ڕێکخراوەکانی ژنان و نوێنەری پارتە سیاسیەکان، بە مەبەستی ئیدانەکردنی هێرشە داگیرکەریەکانی دەوڵەتی تورک بە تایبەت هێرشە ئاسمانیەکەی سەر کونەماسی، ویستیان لەو ناوچەیە بەیانامەیەک بڵاو بکەنەوە، بەڵام لە لایەن ئاسایشی یەکێتیەوە رێگریان لێکردا.
تا دێت کاردانەوە و ناڕەزایتیەکان لە بەرامبەر هێرشە داگیرکاریەکانی دەوڵەتی تورکیا و بێدەنگی حکومەتی هەرێم لە بەرامبەر ئەو هێرشانە، فراونتر دەبیت، لە چوارچێوەی ئەو ناڕەزایەتی و کاردانەوانەدا، دوای نێوەرۆی ئەمرۆ نوێنەری کۆمەڵێک ڕێکخراوی ژنان و پارت و لایەنە سیاسیەکان سەردانی سەیرانگای کونەماسیان کرد کە لە ٢٥ مانگی حوزەیرانی ئەمساڵدا فرۆکەکانی تورکیا تێدا کۆمەڵکوژیان ئەنجامدابوو.
نوێنەری ڕێکخراوەکانی ژنان و پارت و لاینە سیاسیەکان ویستیان لە کونەماسیەوە هەڵوێستی خۆیان لە دژی داگیرکاری ڕابگەینن، بەڵام ڕووبەرووی رێگریەکانی ئاسایش و هێزە ئەمنیەکانی ناوچەکە بوونەوە، بە بەبیانوی نەبوونی مۆڵەت و رێگەیان پێنەدان لە شوێنی ڕووداوەکە بەیانامەیەک بڵاو بکەنەوە.
دواتر ڕێکخراوەکانی ژنان لەسەر ڕێگای نێوان سلێمانی و شارباژێر بەیانامەکەیان خوێندەوە و قسەیان بۆ ڕاگەیاندنەکان کرد، لەسەر ناوی هەموو ڕێكخراوەکان فایزە فواد قسەی کرد و وتی:" دڵگرانین بە ڕێگریەکانی ئاسایش، چالاکیەکانی ئێمە لە دژی داگیرکاری و هێرشەکانی تورکیایە، بەرانگاربوونەوەی داگیرکاریش مۆڵەتی ناوێت، چونکە کاتێک داگیرکەران هێرش دەکەنە سەرمان مۆڵەت لە کەس وەرناگرن."
هەروەها فایزە فواد وتیشی:" بە هەموو شێوازێک هێرشەکانی تورکیا شەرمەزار دەکەین، هەموو کەسێک هێرشکردنە سەر شەرف و کەرامەتی کوردستان و عێراق دەبینێت، داوا لە حکومەتی هەرێمی کوردستان دەکەین هەرچی زووە بێدەنگیەی لە بەرامبەر داگیرکەران بشکێنی، هاوکات حکومەتی عێراقیش دەبێت ڕێوشوێنی زیاتر بگرێتە بەر و ڕێگا نەدات جارێکیتر تورکیا سەروەری خاکی عێراق و هەرێمی کوردستان پێشەل بکات."
ز.ش
