دانیشتوانی كه‌مپی شه‌هید ڕۆسته‌م جوودی له مه‌خموور به درووشمی «بكوژ ئه‌ردۆغان» خۆپیشاندانیان بۆ به‌رده‌م نوێنه‌رایه‌تیی نه‌ته‌وه‌یه‌كگرتووه‌كان كرد، دواتریش به‌شدارییان كرد له مه‌ڕاسیمی به‌خاكسپاردنی ته‌رمی شه‌هیدانی بۆردومانه‌كه‌ی شه‌وی ڕابردوو.
دانیشتوانی كه‌مپی په‌نابه‌رانی شه‌هید ڕۆسته‌م جوودی به‌یانیی ئه‌مڕۆ كاتژمێر ٨ له مه‌یدانی كه‌مپه‌كه كۆبوونه‌وه به‌مه‌به‌ستی به‌شداری كردن له خۆپیشاندان، مه‌ڕاسیمی ڕێزگرتن و به‌خاكسپاردنی ئه‌و ٤ ژنه‌ی به‌هۆی هێرشی فڕۆكه‌جه‌نگییه‌كانی سوپای توركیای داگیركه‌ر شه‌وی ڕابردوو شه‌هید بوون. مه‌خموورییه‌كان سه‌ره‌تا رێپێوانێكیان كرد بۆ به‌رده‌م نوێنه‌رایه‌تیی نه‌ته‌وه‌یه‌كگرتووه‌كان و هێرشه‌كه‌یان ئیدانه كرد. مه‌خموورییه‌كان به‌رووشمی جۆراوجۆر تووڕه‌یی خۆیان ده‌ربڕی و ئه‌ردۆغان و ڕژێمی توركیای داگیركه‌ریان به‌نه‌فره‌ت كرد.
«بێده‌نگیی نه‌ته‌وه‌یه‌كگرتووه‌كان جێی گومانه»
هاوسه‌رۆكی ئه‌نجومه‌نی گه‌لی مه‌خموور فیلیز بووداك له به‌رده‌م بینای نه‌ته‌وه‌یه‌كگرتووه‌كان لێدوانێكی ڕۆژنامه‌وانی دا و گوتی: «كه‌مپه‌كه‌مان له‌ژێر كۆنتڕۆڵی نه‌ته‌وه‌یه‌كگرتووه‌كان دایه، له‌به‌رئه‌وه هێرش بۆ سه‌ر كه‌مپه‌كه هێرشه بۆ سه‌ر نه‌ته‌وه‌یه‌كگرتووه‌كانیش، له‌گه‌ڵ ئه‌وه‌شدا نه‌ته‌وه‌یه‌كگرتووه‌كان هێشتا بێده‌نگه. ئه‌مه‌ش گومان و ترس لای ئێمه دروست ده‌كات.» بووداك داوای له هێزه نێونه‌ته‌وه‌ییه‌كان و هێزه كوردییه‌كان كرد دژی هێرشه‌كه ده‌نگی خۆیان به‌رز بكه‌نه‌وه.
s.m
