مەجلیسی کۆنگرەی ستار ڕاگەیاندراوێکی بڵاوکردەوە و سەرکۆنەی هێرشی تورکیا دەکات بۆ سەر فڕۆکەخانەی سلێمانی لە باشووری کوردستان، داوا لە ئەنجوومەنی ئاسایش دەکات ئەرکی خۆیان جێبەجێ بکەن.
لە ڕاگەیاندراوەکەدا، مەجلیسەکە ڕوونی دەکاتەوە، تورکیا بەردەوام هێرشی دڕندانە دەکاتە سەر هەرێمی کوردستان و بەردەوامە لە سیاسەتی لەناوبردنی مرۆڤ و سرووشت و گوند و شار و دامەزراوەکان.
بە بۆچوونی مەجلیسەکە، دەوڵەتی داگیرکەری تورکیا بەم هێرشە دەیەوێت ئەو هەماهەنگی و یەکێتییە بەئامانج بگرێت کە لەنێوان ئیدارەی خۆبەڕێوەبەری و یەکێتیی نیشتیمانیی کوردستان بەدی هاتووە، چونکە چاوی بەم دەسکەوتانە هەڵنایەت.
لە ڕاگەیاندراوەکەیدا، مەجلیسەکە داوا لە ئەنجوومەنی ئاسایشی نێودەوڵەتی کرد بەرپرسیارێتیی خۆیان هەڵبگرن لەم هێرشانەدا و لێپێچینەوە لە دەوڵەتی تورکیا بکەن.
مەجلیسەکە بەتوندی سەرکۆنەی هێرشەکە دەکات و داوا لە ئەنجوومەنی ئاسایش و ڕێکخراوە پەیوەندیدارەکان دەکات بە ئەرکی خۆیان هەستن.
هەروەها مەجلیسەکە بانگەوازی گەلی باشوور و ڕۆژئاوا دەکات نەکەونە دوای پیلانەکانی داگیرکەری تورکیا. درێژە بە هەماهەنگی و یەکێتی و بەرزکردنەوەی خەبات بدەن لەپێناو کۆتایی‌هێنان بە داگیرکردنی کوردستان و بەدیهاتنی ئازادی.
