کەجەکە ساڵیادی شۆڕشی رۆژئاواى پیرۆز کرد و رایگەیاند "شۆڕشی رۆژئاوا باکوور – رۆژهەڵاتی سوریا، هێرشەکان چەند قورس دەبن با ببن، ئەوان دەزانن بەرەنگاری بکەن، هەموو کات دەبێتـە هیوای گەلانی رۆژهەڵاتی ناوەڕاست و دونیا".
هاوسەرۆکایەتیی دەستەى بەڕێوەبەری کۆما جڤاکێن کوردستان (کەجەکە) بە بۆنەى ساڵیادی شۆڕشی رۆژئاواوە راگەیاندراوێکى بڵاکردەوە.
لە راگەیاندراوەکەدا هاتووە "لە ٨هەمین ساڵیادی شۆڕشی رۆژئاواى کوردستاندا، بە خۆ بە قەرزادار زانین و رێزەوە یادی ئەو شەهیدانە دەکەینەوە، کە ئەو شۆڕشەیان بەدیهێنا و پاراستیان و گیانی خۆیان فیدا کرد، بۆ کەمئەندامانی ئەو شۆڕشەش کە بۆی تێکۆشاون سەرکەوتن بۆ ژیانیان دەخوازین".
شۆڕشی رۆژئاوا ١٩ی تەممووزی ٢٠١٢ لە کۆبانێ دەستیپێکرد و دواتر بە هەموو شارەکانی تری رۆژئاواى کوردستاندا بڵاوبوویەوە و بوو بە گەورەترین شۆڕش لە رۆژهەڵاتی ناوەڕاست دا و ئێستاش لە جیهاندا و لە مێژوودا جێی خۆی گرتووە. ئێمە جارێکیتر پیرۆزبایی لەوانە دەکەین کە ئەو شۆڕشەیان ئافراند".
لە راگەیاندراوەکەدا ئەوەش هاتووە "شۆڕشی رۆژئاوا بە تێکۆشانەی گەورەکەی ٢٠ ساڵەی رێیەر ئاپۆ لە رۆژهەڵاتی ناوەڕاست و سوریادا و لەسەر بنەمای پارادیگمای کۆمەڵگەى دیموکراتیک، ئیکۆلۆژیک و ئازادیپارێزی ژنەوە ئافرێنراوە".
هاوسەرۆکایەتیی دەستەى بەڕێوەبەریی کەجەکە رایگەیاند، پارادیگمای داهاتووی مرۆڤایەتى لە سەدەی ٢١ دا دیاری دەکرێت ئەوەش بۆ یەکەمجار لە شۆڕشی رۆژئاوادا هاتووەتە دی و راشیگەیاند "بۆیە دواى ئەوەى شۆڕشی رۆژئاوا بەدیهات، لە پێش هەموانەوە دەوڵەتى تورک و هەموو هێزە پاشکەوتوخوازەکان دەستیانکرد بە دژایەتیکردنی. دەسپۆتیزم (ملهوڕی) و دواکەوتویی رۆژهەڵاتی ناوەڕاست لە ناو شۆڕشی رۆژئادا مردنی خۆیان دەبینی. چەتەکانی وەک بەرەی نوسەر بە پشتیوانیی دەوڵەتى تورک و بە بەکارهێنانی بارەگاکانیان لە تورکیاوە هێرشیان کردە سەر هێزە شۆڕشگێڕەکانى رۆژئاوا بە تایبەتی سەرێکانی. دواى ئەوەى ئەو هێزە تێکشکێنرا، لە ساڵی ٢٠١٤دا لە رێگەی داعشەوە هێرشان کردە سەر شۆڕشی رۆژئاوا، شەنگال و باشووری کوردستان".
لە راگەیاندراوەکەى هاوسەرۆکایەتیی دەستەى بەڕێوەبەریی کەجەکەدا ئەوەش هاتووە:
"دەوڵەتى تورک لە رێگەى داعشەوە هێرشی کردە سەر کۆبانێ و خواستی بەو هێرشە شۆڕشی رۆژئاوا بخنکێنێت. تەیب ئەردۆغان بە قسەى "کۆبانێ دەکەوێت، لە کەوتندایە" هاوکاریی خۆی بۆ داعش بە شێوەکى ئاشکرا نیشان دا. کاتێک داعش بەهێز بوو و زۆرێک لە ناوچەکانى لە ژێر دەستدا بوو، ئەردۆغان ئەوەى نیشان دەدا، کە چەند دڵخۆشە پێیان. بەو شێوەیە ئەوەی خستەبەرچاوی هەموان کە ئەو بۆ خۆۆی خەلیفەى سەرەکیی داعشە، بەڵام لە پێش هەموانەوە گەلی باکووری کوردستان، هێزە دیموکراتیک و شۆڕشگێڕەکانى تورکیا و گەلانی دونیا لە کۆبانێ لەگەڵ هەزاران شۆڕشگێڕی رۆژئاوا بوونە یەک و لە بەرخودانی مێژوویی ٥ مانگەیان دا داعشیان تێکشکاند و کۆبانێیان ئازاد کرد. تێکشکاندن لە کۆبانێ بووە سەرەتایەک بۆ کۆتایهاتن بە داعش.
