تەڤگەری کۆمەڵگەی دیموکراتیک (تەڤدەم) ئاماژە بەوە دەکات حکومەتی فاشیستی تورک لە بەهاکانی دیموکراسی دەترسێت، بۆیە هێرشدەکاتە سەر ئیرادەی گەلە دیموکراتیخوازەکان، داوا لە گەلانی هەرێمەکە دەکات خاوەندارێتی لە بەهاکانی بەرخۆدان بکەن.
ڕاگەیاندراوەکەی تەڤدەم تایبەتە بە شەرمەزارکردنی هێرشە بەردەوامەکانی داگیرکەری تورک بۆ باکور و ڕۆژهەڵاتی سوریا و بەئامانجگرتنی هاوسەرۆکی کانتۆنی قامیشلۆ یوسرا دەروێش و جێگرەکەی لێمان دەروێش و شۆفێرەکەی فورات توما، کاتی ئەنجامدانی کاری مەدەنی لە دامەزراوەکانی ئیدارەی خۆبەڕێوەبەری.
تەڤگەرەکە ئاماژە بەوە دەکات بە بێدەنگییەکان بەرامبەر هێرشەکانی داگیرکەر لەلایەن دەوڵەتانی پارێزەری ئاگربەستەوە، لەگەڵ لێدوانی ڕوسیا دەربارەی ئیدارەی خۆبەڕێوەبەری، کە هەموویان ئاماژە بۆ سیاسەتێکی ترسناک و هاندەری داگیرکەری تورکە بۆ ئەنجامدانی کۆمەڵکوژی زیاتر.
لە سەرەتای ڕاگەیاندراوەکەدا هاتووە: "ماوەیەکی زۆرە پیلانەکانی داگیرکەری تورک بە هەماهەنگی لەگەڵ لایەنە پەیوەندیدارەکانی کاروباری سوریا، بەتایبەت ئەو دەوڵەتانەی واژۆیان کردووە لەسەر ڕێککەوتنی پشتیوانی داگیرکەری فاشیستی تورک لە ناوخۆ و دەرەوە، بەتایبەت ڕێککەوتنە ئەمنی و سەربازییەکان، ئەمە لەپێناو ئەنجامدانی هێرشی زیاتر بۆ سەر ئیرادەی خۆبەڕێوەبەری دیموکراتیک، بە ئامانجی گۆڕینی هەرێمەکە و ڕاکێشانی بەرەو شەڕێکی کراوە بەدرێژایی سنوورەکە، بەهۆی هێرشە ڕۆژانەیی و کوشندەکان بۆ تێکدانی ئارامی هەرێمەکە و سەپاندنی سیاسەتی شەڕی تایبەت، لەپێناو سیاسەتی قڕکردنی کەلتووری جڤاکی مێژوویی بەبێ جیاکردنەوەی کەلتووری هەر پێکهاتەیەکی هەرێمەکە و لە هەموو جوگرافیای ئیدارەی خۆبەڕێوەبەری. دەوڵەتی داگیرکەری تورک هەردەم دەترسێت لە هاوپشتی و پێکەوەبوونی گەلان لەپێناو بنیاتنانی ئیرادەیان و کۆکردنەوەی توانا کەلتووری و ئەخلاقییەکانیان لەرێگەی ئەفسانەی داستانەکانی بەرخۆدانی جڤاکی مێژووییەوە.
بەئامانجگرتنی بەردەوامی خەڵکی سڤیل لەلایەن فڕۆکەی بێ‌فڕۆکەوان و فڕۆکەی جەنگییەوە، لەگەڵ ناڕوونی دەوڵەتانی پەیوەندیدار بە پرسی سوریا و دەوڵەتانی پارێزەری ئاگربەست، دووپاتی دەکاتەوە سەرچاوەی هاوبەش و بڕیاری هاوبەش و هەڵوێستیان بەجۆرێکە کە ڕێخۆشکەرە بۆ بەردەوامی کردەوەکانی تورکیا. باشترین بەڵگە، لێدوانی جێگری وەزیری دەرەوەی ڕوسیایە کە لەگەڵ نزیکبوونەوەی کۆبوونەوەی ئاستانە، هێرشی کردە سەر ئیدارەی خۆبەڕێوەبەری. ئەمەش مانایەکی سیاسی ترسناکی هەیە، هاوشێوەی پەیامێکە بۆ هاندانی دەوڵەتی داگیرکەری تورک تا کۆمەڵکوژی زیاتر بکات بەرامبەر گەلان و ئیرادەی گەلان.
کۆمەڵکوژییەکەی دوێنێی تەل شەعیر، کە بووە هۆی شەهیدبوونی هاوسەرۆکی کانتۆنی قامیشلۆ، یوسرا دەروێش، جێگرەکەی لێمان شوێش، شۆفێرەکەیان فورات توما، ئامانجی لاوازکردنی ڕۆڵی کاریگەری ئیدارەی خۆبەڕێوەبەری دیموکراتیکە لە هەرێمەکە، لەگەڵ هەڵوەشانەوەی ئەم ئیرادە جڤاکییە یەکگرتوو و هاوپشتە، لەگەڵ تێکدانی بناغە و بەهاکانی سیستەمی دیموکراتیک.
حکومەتی ئاکەپە حکومەتێکی فاشیستە، لە بەها و پرەنسیپەکانی دیموکراسی دەترسێت، چەندین ڕەهەندی سیاسی کوێرانە دژی گەلانی دراوسێ بەکاردەهێنێت، لەڕێگەی سیاسەتی چاندنی ترس و تۆقینەوە لەنێو خەڵکی سڤیل بە ئامانجی چۆڵکردنی هەرێمەکە و ئەنجامدانی هێرش دژی ئیرادەی گەلانی دیموکراتیخواز و یەکێتیی نەتەوەیی ئازاد.
بەڵێن دەدەین بە درێژەدان بە هەنگاوەکان و فەلسەفەی شەهیدان، لەگەڵ پاراستنی بەهاکانیان لەنێو تێکۆشان و بەرخۆدانماندا، هیوای چاکبوونەوە بۆ هەڤاڵ گابی دەخوازین.
ئەم قۆناغە زۆر گرنگە و ئێمە لەبەردەم سەرکەوتنێکداین بۆ چارەسەری سوری_سوری، بەڵام دوژمنانی ئیرادەی گەلان ئاستەنگ دەخەنە بەردەم چارەسەرەکانی ئیدارەی خۆبەڕێوەبەری. بۆیە پێویستە هەموومان خاوەندارێتی بکەین لە بەها و پرەنسیپەکانی بەرخۆدان لە هەموو کاتێک زیاتر، با ببینە قەڵغانێک بەرامبەر هەموو سیاسەتێکی دوژمنکارانەی داگیرکەری تورک کە تەنها خوێنڕێژی گەلان دەزانێت، پاراستنی دەسکەوتەکان کە بە خوێنی شەهیدان بەدەستهاتووە، نهێنی متمانە و سەرکەوتنمانە بەرامبەر هەموو هێرشێک".
