کۆنگرەى نەتەوەیی کوردستان رایگەیاندووە، "نەورۆز رۆژی بەرخۆدانە.  نەورۆز رۆژی سەرکەوتنە بەسەر نادادپەوەریدا. نەورۆز جەژنی ئازادییە. نەورۆز لەسەر بنەمای تێکۆشان لە دژی چەوسانەوەو ژێردەستی. لە دژی زوڵم و زۆر و داگیرکاریی و کۆیلایەتی، سومبوڵی ئازادی و رزگارییە."

کەنەکە راشیگەیاندووە، "دوژمنانی ئێمە لە زۆر لاوە خەریکی هێرش کردنن. بە تایبەتیش دەولەتی تورکیا بە ئامانجی لەوناوبردنی دەستکەوتەکانی گەلەکەمان لە باشوور و رۆژاو باکور، لە ‌هێرشێکردنێکی بەرفراواندایە. دەوڵەتی ئێرانیش بە هەموو شێوەیەک خەڵک و چالاکوانانی کوردستانی کردۆتە ئامانجی هێرشەکانی. لە باشووری کوردستانیش، ئەگەر چی قەوارەیەکی فەرمی هەیە، بەڵام کێشە و قەیرانەکان بەردەوامن. دۆخی ناوچە دابڕاوەکانی کوردستانیش خراپە. نەیارانی کوردستان بۆ تێکدان و لەناوبردنی ئەو پێگەو قەوارەیە بەردەوام لە کار و پیلانداناندان. لە رۆژاوای کوردستان، هێرشەکانی تورکیا هەر بەردەوامن. رژێمی سوریاش چاوەڕێی دەرفەت دەکات. دەیانەوێت دەستکەوتەکانی گەلی کوردستان لەناوببەن".

کەنەکە ئەوەشی راگەیاندووە، "لەم قۆناغە گرنگەی تێکۆشانی ئازادیی کوردستاندا، پێویستە ئاگری نەورۆز ببێتە رؤشنایی رێگای یەکڕیزی گەل و  تەبایی نەتەوەییمان. کۆنگرەی نەتەوەیی کوردستان بەم بیروباوەڕەوە و بە دڵگەرمیی نەتەوەیی ونێشتمانییەوە، نەورۆز لە کوردو کوردستانیان پیرۆز دەکات".

دەقی پەیامەکەى کەنەکە بۆ نەورۆز

جەژنی بەرخۆدان، جەژنی ئازادیی، نەورۆز پیرۆز بێت

نەورۆز لە مێژووی کوردستاندا هەمیشە جێگایەکی دیاری هەبووە. نەورۆز رۆژی بەرخۆدانە.  نەورۆز رۆژی سەرکەوتنە بەسەر نادادپەوەریدا. نەورۆز جەژنی ئازادییە. نەورۆز لەسەر بنەمای تێکۆشان لە دژی چەوسانەوەو ژێردەستی. لە دژی زوڵم و زۆر و داگیرکاریی و کۆیلایەتی، سومبوڵی ئازادی و رزگارییە.

گەلی کوردستان بە ساڵان و بە رەنج و قوربانییەکی زۆر نەورۆزی کردۆتە رۆژی شادیی جەماوەریی و رۆژی بەرخۆدان. خەڵکی کورد لە کوردستان و دەرەوەی ولاتیش بە واتاو ناوەرۆکە مێژوویەکەی خۆی و بە ئامانجی ئازادی و سەرفرازی، نەورۆز پیرۆز دەکەن. کوردان لە هەموو مەیدانەکانی تێکۆشاندا، لە گوند و شارو زیندانان، لە هەر شوێنێکی دنیادا، نەورۆزیان کردۆتە سەنگەری خەبات بۆ ئازادی و رزگاریی.

ئێستا گڕی نەورۆز لەسەرانسەری کوردستاندا بەتین و گوڕترە. لە باشوور و رۆژاوای کوردستان بە فەرمی پیرۆز دەکرێت. لە رۆژهەڵات و باکوری کوردستانیش، گەلی کورد سەرەرای هەموو ئاستەنگی و لەمپەرەکان، بە واتا قولەکانییەوە  نەورۆز پیرۆز دەکەن. بڵێسەی ئاگری نەورۆز بە گوڕوتینێکی زیاترەوە هەڵئەکەن

ئێمە لەگەڵ نەورۆزدا دەست بە ساڵێکی نوێ دەکەین. ساڵی رابردوو لە هەموو بوارەکاندا ساڵێکی تێکۆشان بوو.دیارە ئەمساڵیش ئەبێتە ساڵی تێکۆشانی بەهێز و سەرکەوتنی گەورەتر. دوژمنانی ئێمە لە زۆر لاوە خەریکی هێرش کردنن. بە تایبەتیش دەولەتی تورکیا بە ئامانجی لەوناوبردنی دەستکەوتەکانی گەلەکەمان لە باشوور و رۆژاو باکور، لە ‌هێرشێکردنێکی بەرفراواندایە. دەوڵەتی ئێرانیش بە هەموو شێوەیەک خەڵک و چالاکوانانی کوردستانی کردۆتە ئامانجی هێرشەکانی. لە باشووری کوردستانیش، ئەگەر چی قەوارەیەکی فەرمی هەیە، بەڵام کێشە و قەیرانەکان بەردەوامن. دۆخی ناوچە دابڕاوەکانی کوردستانیش خراپە. نەیارانی کوردستان بۆ تێکدان و لەناوبردنی ئەو پێگەو قەوارەیە بەردەوام لە کار و پیلانداناندان. لە رۆژاوای کوردستان، هێرشەکانی تورکیا هەر بەردەوامن. رژێمی سوریاش چاوەڕێی دەرفەت دەکات. دەیانەوێت دەستکەوتەکانی گەلی کوردستان لەناوببەن.

ئەم دۆخە ئەرکێکی گرنگ ئەخاتە سەر شانی ئێمە. پێویستە لەبەرامبەر هەموو داگیرکەراندا رێوشوێنی پێویست بگیرێنە بەر. پێویستە هێزەکانی خۆپاراستن بەهێزبکرێن، هێرشەکانی دوژمنان تێکبشکێنرێن. پێویستە ئەو دەستکەوتانەی هەن بپارێزرێن و دەستکەوتی زیاتر بەدەست بێن. بۆ ئەم ئامانجانەش، پێویستە بەر لە هەر شتێک ریزەکانی ناوماڵی کورد یەکبخرێنەوە، یەکێتی نەتەوەیی بەهێزبکرێت. پێویستە ئەمساڵ بکەین بە ساڵی ئازادیی.

لەم قۆناغە گرنگەی تێکۆشانی ئازادیی کوردستاندا، پێویستە ئاگری نەورۆز ببێتە رؤشنایی رێگای یەکڕیزی گەل و  تەبایی نەتەوەییمان. کۆنگرەی نەتەوەیی کوردستان بەم بیروباوەڕەوە و بە دڵگەرمیی نەتەوەیی ونێشتمانییەوە، نەورۆز لە کوردو کوردستانیان پیرۆز دەکات.

کات کاتی ئازادییە

نەورۆز پیرۆزبێت

ژ.ت