ئەنجوومەنی ژنانی ئەنقەرەی پارتی یەکسانی و دێموکراسی گەلان (دەم پارتی)، دژی سزای لەسێدارەدان بەسەر چالاکی بواری مافەکانی ژنان، پەخشان عەزیزی لە بەردەم باڵوێزخانەی ئێران چالاکی شەرمەزاری ئەنجامدا .

 تاتلگول گول، هاوسەرۆکی دەم پارتی ئەنقەرە لە چالاکیەکەدا ڕایگەیاند، حکومەتی ئێران بە شێوەیەکی نایاسایی سزای لەسێدارەدان بەسەر ژناندا دەسەپێنێت و بە جۆرێک تاوان ئەنجام دەدات.

 هەروەها تاتلگول گول ئاماژەی بەوەشکرد که هێرشه کان له باکوور و ڕۆژهەڵاتی سوریا له دژی دەستکەوتەکانی ژنان درێژەی هەیە و ڕایگەیاند، ئەم هێرشانه نەتەنیا لە سەر ژنانی ڕۆژئاوا هەڕەشەیە، بەڵکوو دژی تێکۆشانی ئازادیی هەموو ژنانی جیهانه.

 تاتلگول گول ڕایگەیاند، پێویستە دەستبەجێ سزای لەسێدارەدان کە بەسەر پەخشان عەزیزیدا سەپێندراوە، هەڵبوەشێتەوە و کۆتایی بە تاوانەکانی دژی ژنان بهێندرێت. هەروەها گول وتی: "ئێمە لە دژی ئەشکەنجەی زیندانیانی ئێڤین و هەموو جیهان دەنگی خۆمان بەرز دەکەینەوە."

هەروەها گول ئاماژەی بەوەشکرد، سزای لەسێدارەدان تاوانێکە دژ بە مرۆڤایەتییە و وتی: "پێویستە پەخشان عەزیزی دەستبەجێ ئازاد بکرێت.  بێدەنگی لە دژی سزای لەسێدارەدان تاوانە."