ئەنجومەنی ژنانی هەدەپە بۆ دیاریکردنی هێڵی سیاسی سەردەمی نوێ لە ناوەندی گشتی ئەنجومەنەکە کۆبونەوە. بەرلە کۆبونەوەکە ئایشە ئاجار باشاران گوتەبێژی ئەنجومەنی ژنانی هەدەپە قسەی کرد.

باشاران رایگەیاند، هاوپەیمانی پیاوسالاری ئاکەپە و مەهەپە کە بە شەڕ و گێژاو دەیەوێت لەسەر پێ بمێنێتەوە، هەموو رۆژێک لەدژی ژنان و کۆمەڵگا تاوان ئەنجام دەدات و ئاماژەی بە دانپێدانانەکانی سەدات پەکەر سەرچەتەی تورک کرد و وتی، "جارێکی دیکە بینرا کە ساڵەکانی ٩٠ تیرۆرێکی قێزەون بە چ شێوەیەک هەبووە و تا ئێستاش داوا دەکرێت کە ئەو قێزەونیە ئاشکرا بکرێت."

باشاران بەبیریهێنایەوە کە دوێنێ  ٢٧مین ساڵیادی کوشتنی ساڤاش بوڵدان و هاورێکانی بوو و وتی، "ئێمە بەڕێزەوە یادیان دەکەینەوە، ئێمە هەموو کاتێک هەوڵمانداوە کە پەیوەندی نێوان دەوڵەت و مافیا ئاشکرا بکەین و تاوەکو ئەنجامێک بەدەست نەهێنین بەردەوامی بە تێکۆشانەکەمان دەدەین."

باشاران تێکۆشانی دایکانی شەممە، دایکانی ئاشتی، دایکانی پرسوس و دایکانی کۆمەڵکوژی ئەنقەرەی بەبیرهێنایەوە و وتی، "لەگەڵ دایکان لەدژی ئەو سیاسەتە قێزەونانە تێکۆشانمان کرد و داوای دادپەروەریمان کرد." باشاران ئاماژەی بەوەشکرد کە دەسەڵاتی تورک بۆ سیاسەتە قێزەونەکانی دەیەوێت ژنان بیدەنگ بکات و دیارە کە چۆن پەیوەندی لەگەڵ چەتە و مافیاکان هەیە و دیارە کە میکانیزمی سیاسەت – دەوڵەت – دادوەری چۆن ڕزیوە.

باشاران باسی دانپێدانانەکانی سەدات پەکەر کرد و بەم شێوەیە بەردەوامی بە قسەکانیدا، "بە دانپێدانانەکانی سەدات پەکەر سیاسەتی قێزەونی هاوپەیمانی ئاکەپە و مەهەپە لە دەرەوە و ناوخۆدا تەشهیر بوو. ئاشکرا بوو کە سەروەتی گەلیان چۆن بۆ شەڕ و سەرمایەدارەکان بەکارهێناوە، هەروەها باشتر ئاشکرا بوو کە لە بناغەی شەڕ و گێژاودا دوژمنایەتی کورد و ژنان هەیە."

باشاران دەشڵێت، "لەدژی ئەو تاوانانە بێدەنگی بەواتای قبوڵکردنی کوشتنە بکوژنادیارەکان، بە واتای قبوڵکردنی کۆمەڵکوژی گەزی، پرسوس و ئەنقەرە دێت."

باشاران ئەوەی خستەڕوو، "ژنان رێگە نادەن رژێمی سەروەری پیاوسالاری دروست ببیت. بە فشار و دەستگیرکردن ناتوانن ژنان بێدەنگ بکەن."

باشاران لەکۆتایی قسەکانیدا ئاماژەی بە گۆشەگیری سەر عەبدوڵلا ئۆجالان رێبەری گەلی کورد کرد و ئاماژەی بەوەدا، گۆشەگیری لە هەموو تورکیا و باکوری کوردستان بووەدە بە مۆدێلی بەڕێوەبردن و وتی، "سیاسەتی گۆشەگیری کە لە ئیمڕالی دەستیپێکرد و لە هەموو زیندانەکاندا بڵاوبووەوە، سەرەتا لەسەر ژنان و لە سەر هەموو کۆمەڵگا دانراوە. لەدژی دەوڵەکانی دەسەڵات کە دەیەوێت قەیرانەکەی بە شەڕ بەردەوامی پێبدات، ئێمە وەک ژن بۆ ئاشتیەکی ئابرۆمەندانە و شکاندنی گۆشەگیری تێدەکۆشین."

ف.ق