ئەبرو گونای وتەبێژی پارتی دیموکراتیکی گەلان (هەدەپە) لە نوسینگەی پشتگیریی ناوەندی گشتی دەبەپە لە ئامەد کۆنگرەی ڕۆژنامەنووسیی هەفتانەی ئەنجامدا.

ئەبرو گونای لە سەرەتادا ٨هەمین ساڵیادی کۆمەڵکوژی و فەرمانی سەر شەنگال شەرمەزار کرد و وتی: "ئەگەر کۆمەڵکوژییەکە لەلایەن داعشەوە ئەنجام درابێت، ئێمە دەزانین لە پشت ئەو عەقڵییەت و مێشک و هێزە تاریکەوە داگیرکەر هەبوو".

'بە دڵنیاییەوە ئێزدیەکان بەهێزتر دەبن'

گونای ئاماژەی بۆ ئەوە کرد، هێرشەکانی سەر ئێزدیەکان بەردەوامە و وتی: "داعش تێکشکێندراوە، بەڵام هێرش و کوشتار بۆ سەر خەڵکی ئێزدی بەردەوامە، بۆیە بوون، ڕێکخستن و ناسنامەی خەڵکی ئێزدی نکۆڵیی لێ دەکرێت و پاساو بۆ هێرش و کوشتارکردنیان دەهێنرێتەوە، لەبەر ئەوەش خەڵکی ئێزدی، کە هەزاران ساڵە سەرەڕای هەموو جۆرە هێرشێک بوونی خۆیان پاراستووە، وەک ڕاستی ئەم خاکە بەردەوام دەبن".

بانگکردن بۆ بەشداریکردن لە گردبوونەوەکان و چالاکییەکان

هەروەها ئەبرو گونای لە درێژەی لێدوانەکەیدا هێرش و گوشارەکانی سەر هەدەپەی بەبیرهێنایەوە و وتی: "پارتەکەمان بە دروشمی "چارەسەر لەگەڵ ئێمەیە، نەخێر بۆ شەڕ و داگیرکاری" لە ٦ی ئاب لە ئامەد و ٧ی ئاب لە ئیستەنبووڵ گردبونەوەی جەماوەری ساز دەکات. داوا لە هەموو گەلەکەمان دەکەین، کە بە بەهێزترین شێوە بەشداری ئەم گردبونەوانە بکەن و با پێکەوە بڵێین، کە ئێمە چارەسەرین و لە بەرامبەر شەڕ و داگیرکاریدا بوەستینەوە.

'ئێمە لە دژی گۆشەگیری و شەڕ دەوەستینەوە'

ئەبرو گونای وتەبێژی هەدەپە ڕایگەیاند، لە رێگەی ئەم گردبونەویەوە لە دژی سیاسەتی گۆشەگیری و شەڕ دەوەستینەوە و وتی، "ساڵانێکە ڕێگە بە خانەوادە و پارێزەرانی بەڕێز ئۆجالان و سێ زیندانیی دیکە نادرێت چاوپێکەوتن ئەنجام بدەن، ئەوە پێشێلکردنی هەموو یاسا جیهانی و نێودەوڵەتی و مرۆیی و تەنانەت یاساکانی تورکیاشە و ئەو هەموو پێشێلکارییە لە ئیمراڵی بەڕێوەدەچێت. ئەکتەرێکی سیاسی کە پێشنیار و پڕۆژەی چارەسەریی بۆ تورکیا هەیە لە دوورگەیەکدا زیندانیکراوە و بە شێوەیەکی چەتەگەریانە پەیوەندیەکانی لەگەڵ هەموو جیهاندا بڕاوە. وەک درێژەپێدانی ئەم سیاسەتە ئێستا هەوڵ دەدەن پەیوەندی کورد لەگەڵ ڕۆژئاوا و هەرێمی فیدراڵی کوردستان بچڕێنن، واتە هەوڵ دەدەن بە گۆشەگیرکردن کۆمەڵگەیەک گۆشەگیر بکەن، بۆیە ئەستەمە ئێمە لە دژی گۆشەگیریی ئیمرالی بێدەنگ بین، ئەمە نایاساییە، جۆرێکە لە فاشیزم و چەوساندنەوە، ئێمە بە توندترین شێوەیە لە دژی ئەوە دەوەستینەوە".

ژ.ت