خزمی زیندانیان بۆ ئازادی جەستەیی ڕێبەری گەلی کورد عەبدوڵا ئۆجالان و چارەسەری سیاسی پرسی کورد درێژە بە ئێشکگری دادپەروەری دەدەن. چالاکییەکە لە شارەکانی مێرسین و ئەزمیر و مێردین و ئێلح بەردەوامە. لە چالاکییەکاندا درووشمی "بژی سەرۆک ئاپۆ" و "بێ سەرۆک ژیان نابێ" و "بژی بەرخۆدانی زیندان" و "ژن، ژیان، ئازادی" بەرزکرایەوە، دایکان یەلەکیان پۆشی و لەسەری نوسرابوو "گۆشەگیری تاوانێکی دژی مرۆڤایەتییە".

لە چالاکییەکەی مێردین هاوسەرۆکی دەم پارتی مێردین نەجلا ئاجیبوجا گۆشەگیری سەر ڕێبەری گەلی کورد عەبدوڵا ئۆجالانی شەرمەزار کرد، گوتی: "هەرچەند گۆشەگیری سەر ڕێبەری گەلی کورد بەردەوام بێت، ئێمە سەر نەوی ناکەین و ناوەستین"، هەروەها جەژنی ڕەمەزانی لە زیندانیان و چالاکوانان پیرۆز کرد.

لە چالاکییەکەی ئەزمیر یەک لە دایکی زیندانیان، سوڵتان یاگمەکان گوتی: "تا گۆشەگیری سەر ئۆجالان هەڵنەگیرێت، درێژە بە چالاکییەکەمان دەدەین. پێویستە بنەماڵە و پارێزەران لەگەڵی کۆببنەوە. تا زانیاری لە عەبدوڵا ئۆجالانەوە وەرنەگرین، ناوەستین".

لە چالاکییەکەی مێرسین دایکی ئاشتی مەریەم ئەربەی ڕایگەیاند بۆ چارەسەری دیموکراتیکی پرسی کورد دەبێت دەمودەست دەرگاکانی ئیمراڵی بکرێنەوە و لەگەڵ ڕێبەری گەلی کورد عەبدوڵا ئۆجالان کۆببنەوە، دووپاتی کردەوە تا گەیشتن بەم ئامانجە چالاکی دەکەن.

پاشان پەرلەمانی دەم پارتی مێرسین عەلی بۆزان ڕایگەیاند کێشەکانی وڵات گرێدراون بە گۆشەگیری ئیمراڵییەوە، گوتی: "تا گۆشەگیری بەردەوام بێت، چارەسەرنەبوونی پرسی کورد بەردەوام دەبێت، تا پرسی کورد چارەسەر نەبێت، لە تورکیا و ڕۆژهەڵاتی ناوین پێکدادان و شەڕ بەردەوام دەبێت. ئەگەر شەڕ و قەیران لە وڵاتێک هەبێت، ئارامی و پێشکەوتن نایەتەدی. بۆیە پێویستە گۆشەگیری کۆتایی بێت".

پاشان دایکان بەبۆنەی ڕۆژبوونی ڕێبەری گەلی کورد عەبدوڵا ئۆجالانەوە لە پارکی یەڵماز گونەی نەمامیان چاند و چالاکییەکە کۆتایی هات.