیەی ئۊروپاینە پێگێوە گرنگش هەن. پەنەوازا ئێژا ئەردۆغان بیاوۆنە کە بەبێ پارېزنای کەمەنەتەوەییەکا بەرەو لوای دلۍ یۊبیەی ئۊروپای ڕووەشەرە بە وزیایرەی مەنۊوە".
سارا گلینە کە نوێنەرایەتی هەڵمەتەی مېیاننەتەوەیی "ئازادی پەی ئۆجالانی، چارەسەری سیاسی پەی پرسو کورد"ی مکەرۆ، سەرنجش وست سەرو ئا مەترسییەی کە تورکیاش ئینا چنە. تەئکیدش کەرڎۆ، ڕابەر ئاپۆ پەی گفتوگۊو ئاشتی ئاماڎەن.
هەرپاسە جەختش کەرڎۆ کە پەنەوازا جە پرۆسەو ئاشتیینە بەشداریێوە سیاسیی ۋەرفراوان بۆنە و ئەرەیاۋناش پەیامەکۍ ڕابەر ئاپۆی پەی پرۆسەو چارەسەری گرنگیێوە یەکلاکەرەوەشا هەن.
جە سەرۋنەداکەینە ئەرەیاۋېیا، کە پەی دما ڕۊو تورکیای و هەرێمەکەی، پەنەوازا حکومەتو تورکیای جیای درێژەدای بە جەنگی، چنی گەلوو کوردی هەرمانە پەی ئاشتی بکەرۆ. هەرپاسە پەی ئازادیی ڕابەر ئاپۆی و بەشداربیەیش جە پرۆسەو ئازادی و ئاشتینە داواو پەشتیوانی مېیاننەتەوەیی کریا.
