خزمی زیندانیان بۆ ئازادی جەستەیی ڕێبەری گەلی کورد عەبدوڵا ئۆجالان و چارەسەری سیاسی پرسی کورد درێژە بە ئێشکگری دادپەروەری دەدەن. چالاکییەکە لە شارەکانی ئامەد و مێردین و ئێلح بەردەوامە. لە چالاکییەکاندا درووشمی "بژی سەرۆک ئاپۆ" و "بێ سەرۆک ژیان نابێ" و "بژی بەرخۆدانی زیندان" و "ژن، ژیان، ئازادی" بەرزکرایەوە، دایکان یەلەکیان پۆشی و لەسەری نوسرابوو "گۆشەگیری تاوانێکی دژی مرۆڤایەتییە".

لە چالاکییەکەی ئامەد، سوڵحیە ساروهان داوای کرد گوێ لە داوای زیندانیان بکرێت، گوتی: "با گۆشەگیری سەر بەڕێز عەبدوڵا ئۆجالان دەمودەست هەڵبگیرێت و بتوانێت لەگەڵ بنەماڵە و پارێزەرەکانی کۆببێتەوە".

هاوکات لە چالاکییەکەی مێردین یەک لە خزمی زیندانیان فەتاح تەکین گوتی: "ئێمە بۆ ئازادی عەبدوڵا ئۆجالان لە ئێشکگریداین. ئەمە ٢٦ ساڵە لە گۆشەگیرییەکی تونددایە. لە کەسێتی عەبدوڵا ئۆجالاندا گەلی کورد و گەلانی ڕۆژهەڵاتی ناوین گۆشەگیر دەکرێت... پێویستە ئەم دەوڵەت و حکومەتە لە هەڵەکانی بگەڕێتەوە. پێویستە گۆشەگیری سەر بەڕێز عەبدوڵا ئۆجالان هەڵبگیرێت و ئازاد ببێت. ئێمە دەمانەوێت سەرۆکمان ئازاد ببێت. تا ئەو ئازاد نەێت، گەلەکەمان و ڕۆڵەکانمان و گەلانی ڕۆژهەڵاتی ناوینیش ناتوانن ئازاد ببن".