دەنگدان لە دەرەوەی توركيا ئەمڕۆ ٢٧ی نیسان دەستیپێکردووە و تاوەکو ٩ی ئایار بەردەوام دەبێت. هەروەها دەنگدان لە دەروازە سنوورییەکان تا ١٤ ی ئایار بەردەوام دەبێت.

نزیکەی ٣ ملیۆن و ٥٠٠ هەزار دەنگدەر لە دەرەوەی تورکیا تۆمارکراون

بەپێی زانیارییەکانی کۆمسیۆنی باڵای هەڵبژاردنەکان، ٤ هەزار و ٦٧١ سندوقی دەنگدان لە دەرەوەی وڵات و لە خاڵە سنووری و گومرکەکاندا بۆ دەنگدان دانراون.

هەروەها لە دەرەوەی تورکیا ٣ ملیۆن و ٤١٦ ههازار و ٩٨ دەنگدەر ناوی خۆیان تۆمارکردووە. ژمارەی ئەو کەسانەی بۆ یەکەم جار لە دەرەوەی وڵات دەنگ دەدەن ٢٧٧ هەزار و ٤٦٤ دەنگدەرن.

دەنگدان لە نوێنەرایەتییەکانی دەرەوە بەپێی کاتی دیاریکراو و لە ڕۆژانی هەفتەدا بە پێی کاتی ناوچەیی لە کاتژمێر ٠٩:٠٠ تاوەکو ٢١:٠٠ و  لە باڵیۆزخانەکانیش لە کاتژمێر ٠٩:٠٠ بۆ ١٨:٠٠ پرۆسەی دەنگدان ئەنجام دەدرێت.

زۆرترین دەنگدەر لە ئەڵمانیادایە

بەپێی ئامارەکانی کۆمسیۆنی باڵای هەڵبژاردنەکان، زۆرترین دەنگدەر لە دەرەوەی تورکیا لە ئەڵمانیادایە.. لە ئەڵمانیا یەک ملیۆن و ٥٠١ هەزار و ١٥٢ دەنگدەری تورکیا هەیە. لە فەڕەنسا ٣٩٧ هەزار و ٨٦ دەنگدەر و لە هۆڵەندا ٢٨٦ هەزار و ٧٥٣ دەنگدەر هەیە.

دەنگدان لە بەرلین دەستیپێکرد

سەر لەبەیانیی ئەمڕۆ لە بەرلینی پایتەختی ئەڵمانیا دەنگدەران لەبەردەم باڵیۆزخانەی تورکیا کۆبوونەوە و دەستیان بە دەنگدان کرد.

بەپێی زانیارییەکانی دەستەی هەماهەنگی بەرلین، هاوپەیمانیی ڕەنج و ئازادی، دەنگدەران لە نێوان ۲۷ی نیسان بۆ ۹ی ئایار لە بەرلین بە ٤٦ ئۆتۆمبێل بۆ دەنگدان دەگوازرێنەوە بۆ بنکەکانی ویدینگ، کریوزبێرگ و نیوکۆلن.

لە بەرلین لە ماوەی ئەم هەفتەیەدا لە ١٠ سندوقی دەنگدان دەنگ دەدرێت و لە کۆتایی ئەم هەفتەیەدا لە ١٢ سندوقی دەنگدان دەنگ  دەدرێت. هەروەها دەنگدەرانی شارەکانی دەوروبەری بەرلینیش دەتوانن بۆ دەنگدان بڕۆن بۆ بەرلین.

لە ناوەندەکانی کۆمەڵگەی دیموکراتییک لە درێسدن و هالی، پاس بۆ گەیاندنی دەنگدەران بەرەو سندوقەکان بەڕێدەکەون.

هەموو ڕۆژێک لە چیمنیتز ئۆتۆمبێل بە ڕێدەکەوێت.

هەروەها لە ماگدێبورگ و لایپزیگ دەنگدەران بە پاس دەبرێن بۆ بنکەی دەنگدان.

بۆ پاراستنی سندوقەکانی دەنگدان لە بەرلین، لەلایەن پارتی چەپی سەوزەوە ٢٢٠ چاودێر ئەرکدارکراون.

ژ.ت