زینڎانوو ئێڤینوو تارانینە ٦١ ژەنۍ زینڎانیۍ بەمەبەسوو شەرمەزارکەرڎەی قەنارەدای محەمەد قوبادلوی و فەرهاد سەلیمی دەسشا بە مانگێرتەی جە وارڎەی کەرد. پەی پەشتیوانی چا ژەنا زەینەب جەلالیانەیچ مانیش جە وارڎەی گێرت.
٢٣ی کانونوو دووەمینە دووۍ زینڎانیۍ بە نامەکاو محەمەد قوبادلوی و فەرهاد سەلیمی زینڎانوو قزڵحیساروو کەرەجینە دریۍ قەنارە.
دژوو بەیاگەیاونای سزاو قەنارەدای ئا دووە زینڎانییە سیاسییا، ٦١ ژەنۍ زینڎانیۍ زینڎانوو ئێڤینینە جە ڕاو تەلەفونیوە بنەیانەکێشا هاگادارۍ کەردێوە، کە ٢٥ کانوونوو دووەمیوە دەس بە مانگێرتەی کەرا.
دماو ئەرەیاونای ئا قەرارەو ژەنە زینڎانییا، ژمارێوە فرە هونەرمەندۍ و سیاسەتمەدارۍ پەشتیوانیی وێشا پەی ئا چالاکییەیە بەروست.
زەینەب جەلالیانەیچ مانش جە وارڎەی گێرتەن
تۆڕەو مافەکاو ئینسانوو کورڎسانی وەڵاش کەردۆ زینڎانییەی سیاسییەو کوردی زەینەب جەلالیانە، کە زینڎانوو یەزدینە زینڎانییەنە، بە مەبەسوو پەشتیوانی چا ٦١ ژەنا کە پەی شەرمەزارکەرڎەی سزاو قەنارەدای مانشا جە وارڎەی گێرتەن، دەسش بە مانگێرتەی کەرڎەن.
قەومێوە زەینەب جەلالیانۍ بە تۆڕەو مافەکاو ئینسانوو کورڎسانیش واتەن، "زەینەب جەلالیانە کە زینڎانوو یەزدینە زینڎانییە کریێنە و ئینا چێروو گۆشەگیریێوە تندینە و ڕاگێری جە دیدار و پەیوەندییە تەلەفونییەکاش کریۆ، سەرباروو گردوو ئانیشا زانانما پەی پەشتیوانی وەنەو ژەنە مانگێرتا زینڎانوو ئێڤینی و دژوو سزاو قەنارەدای دەسش بە مانگێرتەی کەرڎەن".
