ئێشکگری خزمی زیندانیان بۆ ئازادی جەستەیی ڕێبەری گەلی کورد عەبدوڵا ئۆجالان لە شارەکانی مێردین و ئامەد و ئێلح و ئیستەنبوڵ بەردەوامە، لە چالاکییەکاندا درووشمی "بژی سەرۆک ئاپۆ" و "بێ سەرۆک ژیان نابێ" و "بژی بەرخۆدانی زیندان" و "ژن، ژیان، ئازادی" بەرزکرایەوە، دایکان یەلەکیان پۆشی و لەسەر نوسرابوو "گۆشەگیری تاوانێکی دژی مرۆڤایەتییە".

لە کادرانی پەکەکە، فەرهاد کورتای و ٣ هەڤاڵی کاتی کودەتای سەربازی ساڵی ١٩٨٠ لە زیندانی ئامەد دژی ئەشکەنجە ئاگری لە جەستەی بەردا، خوشکی فەرهاد کورتای، ڕابیعە کورتای لە چالاکییەکەی مێردین گوتی: "دەمانەوێت ڕێگەی ئاشتی بکرێتەوە، دەمانەوێت ڕۆڵەکانمان ئازاد ببن. هەردەم لە زیندانەکان ڕادەگیرێن. ئێمە داوای چ دەکەین؟ داوای مافی مرۆڤ و زمانی خۆمان دەکەین. داوای خێر لە کەس ناکەین. ئەمە دۆزی ئێمەیە. ئێمە بۆ ئەم دۆزە لە ئێشکگریداین. ئێمە یەکسانی و مافی خۆمان دەوێت".

لە چالاکییەکەی ئامەد، پەرلەمانتاری پارتی چەپی ئەڵمانیا گۆکای ئاکبولوت لەگەڵ شاندێک بۆ چاودێری هەڵبژاردن لە ئەڵمانیاوە سەردانیان کرد. شاندەکە گوێیان لە داوای خزمی زیندانیان گرت و پشتیوانی خۆیان دەربڕی.

خزمی زیندانیان داوایان کرد فشاری نێو زیندانەکان کۆتایی بێت و  دووپاتیان کردەوە درێژە بە چالاکییەکەیان دەدەن.

لە چالاکییەکەی ئێلح، سافورە ئاکین دایکی زیندانی یونس ئاکین، ڕایگەیاند زیاتر لە مانگێکە کوڕەکەی لە زیندان لە گۆشەگیرییەکی تونددایە و ڕووبەڕووی ئەشکەنجەی توند دەبێتەوە، داوای هەستیاری لە ڕای گشتی کرد و گوتی: "کوڕەکەم هەردەم دەڵێت، هەڕەشەی مردنمان لێ دەکەن، خاوەنداریمان لێ بکەن".

لە چالاکییەکەی ئیستەنبوڵ، چالاکوانی تەڤگەری ژنانی ئازاد (تەژەئا) خەجێ باشکال تیشکی خستەسەر گۆشەگیری توندی سەر ڕێبەری گەلی کورد عەبدوڵا ئۆجالان و گوتی: "تا گۆشەگیری سەر عەبدوڵا ئۆجالان نەشکێت و ئازادی جەستەیی مسۆگەر نەکرێت، کەس ئازاد نابێت".