ڕۆژنامه‌نووسان له‌ به‌یاننامه‌ی ڕاگه‌یاندنی هه‌ڵمه‌ته‌كه‌ كه‌ وێنه‌یه‌كی بۆ بۆ ئاژانسی هەواڵی فوڕات نێردراوە ده‌ڵێن: جیاواز لە نەتەوە و بیروڕای سیاسی، ئێمە وەک کۆمەڵێک ڕۆژنامەنووس نیگەرانین لە سوکایەتییەکانی میدیاکانی تورکیا کە نووسینگە سەرەکییەکانیان لە ناو هەرێمی کوردستان و هەولێری پایتەخت دایە، لە نێویاندا ئاژانسی ئەنادۆڵی دەوڵەتی تورکیا، کە بەشی سۆرانی ئەو کەناڵە لە هەولێرەوە سوکایەتیی بە ڕەمزەکانی گەلانی ئازادیخواز و گەلی کورد بەتایبەت دەکات.

«ئەو میدیایەی فەرمی دەوڵەتی تورکیا، لە تەواوی هەواڵ و ڕاپۆرتەکانیدا بە ئاشکرا یاسا ناوخۆیی و نێودەوڵەتییەکانی میدیاییش دەبەزێنێت. لەم دۆخەدا کە لە ڕۆژئاوای کوردستان سوپای تورکیا هێرشی عەفرین دەکات، شەڕڤانان کە زۆرینەیان کوردن و هەموو نەتەوەکانی دیکەش تێیدا بەشدارن، هێرشی تورکیا ناکەن و تەنها بەرگری لە خۆیان و خاکەکەیان دەکەن. لە بەرامبەردا ئەنادۆڵی تورکیا بە تەواوی شەڕڤانان دەڵێت "تیرۆرست"، پێمانوایە پاشگری تیرۆرست بۆ شەڕڤانانی کورد سوکایەتییەکی ئاشکرایە بە تەواوی هەستی نەتەوەی کورد و گەلانی سوریاش دەکرێت، نیگەرانییەکەش ئەوەیە ئەو میدیایە لە هەرێمی کوردستانەوە و بەزمانی سۆرانی و بەبێ سانسۆر ئەو سوکایەتییانە بە کوردان دەکات.»

ڕاگەیەنەرانی هەڵمەتەکە له‌ به‌یاننامه‌كه‌دا ئاماژه‌ بۆ ئه‌وه‌ ده‌كه‌ن: دەوڵەتی تورکیا لە ناوخۆی وڵاتەکەیدا لە بواری ئازادی ڕادەربڕیندا کەوتووەتە بەر ڕەخنەی ناوەندە جیهانییەکان، بەتایبەت دژی ڕۆژنامەنووسانی کورد و نەیارانی حکومەتەکەی ئەردۆغان، سەدان دەزگای میدیایی کوردی داخراون و هەزاران ڕۆژنامەنووس زیندانی کراون، لەبەرامبەردا تەنها داواکاری ئێمە ئەوەیە، کە لایەنە پەیوەندیدارەکان پێش بەو سوکایەتییانە بگرن و بەپێی یاساکانی ناوخۆ و دەرەوە مامەڵە لەگەڵ ئەو میدیایەدا بکەن و چیتر ڕێگا بەو سوکایەتییانە نەدرێت لە ناوخۆی هەرێمی کوردستانەوە بە شەڕڤانانی کورد بکرێت.

له‌ كۆتایی به‌یاننامه‌كه‌دا ڕۆژنامه‌نووسان ڕایانگه‌یاندووه‌: ئێمە وەک ژماره‌یەک ڕۆژنامەوان کە ناومان لە خوارەوە هاتووە هەڵمەتی «#شەڕڤانان تیرۆرست نین، نا بۆ سوکایەتی بە گەلانی ناوچەکە»، ڕادەگەیەنین و  ڕۆژنامەنووسان و نووسەران دەتوانن لە ڕێگەی ئەم نانیشانەوە پشتیوانی خۆیان دەرببڕن،  لە کۆتاییشدا داواکاری ڕۆژنامەنووسان ڕادەستی وەزارەتی ڕۆشنبیری حکومەتی هەرێمی کوردستان و لیژنەی تایبەتمەندی پەرلەمان و سەندیکا و سەنتەرەکانی تایبەت بە ئازادی ڕادەربڕین دەکرێت.

ڕۆژنامه‌وانان ناونیشانێكی ئیمه‌یڵیان بڵاوكردۆته‌وه‌ و داوا له‌ ڕۆژنامه‌وان و نووسه‌ران ده‌كه‌ن به‌شداربن له‌ هه‌ڵمه‌ته‌كه‌ و ناوی خۆیان بۆ ئه‌م ئیمه‌یڵه‌ بنێرن: [email protected]

بەشدارانی هه‌ڵمه‌ته‌كه‌:
١-سۆران حسێن – ڕۆژنامەنووس - سلێمانی
٢--دڵشاد خۆشناو – ڕۆژنامەنووس و وەرگێڕ - سلێمانی
٣-ڕێزان محەمەد – ڕۆژنامەنووس – سلێمانی
٤-ئەیهان سەعید – ڕۆژنامەنووس – دهۆک
٥-دیاری محمد - ڕۆژنامەنووس - 
٦-سەلمان کۆچەری – ڕۆژنامەنووس - ڕانیە
٧-هەڵۆ مەرگەیی - ڕۆژنامەنووس - ڕانیە
٨-جبار عزیز - ڕۆژنامەنووس  - ڕانیە
٩-کارزان کریم – ڕۆژنامەنووس – هەولێر
١٠-هەژار ئەنوەر – ڕۆژنامەنووس – هەولێر
١١-مەریوان مەلا حەسەن – ڕۆژنامەنووس – هەولێر
١٢-هۆزان زوبێر – ڕۆژنامەنووس – سلێمانی
١٣-ئاوات پوری – نووسەر و ڕۆژنامەنووس - سلێمانی
 

هـ.هـ