سۊسن بە واتەی "من نەتاوام ئا وەختە وێم دەو دەسوو مەرڎەیۊ و ژیوای بە دوژمنی بەخشوو" باسوو گەشتەکەو وێش جە دیمەشقۊ تا دێرک کەرد، چاوە تا روگۊباش ویر مەکەرۊ و جۊشوخرۊشوو وێش پەی شۊڕشی جەدەس مەدۊ.

وەختۍ بناغەو شۊڕشوو وەرنیشتی منریۊ، سۊسن ئەحمەدە چەنی بنەیانەکەیش دیمەشقنە بۍ. سۊسنە چەنی ئەرەمەرزنای یۊبییەی وەنیاراو کوردستانی (یەخەکە) ئا قۊناغە بە جۊشوخرۊشۊ چەمداری کەرۊ. وەختۍ چەنی دەسپەنەکەرڎەی شۊڕشوو وەرنیشتی دۊخوو دیمەشقی پەی کورڎا خاس نەبۍ، چەنی بنەیانەکەیش گێڵاوە پەی وەرنیشتی. سۊسنە بنەیانەکەیش گێڵنۊوە پەی دێرکی و دلۍ جەنگی و مدرامانینە مەنۊوە. بنەیانەو سۊسنۍ قەرار مدا، کە بەرەو پانیشتوو کوردستانی کۊچ کەرا. سۊسنە ئا قەرارەیە بە بێمانا وینۊ. ئادە بە تەمەنێوە گەنجۊ هەوڵۍ مدۊ بنەیانەکەیش قایل کەرۊ، کە قەراروو جیائاستەی وەڵاتی قەرارێوە غەڵەتا، وەلۍ بنەیانەکەش مەلا چێروو باری. سۊسنە بەینوو دووەڕاو درێژدای بە شۊڕشی و بنەیانەکەیش کە گەرەکشانە بلا پانیشتوو کوردستانی مەناوە. سۊسنە مەتاوۊ بنەیانەکەیش ڕازی کەرۊ و ڕاو پانیشتی ئیتر ڕێوە تەسکە و تاریکەنە. جە دێرکۊ دەس پەنە کەرا بەرەو پانیشتوو کوردستانی گنا ڕا. سۊسنە کە خەریکەنە هومیدەکاش جەدەس مدۊ، ڕێوە وێزۊوە بنەیانەکەیش مەشغووڵ کەرۊ و هەڵای ئاندە جە دێرکیوە دوورۍ نەکەوتێنێوە، گێڵۊوە و ملۊ ڕیزوو یەپەژەیۊ.

ئیتر جەنگەوانەو وەرنیشتینە

سۊسنە کە دماو پەروەرڎەی بۊ جەنگەوانەو یەپەژەی ئیتر بۊ بە جەنگەوانەو خاکوو وەرنیشتی، کە پەی چندین ساڵا جەنەش دوورە بۍ. سۊسنە کە بەشداریی هەڵمەتەو چلئاغا و تل حەمیسیش کەرڎەن ماچۊ: "هەڵمەتەو تل تەمر کە جە ڕاو هەڵمەتەوی تل حەمیسیوە پەی وەڵۍ لوۍ، دەسش پەنە کەرد. گرد ڕوۍ جەنگ بۍ، گرد ڕوۍ دەیان چەتۍ کوشیێنۍ و بە دەیان کەسۍ ڕزگارۍ کریێنۍ. جارێوە دوژمن گەرەکش بۍ هجووم کەرۊ سەروو تەپوو روگۊبا و دەگاو تل ناسری. جەنگ ڕووەش دا، ژمارەو هامڕایا تەپەکەوە فرە کەم، ئشیا وێما یاونۍ تەپەکە. بە ماوێوە کوڵ دوژمن گردوو ڕایەکاش کۊنترۊڵۍ کەرڎۍ کە پەی تەپەکەی لوێنۍ. چەنی ئانەیچە ئشیا ئێمە سەرۍ کەوتێنمۍ و هامڕێما جا تەوقدایە نەجات دێنۍ. ئاخرۊ جۊگەڵیوەما دیۊ کە لوۍ دەگێوە تەرە و دەوروو تەپەکەیرە سووڕیێوە، جۊگەلەکێرە تاواما بلمۍ ڕۊگبا و وێما بیاونمۍ هامڕایاما. 

یاوۊنە کە چێوۍ ڕووە مدۊ

وەختۍ یاوایمۍ تەپەکە یاگۍ وێما گێرتەما و جەنگ پەی ماوێوە بەرڎەوام بی. ئاخرۊ  دوژمن ناچار بی کێشیۊوە. چەنی کێشیایۊ دوژمنی تەپەکە بە تانک و تۊپۍ بۊردومان کریا. سەرڎایچ زیاتەر بۍ، تەنیا یەک دەسکێشم پەنە بۍ و ئەوی تەرشام گوم کەرڎەبۍ. جارجار کەرێناش دەسی ڕاس و جارجاریچ دەسی چەپم. زانێنا چێوۍ ڕووە مدۊ، وەلۍ نەتاوێنا بیاووشنە. پەوکای ویرۊکەرڎەێوە قووڵەنە بێنا. فرەش پەنە نەشی بە دەنگوو هاوەنێوە هاگا ئامانیوە و هەستم کەرد، کە ئێشێوە قۊڵمنە هەن. وەختێوە دیانی پەی قۊڵیم، میەو پۊسێوە تەنک شانە و نێرەژنمش پێوە بەستێنێوە و خەریکا کنیۊوە. 

مشۊم وێم نەڎەو دەسوو دوژمنیوە

وەختۍ قۊڵم دیم زانام کنیۊوە. من چەنی جەنگ کەروو، چەنی چەک ورگێروو و میل بارووە، وەختۍ ویرێم کەرڎێوە بە وێمم وات، "سۊسن، مشۊم قەوەتە بی و وێت نەدەی دەسۊ" ونێوە فرێم چەنە لوێبۍ، ورڎە ورڎە ویەرای ویەرێناوە. ئامانجۍ فرێم بێنۍ بارووشا دی، وەروو ئانەیە وێگێری کەرێنا، نەکریۍ وێم دەو دەسوو دوژمنیوە و ژیوایشا پەنە بەخشوو".

س.ز