شاندەکەی شەنگال لەگەڵ کازمی کۆبووە و ١٨ داواکاریی پێشکەش کرد
شاندێکی هاوڵاتیانی شەنگال لەگەڵ مستەفا کازمی سەرۆک وەزیرانی عێراق کۆبووە و ١٨ داواکاریی پێشکەشی کازمی کرد، کازیمش بەڵێنی داوە کە ڕێگا بە دەستوەردانی هێزی دەرەکی نەدات لە کێشەکانی شەنگالدا.
لە چوارچێوەی کار و خەباتەکان دژی ڕێککەوتنەکەی بەغدا و هەولێر، شاندێکی پێکهاتوو لە نوێنەرانی خۆبەڕێوبەریی شەنگال و پادێ و تاژێ، لە بەغدای پایتەخت، لەگەڵ ڕاوێژکاری مستەفا کازمی سەرۆک وەزیرانی عێراق و ئەمینداری گشتی دەزگای ئاسایشی نیشتمانی و هەندێک لە کاربەدەستانی عێراق کۆبووە و پاشان لەگەڵ مستەفا کازمی سەرۆک وەزیرانی عێراق کۆبوونەوە.
لە کۆبوونەوەکەدا داواکارییەکانی خەڵکی شەنگال لە ١٨ خاڵدا پێشکەشی کازمی کران.
داواکارییەکانی شاندەکەی شەنگال بریتین لە:
١- داوا لە حکومەت و پەرلەمانی عێراق دەکەین، کە کۆمەڵکوژیی سەر ئێزدییەکان بە جینۆساید بناسێنن و لەسەر دۆزی شەنگال کار بکەن، تاوانباران ڕادەستی دادگای نێودەوڵەتی بکەن و کار بۆ هەڵدانەوەی گۆڕە بە کۆمەڵەکان بکرێت.
٢- لەبری ئەو ئیدارەیەی هەیە لە شەنگال، ئیدارەیەکی نوێ دروستبکرێت، کە بەشداریی یەکسان بۆ پێکهاتەکان تێیدا لەبەرچاو بگیرێت و تەواوی ئیدارەکە لە خەڵکی شەنگال پێکبێت.
٣- شەنگال وەک پارێزگایەکی گرێدراوی عێراق قبوڵبکرێت و هەموو شەڕە هەرێمی و نێونەتەوەییەکان لە شەنگال دووربخرێتەوە.
٤- پێویستە بڕیاری پێشکەشکردنی هاوکاری بەو کەسانەی کە ماڵیان ڕووخاوە و بریندارکراون، خانەوادەی شەهیدان و بێسەروشوێنان، شەنگال بگرێتەوە، لەبەر لەسەروو هەموو ئەو کارەساتانەی بەسەر خەڵکی شەنگالدا هاتووە، هیچ هاوکارییەک نەکراون.
٥- ئەو بڕیارانەی کە لەبارەی بەڕێوبەری شەنگال، هێزی سەربازیی، نەتەوەیی و زمان دەدرێت، پێویستە لەلایەن ئێزدییەکان خۆیانەوە بدرێت و بۆچوونیان وەربگیرێت و ڕێگا بە هیچ هێزێکی دەرەوە نەدرێت دەست لە کاروباری شەنگال وەربدات.
٦- ئامادەکاریی بۆ گەڕانەوەی ئاوارەکان بکرێت بۆ شەنگال و دوای گەڕانەوەیان هاوکارییان پێشکەش بکرێت.
٧- وێڕای سوپاسکردنمان بۆ پشتگیریتان بۆ یاسای ژنە ڕزگاربووەکانی دەستی داعش، داوادەکەین، کە پێش سەری ساڵ یاساکە پەسەند بکرێت بۆ ئەوەی هاوکاربێت بۆ گەڕانەوەی ئەو ژنانە بۆ ژیانی ئاسایی.
٨- حکومەت بودجەیەک بۆ ئاوەدانکردنەوەی شەنگال تەرخان بکات و هەلی کار بۆ دەرچوانی زانکۆ و پەیمانگاکان دابین بکرێت.
٩- بۆ هەڵگرتنی زوڵمی سەر ئێزدییەکان و بۆ ئەوەی هەست بکەین کە هاوڵاتی عێراقین، دەبێت ڕۆڵەکانی ئێزدی لە کەرتی سەربازی و پۆلیس و دامەزراوە ئەمنییەکاندا دابمەزرێنرێن.
١٠- داوادەکەین کۆمیتەیەکی تایبەت بۆ لێکۆڵینەوە بەدواداچوون بۆ ڕفێندراوەکانی ئێزدی دروستبکرێت، بە بەشداریی کەسوکاری قوربانییەکان، زانیارییان لەسەر کۆبکرێتەوە و چارەنووسیان ڕوون بکرێتەوە.
١١- هەزاران ئێزدی لە ناو هێزی سەربازیی عێراقدا هەیە، داواکارین ئەو ئێزدیانە بگوازرێنەوە بۆ شەنگال بۆ پاراستنی ناوچەکەیان.
١٢- داوای کردنەوە دەرگای سنووری لەنێوان عێراق و سوریا دەکەین، لە شەنگال، لەبەر ئەوەی تاکە ڕێگایە کە ڕزگاربووانی دەستی داعشی لێوە بگەڕێنرێتەوە شەنگال،
داوا دەکەین دەرگا سنوورییەک بکرێتە فەرمی و لەلایەن خەڵکی شەنگال وهێزە ئەمنییەکانەوە چاودێری بکرێت و بپارێزرێت.
١٣- داوای دامەزراندنی ڕاوێژکارێکی تایبەت بە کاروباری ئێزدییەکان دەکەین بۆ سەرۆک وەزیران، لەبەر ئەوەی ڕاستەوخۆ خەم و ئازارەکانی خەڵکی ئێزدی بگەیەندرێتە ناوەندی بڕیار.
١٤- بۆ پاراستنی دیمۆگرافیای شەنگال، داوادەکەین ئەو زەویانەی پێشتر لە نەینەوا و شەنگال لە ئێزدییەکان سەندراوە بگەڕێندرێتەوە بۆیان
١٥- داوا لە پەرلەمانی عێراق دەکەین، کە ئێزدییەکان وەک نەتەوە بناسێنێت.
١٦- داوای ڕاگرتنی بۆردوومانەکانی دەوڵەتی تورک دەکەین لە سنووری عێراق، بەتایبەت لە شەنگال، چونکە ئەوە ڕێگرە لەبەردەم گەڕانەوەی ئاوارەکان و ئارامی شەنگال.
١٧- داوای کردنەوەی ناوەندێکی سەربەخۆی پۆلیس لە شەنگال دەکەین، کە ڕاستەوخۆ لەلایەن وەزارەتی ناوخۆی عێراق ٥ هەزار کارمەندی بۆ دابمەزرێنێت و هاوسەنگی لە دامەزراندی پێکهاتەکانی شەنگال لەبەرچاو بگیرێت.
١٨- کاربکرێت بۆ بە جینۆساید ناساندنی تاوانی ٣ی ئابی ٢٠١٤ لەسەر ئاستی نێودەوڵەتی.
ف.ق
