کەجەدە بە بڵاوکردنەوەى راگەیاندراوێک یادى شەهیدانى ئەنفالی بەرز راگرت و سەرنجی خستە سەر ئەو کۆمەڵکوژییانە کە تاوەکو ئێستاش لە کوردستان ئەنجام دەدرێن. راشیگەیاند، دەبێت داگیرکەران و دیکتاتۆرەکان باجی ئەو تاوان و کۆمەڵکوژییانە بدەن.

لە راگەیاندراوەکەى کەجەدە دا هاتووە "سەدان ساڵە داگیرکەران و دیکتاتۆرەکان لە کوردستان کۆمەڵکوژی ئەنجام دەدەن. دیکتاتۆرەکان ئێستاش سیاسەتى سڕینەوە بەڕێوەدەبەن. کۆمەڵکوژیى ئەنفال، کە وەک پەڵەیەکى رەشە بە نێوچاوانى مرۆڤایەتییەوە ٣٣ ساڵی بەسەردا تێپەڕی.

١٤ی نیسانی ١٩٨٦ / ٢٥ی خاکەلێوە کۆمەڵکوژیى ئەنفال بە فەرمانى سەدام حوسێنى دیکتاتۆر دەستیپێکرد و تاوەکو ساڵی ١٩٨٩ بێ پسانەوە بەردەوامیى هەبوو و تیایدا ١٨٢ هەزار مرۆڤ شەهیدکران و لە گۆڕە بەکۆمەڵەکاندا شاردرانەوە. کاریگەری و زیانەکانى ئەو تاوانە دژ بە مرۆڤایەتییە تاوەکو ئێستاش بەردەوامیى هەیە.

کۆمەڵکوژیى ئەنفال نە یەکەم کۆمەڵکوژى بوو و نە دوا کۆمەڵکوژیش بوو، کە دەوڵەت و داگیرکەرانى کوردستان لە دژی گەلی کورد ئەنجامیان داوە. کۆمەڵکوژییەکانى قۆچگری، ئاگری، زیلان، دێرسیم، مەرەش و چەندین کۆمەڵکوژیى تریان ئەنجامدا و سیاسەتى کۆمەڵکوژیى لە قامیشلۆ، رۆبۆسکی، شەنگال، کۆبانێ، جزیر، سلۆپی، سوور، نسێبین، کەربۆران، گەڤەر و ئەمڕۆ لە عەفرین بە خاپورکردن و تاڵانکردنى شارەکان درێژەیان پێدەدرێت.

دەوڵەتە داگیرکەرەکان ئەو کۆمەڵکوژییانەیان بە پشتیوانى و هاوکاریى هێزە ئیمپریالیستەکان ئەنجامداوە، بۆیە هێزە نێونەتەوەییەکان هاوبەشی ئەو تاوان و کۆمەڵکوژییانەن.

بەڵام راستییەک هەیە، کە گەلەکەمان، گەلانى کوردستانى بەرخودێر و خۆڕاگر، هەرگیز بەرامبەر بە داگیرکەری و زۆرداری ملیان نەچەماندووە و خۆیان رادەست نەکردووە، بەڵکو هەموو کات خۆڕاگری و داکۆکییان کردووە. باجەکەشی هەر چییەک بوو بێت، بەڵام دەستبەرداری ئازادیى خۆیان نەبوون. لێرە دیکتاتۆرەکان و زۆردارەکان بەرامبەر بە مرۆڤایەتى رووڕەش و شەرمەزار بوون و بەرخودان و هەڵوێستى شکۆمەندانەى گەلی کوردستان ئومێد، بڕوا و ئازایەتیى بە هەموو گەلانى رۆژهەڵاتى ناوەڕاست بەخشیووە و دەستبەرداری ژیانى ئازاد و سەربەخۆییان نەبوون.

ئێمە بەو هەست و بڕوایەوە لە ٣٣هەمین ساڵیادی ئەنفال دا، ئەو کۆمەڵکوژییە بە توندی ئیدانە دەکەین. ئێمە لەو بڕوایەداین، کە هەموو بەرپرسیارانى ناوچەیى و نێونەتەوەیى حسابیان لێوەردەگیرێت و بە دڵنیاییەوە تێکۆشانی ئازادی و رزگاریمان بە سەرکەوتن تاجدار دەکەین و دەینەخشێنین".

ر.م