٥ پەیمانگەی کوردی لە پەیامێکیدا سەرنجیان خستەسەر ئەنجامەکانی ئەو ئاڵۆزییە، کە لە باشووری کوردستان روویدا و رایانگەیاند، تەنها کورد زیانی پێدەگات و داوای ئارامییان لە ناوچەکە کرد.
پەیمانگە کوردییەکان لە دەرەوەی وڵات لەبارەی ئاڵۆزییەکانی باشووری کوردستانەوە پەیامێکیان بۆ هێزە کوردستانییەکان بڵاوکردەوە.
لە پەیامی ئەو پەیمانگە کوردییانەدا هاتووە، "ئێمە چاوەڕوانی و ئومێدی ئەوەمان هەیە، کە ئێوە لەم رۆژە هەستیارانەدا هەستیارانە دەجوڵێنەوە و هیچ بڕیارێک بۆ شەڕ نادەن. ئێمە دەزانین بڕیارێکی نابەجێ دەتوانێت دەستکەوتەکانی سەد ساڵەمان لە باشوور، رۆژئاوا، رۆژهەڵات و باکووری کوردستان تێکبدات. هەر خۆی مێژووی گەلەکەمان پڕە لە خوێن، بڕین، مردن و کوشتنی یەکتر. بۆیە ئێمە بە نیگەرانییەوە سەیری رووداوەکانی ئەم سەردەمە دەکەین.
وەک دەزانرێت دوو هێزی ئێمە دیسانەوە رووبەڕووی یەکتر وەستانەتەوە. زۆرێک لە خێرنەخوازەکان تاوەکو ئەو شوێنەی لە دەستیان دێت دەیانەوێت رۆژێک زووتر کورد یەکتر بکوژن. ئەگەر ئەو شەڕە رووبدات دەبێت ئەوە بزانرێت، کە هیچ کەسێک جگە لە نەیاران و خێرنەخوازانی کورد سەر ناکەوێت. لە ئەنجامی ئەو شەڕەدا جگە لە کورد هیچ کەسێکی تر ناگری، هیچ کەسێکی تر ئازاری پێناگات و هیچ کەسێکی تر نامرێت. ئێمە ئەو شەڕە بە "خۆکوژی، کوردکوژری، کورستانکوژی" ناو دەبەین. بۆیە ئەگەر کەسانێک نایانەوێت ببنە لایەنگری خۆکوژی و کوردکوژی با دەنگی برایەتی و ئاشتی بەرز بکەنەوە.
ئێمە، هەموومان ئومێدی ئەوەمان لە هێزە سیاسی و رێکخراوە رۆشنبیرییەکان هەیە، دەنگی خۆیان یەکبخەن و رێگا نەدەن هەرگیز ئەو شتە رووبدات، کە ئێمە هەرگیز نامانەوێت رووبدات. ئێمە ئومێد دەکەین ئەو ئاڵۆزییە وەرسوڕێت بۆ ئاشتیی ناوخۆیی. ئێمە باش دەزانین ئەوەى کوردستان ئازاد و ئارام دەکات، ئاشتیی نێوان هێزە سیاسییەکانە.
پەیمانگەی کوردی لە ئیستەنبول
پەیمانگەی کوردی لە بروکسل
پەیمانگەی کوردی لە ئەڵمانیا
پەیمانگەی کوردی لە سویسرا
دەستەى هەڵسەنگاندنی ئەدەب و وێژە لە پەیمانگەی کوردیی ستۆکهۆلم
دەستی شێعر لە پەیمانگەی کوردیی ستۆکهۆلم".
ژ.ت
