هەڵمەتی "ئازادی بۆ عەبدوڵا ئۆجالان، چارەسەری سیاسیی بۆ پرسی کورد" لە ١٠ ی تشرینی یەکەم دەستی پێکرد و ڕۆژ بە ڕۆژ گەشتر دەبێت. تەڤ-چاندی ئەوروپا و کەوانی زێڕینی ئەوروپا بە ڕاگەیاندراوێک بەشداربوونی خۆیان لە هەڵمەتی ئازادی ڕاگەیاند. لە ڕاگەیاندراوەکەدا شەهیدانی "ناتوانن ڕۆژەکەمان تاریک بکەن" یادکرانەوە.

ڕاگەیاندراوەکە لەلایەن هونەرمەند بەرماڵ چەم خوێنرایەوە، سەرەتا ئاماژەی بە سیستەمی گۆشەگیری و ئەشکەنجەی ئیمراڵی کرد، دووپاتی کردەوە، ئەم سیستەمە گرێدراوە بە کۆڵۆنیاڵیزەکردن و قڕکردنی سەد ساڵە لەسەر کوردستان، لێرەوە ڕژێمی قڕکەری ئیمراڵی نەوەک هەر لەسەر ڕێبەری گەلی کورد عەبدوڵا ئۆجالان، بەڵکو بەسەر تەواوی گەلانی کوردستان و تورکیا و مرۆڤایەتی سەپێنراوە. گوتی: " هیچ پێوەرێکی ئەخلاقی و یاسایی  پەیڕەو ناکرێت. ئەو سیستەمەی کە هەموو ساتێک ئەشکەنجە دەدات، ئیتر قبوڵکراو نییە، لە زیاتر لە ١٠٠ شاری جیهان، زۆر کەسێتی دیموکرات و ئازادیخواز، دژی ئەم سیستەمە دەنگیان هەڵبڕیوە و هەڵوێستی ڕوونیان پیشانداوە".

پاشان، ئاماژەی بەوە کرد، پێویستە ڕێبەری گەلی کورد عەبدوڵا ئۆجالان دیدار لەگەڵ پارێزەران و بنەماڵەکەی ئەنجام بدات، گوتی: " بۆ ئەوەی ڕۆڵی سیاسی خۆی بگێڕێت لە چارەسەرکردنی کێشەکانی کورد و ڕۆژهەڵاتی ناوین، پێویستە لە چاڵی ئیمراڵی دەربچێت. چارەسەری سەرەکی بۆ ئارامکردنەوەی جوگرافیای ڕۆژهەڵاتی ناوین و کوردستان، هەروەها ئازادکردنی چاند و هونەری کورد، بە ئازادی جەستەیی ڕێبەر ئاپۆ پێکدێت".

لەکۆتاییدا، چەم سڵاوی لە هەڵمەتی ئازادی کرد و گوتی: "وەک تەڤ-چاند و کەوانی زێڕینی ئەوروپا، بە هەموو هێزمانەوە پشتگیری لە کەمپەینی نێونەتەوەیی بۆ ئازادی جەستەیی ڕێبەر عەبدوڵا ئۆجالان و چارەسەری سیاسی بۆ پرسی کورد، دەکەین. بە خەبات و چالاکییە چاند و هونەرییە بەردەوامەکانمان، ئەم هەڵمەتە پێشدەخەین. بەم بۆنەیەوە، بانگەواز لە هەموو کەسێک دەکەین کە دڵی بۆ ئاشتی و ئارامی و دیموکراسی و ئازادی لێ دەدات، خاوەندارێتی لە هەڵمەتی ئازادی بکەن و پێشی بخەن".