فەرمانڎەیی گرڎی یەکینەکا پارېزنای ژەنا (یەپەژە)ی جە بارەو گەشمەرڎەبیەی جەنگەوانېش بە نامۍ شیرین عەلی (ئادار جودی)ېوە ئەرەیاۋنېوەش ۋەڵاکەرڎۊ.

جە ئەرەیاۋناکەنە ئامان: "ئاخېزو ژەنا سەرنیشتو و ۋەرکەوتوو سوریای بە بەشڎاربیەی ژەنا ۋېش یاۋنا بە گرڎو بەشەکا گلېرگەی. گرڎو ئا ژەنا کە دلۍ ریزەکا ئازاڎینە بەشڎارۍ با، بانۍ بە هێزی بنەڕەتی درێژەپنەدای و گەشتەرکەرڎەی ئاخېزی. هامڕاما ئادار جودیە یۊ چا هەڤاڵا بۍ کە جە سەرەتاو ئاخېزیۊ بەشڎاریش جە یەکینەکا پارېزنای ژەنانە کەرڎ.

هامڕاما شیرین عەلی ئشناسیۍ بە ئادار جودیۍ دلۍ خانەواڎېوە وڵاڎپارێزینە جە حەسەکە جە ئەڎۍ بیېنە، ئانەیچ پاسەش کەرڎ کە ۋەردەوام پەیجوری ژیۋایۍ ئازاڎی بۊ. چنی دەسپنەکەرڎە و ئاخېزی هامڕا ئادارە پەی پارېزنای ئشناسنامەی، خاک و کولتورو ۋېش ڕۋەشکەرڎە دلۍ ریزەکا یەکینەکا پارېزنای ژەنا و جە دژوو هجومە ئەرەگیری و کۊکوشکاریەکا دەورېوە گرنگش گێڵنا. هامڕا ئادارە بە هەڵوێسو ۋېش هەم جە روو بیردۆزی و هەمیچ جە روو سەروازییوە ۋەردەوام پیمەرەکۍ جەنگاوەریش پارېزنۍ و تا دما هەناسەش خۊتانکەرڎەیش جە ئەرکەکاش کەرڎ.

جە ٢٧و تەمووزینە وەختۍ سەرو ئەرکەکەیشاوە بېنۍ جە ئاکامو ڕۋەدایېنۍ چنی هامڕایاش حەسینا موسا محەمەڎ (ئاڤاشین جودی)ۍ، هیبا عەبدوڵقادر بەکر (هیبا حەسەکە)یۍ، بێریڤان عەبدل خەلەف (بێریڤان حەسەکە)یۍ و ئەمینە نەبۆ سلێمان (دلار کۆبانێ)ۍ زامڎارەبیە. بەڵام سەرەڕاو حۊڵەکا دکتۊرەکا هامڕا ئادار جودیە جە ٣١و تەمووزینە گەشمەرڎۍ بیە. سەرەوەشی جە خانەواڎە بەڕێزەکەیشا و گەلە وڵاڎپارێزەکەیما کەرمۍ.

پېسە یەپەژەی سەرو ئا وەعدەینمۍ، کە خۊتانکەرڎةی جە رەنجو هامڕا گەشمەرڎەکاما کەرۊ و پەیوەسبیەی ۋېما بە گەشمەرڎاوە جە ڕاو بە هەمیشەیی کەرڎەی سیستمو گلېرگەی ئازاڎی و دیموکراتیکی تاجدار کەرمۍ.

ئشناسنامەو هەڤاڵە گەشمەرڎەکېما پی جۆرەنە:

ناسنامۍ: ئادار جودیە

نامۍ و دمانامۍ: شیرین عەلی

نامۍ ئەڎۍ: لەیلا

نامۍ تاتەی: عەبدولباقی

وەخت و یاگۍ جە ئەڎابیەی: ١٩٨٥/ حەسەکە

وەخت و یاگۍ گەشمەرڎەبیەی: ٣١-٠٧-٢٠٢٣/ حەسەکە"

هـ . ش