کۆنگرەی جڤاکی دیموکراتیکی کوردستانیان لە ئەوروپا (کەجەدەکە-ئە) پەیوەست بە هەڵبژاردنە خۆجێیەکان ڕاگەیاندراوی بڵاوکردەوە، ڕایگەیاند سیاسەتی قڕکردن و فشار و شەڕی ٢٢ ساڵە شکستی هێنا، گوتی: "گەلی کورد ڕۆڵی خۆی گێڕا، لە جوگرافیای کوردستان و تورکیا نیشانی دا، هێزی یەکلاکەرەوەیە دژی دیکتاتۆرییەت".

هەروەها دەڵێت: "سەرەڕای هەموو فشار و دەستوەردانەکانی پێش هەڵبژاردن و ڕۆژی هەڵبژاردنیش، کوردستان ئیرادەی خۆی بۆ دەم پارتی نیشاندا".

هەروەها ئاماژە بەوە دەکات، هاوپەیمانی ئاکەپە-مەهەپە بە ئیرادەی گەلی کورد شکستی هێنا، گەلانی تورکیاش بەم ڕژێمەیان گوت "ئیتر بەسە".

هەروەها کەجەدەکە-ئە تیشکی خستەسەر هەڵمەتی "ئازادی بۆ عەبدوڵا ئۆجالان و چارەسەری سیاسی بۆ پرسی کورد"، دووپاتی دەکاتەوە، ئەم هەڵمەتە بۆتە ئیرادەی ملیۆنان کەس.

هەروەها دووپاتی دەکاتەوە، سەرکەوتنی هەڵبژاردنەکان گرێدراوبووە بە قۆناغی گەلپارێزی هەڵمەتی ئازادییەوە، دەڵێت "گەلی کورد بەم ڕۆح و جۆشەوە لەدەوری ڕێبەر ئاپۆ یەکی گرت". جەخت دەکاتەوە بەم هەڵبژاردنە دەرکەوت گەلی کورد هێزی سەرەکی سیاسەتە، هەروەها دەڵێت: "ئێستە هەڵمەتی ئازادی ڕێبەر ئاپۆ بۆتە گەل، ملیۆنان کەس لە شەوی ٣١ ی ئادار لە گۆڕەپانەکان درووشمی "بژی سەرۆک ئاپۆ" و "ژن، ژیان، ئازادی"یان بەرزکردەوە".