هەڵمەتەو ۋەرگیری جە شەریفە محەمەدیۍ زینانیەی سیاسیە و چالاکەو کرێکارا جە زینانو رەشتی، وەڵاش کەرڎۆ کە رۆو پەنج شەممەی ١٩و کانونو یووەمی جە لقو دووۍ دادگاو شۆڕشی جە رەشت ئەرەنیشتەی تایبەت بە دۆسیەو ئا زینانییە سیاسیۍ ملۆڕاوە، بەڵام ئەرەنیشتەیەکە بە بێ ئاماڎەبیەی شەریفە محەمەدیۍ ملۆڕاوە.

ئانەیچ وزیان ڕووە، سەرەڕاو ئانەی شەریفە محەمەدییە و پارێزنەراش بە ڕسمی و بە داواکاری نویسیا داواشا کەرڎێنە ئاماڎۍ ئەرەنیشتەکەی با، بەڵام دادگا ڕەتشکەردەنۆ. چا ڕوۆ هەڵمەتەو وەرگیری جە شەریفە محەمەدیۍ ئاماڎەنەبیەی ئا زینانیە سیاسیۍ جە دادگانە پېسە نادادپەروەریێوە زەقی و ئاشکرای بە نامۍ کەردەن.

هەڵمەتەو وەرگیری جە شەریفە محەمەدیۍ رۆو ١٣و تشرینو دووەمو ٢٠٢٤ ئەرەیاۋنابێش، کە دۆسیەو ئا زینانیە سیاسیۍ جە دادوەری تاتەیۆ پەی دادوەری کوڕی فاڕیانۆ، واتە ئا دادوەرەی کە قەرارا سەرجە نۆ لوایۆپۆرە بە دۆسیەو شەریفە محەمەدیێرە بکەرۆ کوڕو دادوەر ئەحمەد دەروێس گوفتارین کە سزاو جە قەنارەدایش پەی ئا زینانیۍ بەرکەردەبۍ.

ئا سزۍ جە ١٢و ئۆکتۆبەرینە هۆرشێوێبێوە و ئاراسەو لقو هامتەریبی دادگای کریابێوە بە مەبەسو لوایۆپۆرەی.

شەریفە محەمەدییە ٤و کانونو یووەمو ٢٠٢٣ جە یانەکەو ۋێشەنە جە رەشت جە لایەنو هێزەکاو ئیتلاعاتیوە باڵبەسەکریا و تۆمەتو ئەندامبیەیش جە "گروپە ۋەرهەڵسکارەکانە" دریابۍ پاڵ. دماتەر جە رەشتۆ فاڕیێبێوە پەی سنەی و دماو یەرۍ مانگا مەنەیۆ جە زینانی تاکەکەسینە سەرجە نۆ فاڕیێبێوە پەی زینانو لاکاو رەشتی.

جە ٨و حوزەیرانو ئێشاڵی ئا چالاکە کرێکارۍ بە پەشت بینای بە سیناریۆیۍ تاشیایرەو ئیتلاعاتی و بە بێ وستەی ڕووەو حیچ بەڵگێوە بە تۆمەتو "یاخیبیەی" سزاو جە قەنارەدایش پەی بڕیابێوە.