جەچوارچێوەو کەمپینوو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی'، جە زانشتگەو شێفیڵدوو بەریتانیای کۆنفڕانسێوە رۆنامەوانی سازکریا و چنەشەنە داواو ئازاڎیی جەسەیی رابەروو گەلوو کوردی عەبدوڵا ئۆجالانی کریا.
چالاکیەکۍ هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی'کە جە مانگەو تشرینوو یووەم و ساڵەی ویەردێوە جە ٧٤ ناوەنڎۍ جەهانیوە دەسشپنەکەرد، تا ئیسە بە شێوە و چالاکی جیاجیا جە سەرانسەروو جەهانینە بەردەواما.
چا چوارچێوەنە بە سەرمەشقایەتی خۊنکارا زانشتگەو شێفیڵدی و دۆسا کوردی و ئینەرناسیۆنالی، ڕۊو شەممەی جە زانشتگەو شێفیڵدینە جە بەریتانیا بە کۆنفرانسێوە رۆنامەوانی داواو ئازاڎیی جەسەیی رابەروو گەلوو کوردی عەبدوڵا ئۆجالانی کریا .
جە کۆنفڕانسە رۆنامەوانیەکەنە خۊنکارا کوردی و ئینتر ناسیۆناڵیستی باسشا جە کەسایەتی، کۊشیای، ئەندێشە و پاڕادایموو رابەر ئۆجالانی کەرد و هۊرسەنگنای پۍ کتێبەکاش کریا.
جە قسۍ بەشدارانە ئاماژە پانەی کریا کە ئەندێشە و پاڕادایموو عەبدوڵا ئۆجالانی چ کاریگەریێوەش جە ئاشتی و ئاینڎەو مرۆڤایەتینە هەن.
حەرپاسە جەخت کریاوە کە عەبدوڵا ئۆجالان تەنیا رابەروو گەلوو کوردی نییا، بەڵکم سەرمەشق و رابەرێوە جەهانییا و پێویسا نەک هەر کورد، بەڵکم گرڎوو مرۆڤایەتی خۊتانکەردەیش ۋنەکەرا و چا چوارچێوەیچەنە ئەندێشەکێش جەبارەو ئازاڎیی ژەنێوە زیاتەر سەرنجشا وزیا سەر، کە جە ئیسەنە بە دنیارە وەڵابیەنۆ.
جە دمادمایی کۊنفرانسەکەینە خۊنکارەکۍ داواو ئازاڎیی جەسەیی رابەروو گەلوو کوردی عەبدوڵا ئۆجالانیشا کەرد.
