کۆنگرەی هەرێمی ئۆپسالای پارتی چەپی سوید بەهۆی پەتای کۆرناوە لەسەر تۆڕی ئینتەرنیت بەڕێوەچوو. میوانی نێونەتەوەیی ئەمساڵی کۆنگرەکە، دەروێش چیمەن نوێنەری هەدەپە بوو لە ئەوروپا.

چیمن سڵاوی لە بەشداربووانکرد و لەبارەی هێرش و گوشارەکانی هاوپەیمانی ئاکەپە – مەهەپە بۆ سەر هەدەپە زانیاریی بە ئامادەبوان دا. چیمن باسی ئەوەیکرد، رژێمی ئەردۆغان رێز لە ئیرادەی گەل و بەڕێوەبەریی شارەوانییەکان و پەرلەمانتاران و هەڵبژێردراوانی گەل ناگرێت و بە پێچەوانەى یاساوە لەسەر کارەکانیان لایاندەبات و قەیوم بەسەر شارەوانییەکانی هەدەپەدا دەسەپێنێت.

چیمن باسی لە دۆزی داخستنی هەدەپە کرد و وتی، هەدەپە بە هەموو هێز و توانای خۆیەوە لە دژی گوشارەکان دەوەستێتەوە.

پییر مارکوس ریسمان سەرۆکی هەرێمی ئۆپسالای پارتی چەپی سوید سپاسی چیمەنی کرد، کە بەشداری کۆنگرەکەیان بووە و رایگەیاند، ئەو هێرشانەى دەوڵەتی تورک بۆ سەر هەدەپە وەک هێرش بۆ سەر خۆیانی دەبینین و بە دڵنیاییەوە پشتیوانییەکان بۆ هەدەپە زیاتر و بەهێزتر دەکەین.

لە کۆنگرەکەدا هانا ڤکیتۆریا مۆرک و پییر مارکوس ریسمان بۆ هاوسەرۆک هەڵبژێردران. ئەندامانی کۆنگرەش پۆستەرێک، کە لەسەری نووسرابوو "دەست لە هەدەپە هەڵگرن" بەرزکردبووە و سرودی "ئینتەرناسیۆنال"یان خوێندەوە.

ژ.ت