زینڎانیەی سیاسیە زەینەب جەلالیانە کە ١٧ ساڵێن ئینا زینڎانەکا ئێرانینە و تەنیا ژەنە زینڎانیەی سیاسیەنە چا وڵاتەنە کە سزاو زینڎانی هەتاهەتاییش سەر بۆ و بەردەوام هەڕەشۍ قەنارەدایش سەر بیەن، جە زینڎانوو یەزدیوە بۆنەو ٨و مارسیۆ چنی نامەکەیش تازەتەرین وێنەو ۋێچش کیاستەن.

زەینەب جەلالیانە جە نامەکەشەنە داوا جە گەلا ئازاڎیوازی و بەتایبەتی ژەنا ئازاڎیوازی کەرۆ، کە جە گرڎ یاگۍ دنیێنە دەنگشا پەی داواکەردەی ئازاڎیی رابەروو گەلوو کوردی عەبدوڵا ئۆجالانی بەرز کەراوە.

نامەکەو زەینەب جەلالیانۍ پی جۆرەنە:

پەیاموو هەڤاڵ زەینەب جەلالیانۍ

 سەرەتا ڕۊو جەهانی ٨و مارسی جە گرڎوو ژەنا جەهانی و گرڎوو مرۆڤایەتی مبارەک کەروو.

 ئێساڵیچ ٨و مارسی و ڕووان و نەورۆزی و وەهاری ئامێوە. بەڵام چی ٨و مارسینە ژەنا و فرەو کەسی بەمەڵامەتوو نادادپەروەری، دڕندەیی و بە مەڵامەتوو ئامانجەکاشاوە قوربانی فرەشا دان. ئاڎۍ ئیتر بەشداری مەراسیمەکا ٨و مارسی مەکەرا، یاڎشا ئیلهامبەخشا و جە یاڎەوەرینە هەمیشە مەناوە و قەد مەمرا. کەسانێوە فرۍ بە مەڵامەتوو نادادپەروەری و ستەمیوە ئینۍ زینڎانەکانە.  جەمۍ ژەنۍ فرۍ جە وەختێنە ئشیۍ بەشداری یاڎ و بۆنەکاشا کەردەبیۍ داخەم مەشۆ بە حوکموو دادگاکا ئینۍ پەشتەو مێڵەکا زینڎانینە. چێگۆ مبارەکبایی ٨و مارسیشا ۋنەکەروو. ئێمەی ژەنا زینڎانیکریۍ جە هەر شۊنێنە بیمۍ ٨و مارسی بەڕێزدارییوە گێرمۍ ئامێز و حۊڵمڎەیمۍ جەهانێوە یەکسان وەش کەرمۍ پۍ ئانەی گرڎ ڕووۍ پێسە ٨و مارسی ڕۊو ژەنا بۆ نەک تەنیا ڕووۍ.  پی جۊرە تووشوو سەختی و زەحمەتی بیمۍ، بە حەسرەتوو ئانەی چنی ژەنە کۊششکارەکا تەری و گرڎوو ئینسانە ئازاڎیوازەکا پەشتەو مێڵەو بەرەو زینڎانەکاوە مەنمێوە، بەڵام بەردەوامۍ بیمۍ تا سەرکۊتەی بەدەس مۍ.

 ٨و مارسوو ئێساڵی مەعنای تایبەتیش هەن.  ٨و مارسوو پاری دماو ئاخێزوو "ژەنی، ژیۋای، ئازاڎیی" بۍ و دماو ئانەی هجوومی فرە جە دژوو ژەنا ئەنجامدریا. بە غاز و مادەی کیمیاۋیی هجومشا کریا سەر و بە گێرتەی و زینڎانیکەردەیشا داواشا ۋنەکەردۍ دەس جە داواکارییەکاشا هۊرگێرا. جە ۋەرنیشتەنە کە ژەنی بنەمای سەرەکی جەنگوو  داعشی تاریک پەرەسی بێنۍ و بیۍ بە ئامانجوو هجوومە تایبەتەکا، کە هێزە میان دەوڵەتییەکێچ پاڵپەشتیش چنە کەرێنۍ، بەڵام هەم جە ۋەرکەوتوو کوردسانی و هەم جە ئێرانەنە و جە گرڎوو جەهانینە ژەنی بە ئیراڎێوە بەرزۆ ۋێڕاگریشا کەرد و بەرەو ڕۊشنای و یەکسانی ملا. حەرپاسە جەمۍ جە ئازاڎییوازا دریۍ قەنارە و بڕێشا بە ساڵانێوە فرە سزاو زینڎانیکەردەیشا سەرەرە سەپیا و حیچ کام چا کەسا ئاماڎۍ نەبێنۍ جە ۋەرا ۋەروو ستەمی و چەوەسنایۊینە تەسلیمیەت قبووڵ کەرا. پی بۆنۆ ​​٨و مارسوو ئێساڵی گرنگیێوە تایبەتش هەن، چونکی ساڵێوە پەڕ جە مدرامانی و ۋێڕاگریش ئینا چنی.

ڕابەرمان عەبدوڵا ئۆجالان خوڵقنەروو فکروو یۊگێرتەیی "ژەنۍ، ژیۋای، ئازاڎیی"ن، جە پیلانێوە میان نەتەوەیینە بڕفانیا و ٢٥ ساڵێن ئینا زینڎانەنە.  کەمپینێوە پۍ ئازاڎیی جەسڎەییش ئەرەیاۋییا کە ڕووانە کەس، گروپ و نەتەوە جیاوازەکۍ پاڵپەشتیش کەرا. سەرەڕاو پاڵپەشتیکەردەی و بەشداریکەردەی چی هەڵمەتێنە، داواکارەنا گرڎوو گەلا ئازاڎیوازی و بەتایبەت ژەنا ئازاڎیوازی هاموەخت پەشتیوانی سەرۆک ئاپۆی کەرا و داواو ئازاڎیی بەڕێزیشا کەرا. بێ گومان ڕابەر ئاپۆ نوێنەروو ئازاڎییا زینڎانەنە. ماوەو ۲٥ساڵان جە ۋەرا ۋەروو تورکیای و ناتۆینە مدرامان و ۋێڕاگری کەرۆ، نوێنەروو نوێنەرایەتی فکر و ڕامانێوە گەردوونی کەرۆ پۊکەی لایەق بە پەشتیوانیین. ئی مدرامانەو ڕابەر ئاپۆی بیەن بە مەڵامەتوو بانگەوازوو ئازاڎیی زینڎانیا دلۍ زینڎانی. گرڎ ئازاڎیوازێ لایەقوو ئانەین بە ئازاڎیی بژیۋۆ، پۊکەی پاڵپەشتیکەردەیشا هەڵوێستێوە مرۆییا. بە هیواو ئانەی پێوەرە چنی یۊترینی ٨و مارسی پیرۆز کەرمۍ.

 دیسان ئامای ٨و مارسی جە ژەنا کۊششکاری و گرڎوو گەلا مبارەک کەروو، پێسە وەڵتەر واتم: جە ژیۋایمەنە حۊڵمدان پۍ ئانەی ۋنەو ئازاڎیوازا بە زایە نەلۆ بەردەوامە بوو جە کۊشیای.

 ٨و مارسوو گردیتا مبارەک بۆ

 بژیۋۆ ژەنی ئازاڎە

 ژەنی، ژیۋای، ئازاڎیی

٠٥/ ٠٣/ ٢٠٢٤

زینب جەلالیان- زینڎانوو یەزدی".