ئەحمەڎ یەڵماز براو زینڎانیی سیاسی وەفا یەڵمازی ئانەش ئاشکراکەرد، کە براکەش جە زینڎانوو کالکاندەرەیۆ پۍ زینڎانوو جۆروو (ئێس)ی جە سامسون دووروزیانۆ واتش: "وەروودەم و بەرەو زینڎانەکەئنە، گەرەکشا بیەن بە رووتی وشکناش، وەرو ئانەی رەڎش کەردەنۆ ئەشکەنجەشا دان''.
پۍ لابەردەی گۆشەگیری ئیمراڵی، جە چوارچێوەو هەڵمەتەو 'ئازاڎیی پۍ ئۆجالانی، چارەسەری سیاسی پۍ پرسوو کوردی' مانگرتەی جە واردەی بە نۆبەت، بەردەواما.
جە زینڎانەکانە ڕووانە باس جە ئەشکەنجە و دووروستەیۆ زینڎانەکا کریۆ، یۆ چا زینڎانایچە زینڎانوو کالکاندەرەو هەرێموو ریزەیا، کە بەشێوێوە کتوپڕ زینڎانیی سیاسی وەفا یەلمازشا جە وەختوو مانگرتەی جە واردەینە، فاڕانۆ پۍ زینڎانوو کاڤاکی سەمسونی.
ئەحمەڎ یەڵماز براو وەفا یەڵمازی جە بارەو ئا مژاریۆ قسێش پۍ ئاژانسوو هەواڵوو فوراتی کەردۍ و واتش، "بە بۍ ئانەی ئێمە ئاگاڎار کریەیمېوە بە کتوپڕی براکەمشا دووروستەنۆ".
ڕۊشنشکەردۆ، کە براکەش چا وەختەنە کە جە مانگرتەینە بیەن دووروزیانۆ و جە وەختوو فاڕایۊیشەنە جە زینڎانوو جۆروو ئێڵینە جە کالکاندەرەو ریزەینە پۍ زینڎانوو جۆروو ئێسی سامسۆنی، پاسەوانەکۍ گەرەکشابیەن بە رووتی وشکناش، بەڵام ئاڎ ڕڎش کەردەنۆ ۋەروو ئانەی پاسەوانەکۍ دانشا ۋنە و ئەشکەنجەشا کەردەن".
ئاشکرایچش کەرد، کە براکەش جە ڕاو تەلەفونیوە پنەش واتەن، کە ئانڎە بە کتوپڕی فاڕانشاوە کە تەنانەڎ فریا نەکۊتەن کەلوپەلەکاش چنی ۋێش بەرۆ و تا ئیسەیچ کەلوپەلەکێش ئینۍ زینڎانوو ریزەینە.
باسش چانەیچ کەرد، تەماموو ئا زینڎانیا کە جە زینڎانوو ریزەینە جە مانگرتەینە بێنۍ، پاسەوانەکۍ هۊرشا کوان سەروو ژورەکاشا و دوورێشا وستێنێوە پۍ زینڎانەکا تەری.
جە دما دمایچەنە ئەحمەڎ یەڵماز براو وەفا یەڵمازی ئانەش وست ڕووە، کە فشارەکۍ سەروو زینڎانیا سیاسی چڕۍ بیێنۍ و دژوو ئانەی ڕای یاساییە گێرانە وەر و حەجگیز ئا فشارا سەروو زینڎانیا سیاسی قبوڵ مەکەرا.
