شارو ئیدری پېسە نموونېۋە گولانەی جە تورکیا. ئیدرەنە گەلوو کورڎی، تورکی و ئازەری پۍ سەڎان ساڵان پێوەرە مژیۋا، هەدەپە جە دماین ھورچنیەینە جە ئیدر سەرکۊتەیش بە دەسئارڎ. کاندیدەکۍ پارتو چەپی سەوزی گەرەکشانە جە ھورچنیەکاو ١٤و ئایارینە، بە سەرکۊتەیۍ تازە نوێنەرایەتی ئیدری جە پەرلەمانەنە کەرا.

کاندیدو یوۋەمو لیستو پارتو چەپی سەوزی پۍ پەرلەمانی جە ئیدر مامۊسا "یڵماز هون" ئەرەیاۋناش؛ ئامانجی ئەساسیشا جە لوۋای پۍ پەرلەمانی چارەسەرکەرڎەو کێشەو کورڎین جە ڕاو گفتوگۊیۊ و ۋاتش، "جە ئیدرەنە بۍ ھەرمانی، پیسکەرڎەو ژیوگەی و شارەوانیۍ پۆخڵەوات بیێنۍ بە کێشەو ئەساسی خەڵکو ئیدیری. دەروازەو بازرگانی مەرزی وزیانەرە. جوۋانەکېما بەمەڵامەتو بېھەرمانیۊ ڕوۋە مکەرا جبەرو ۋڵاتی و بانۍ بە پەناھەندۍ. شارەکەما فرەکەلتووری، فرەشناسنامەیی و فرە باوەڕیی ۋێش پارێزنان. ئەشۊ ئی سامان و دۊڵەمەنڎییە پارێزیۊنە و ۋەڵۍ وزیۊ.

ئێمە جە پەرلەمانەنە پۍ مافەکا گەلبیەو گەلوو کورڎی، مافەکا مرۊڤی و دژوو دۊشتەی و بەتاڵانبەرڎەو ڕەنجو خەڵکی، پۍ مافی و ئازاڎییەکا، جە دژوو کاولکەرڎەو سروشتی و وڕناو جوۋانا بیمۍ بە ئۊپۊزسیونێۋە چالاک".

یڵماز هون کېن؟

"مامۊسا یڵماز هون" بەرشیەو زانکۊو یوزونجویلو شارو وانیا. ماوەو ١٦ ساڵا ئیدرەنە مامۊسا بیەن. چېرو چەترەو ئەیتم – سەنینە ھەرمانەو سەندیکای کەرۍ. نزیک بە ١٠ ساڵا سەرۊکایەتی ئەیتم – سەنیش کەرڎ جە ئیدرەنە. جە ساڵەو ٢٠١٧ینە بە قەرارو باری نائاسایی مەنسەبەکەش ۋنە قەڎەغە کریا و جە ھەرمانەو مامۊسایی دووروزیاۋە.

ھ.ش