لە سەرکەوتنى بەرخودانی کۆبانێ دا، لە پاراستن و بەرەوپێشبردنی شۆڕشی رۆژئاوادا پشکی گەلی باکووری کوردستان زۆر گەورەیە. سەدان گەریلای هەپەگە و یەژاستار لەگەڵ سەدان لایەنگری پەکەکە روویانکردە ناو ریزەکانى بەرخودانی کۆبانێ. لەو بەرخودانەدا سەدان گەنجی باکووری کوردستان، سەدان گەریلای هەپەگە و یەژاستار شەهید بوون. بەرخودان لە پرسوس لەسەر سنووری کۆبانێ، لابردنی تێلەدڕەکاوییەکانی سەر سنوور و بە لێشاو راکردنی جەماوەری بەرەو ئەو بەرخودانە، بووە سیبمولی بەرخودانەکە، بۆیە لە پاراستن و بەرەوپێشبردنی شۆڕشی رۆژئاوادا پشکی پەکەکە و شەڕڤانە ئینتەرناسیۆنالیستەکان، کە لە هەر چوار لای دونیاوە بە خێرایی بەرەو ئەو بەرخودانە رۆیشتن، زۆر زۆرە. بەشداربوونی ئەو مرۆڤانە کە بڕوایان بە بۆچوونی رێبەر ئاپۆ هەبوو و بەشداریی ئینتەرناسیۆنالیستەکان لەو شۆڕشدا، رۆح و کارکتەری ئەو شۆڕشەى ئافراندووە. تاوەکو گیان و خوێن و رەنجی ئینتەرناسیۆنالیستەکان لە هەر چوار لای جیهانەوە و شۆڕشگێڕەکانی باکووری کوردستان نەبینرێت، تێگەیشتن لە رۆح، رێباز و کارکتەری شۆڕشی رۆژئاوا دروست نابێت.
شۆڕشی رۆژئاوا بناغەى شۆڕشی دیموکراتیکى رۆژهەڵاتی ناوەڕاستە
شۆڕشی رۆژئاوا نەک تەنها بناغەى شۆڕشی دیموکراتیکی سوریایە، بەڵکو هاوکات بناغەى شۆڕشی دیموکراتیکى رۆژهەڵاتی ناوەڕاستە. سیستمی ئازادیخوازی دیموکراتیک لە رۆژئاوا، لە رۆژهەڵاتی ناوەڕاستدا یەکسانی ئازاد و دیموکراسییە. شۆڕشی رۆژئاوا لە پێش هەموانەوە شۆڕشی ژنانە. لەو رووەوە لە جیهاندا بێ هاوتایە. شۆڕشی رۆژئاوا بە سیستمەکەى خۆی، بە کۆنفیدرالیزمی دیموکراتیک و بە هێڵی ئازادیخوازیی ژنان، کە پشتبەستووە بە کۆمەڵگەى دیموکراتیکى رێکخستنکراو، بووە بە پێشەنگی شۆڕشە دیموکراتیکەکانی سەدەی ٢١. لەبەر ئەو هۆکارەیە، کە گەلانی بندەست، زەحمەتکێشان، ژنان، گەنجان و هەموو هێزە دیموکراتیکەکان روویان لە رۆژئاوا کردووە. وەک شوێنێک، کە ژیانی سۆسیالیستی دیموکراتیک، کە پشتبەستوو نییە بە دەسەڵات و دەوڵەت، بەڵام بە کردەوە چووەتە ناو مێژووی مرۆڤایەتی و جێگە و پێگەى گرنگی خۆی چەسپاندووە.
شۆڕشی دیموکراتیک بە بیر و باوەڕی نەتەوەی دیموکراتیک لە هەموو سوریادا بڵاوبووەتەوە و بووەتە بناغەی دیموکراتیکى سوریا. ئەو کارکتەرە دیموکراتیکە بووە ئامانجی هێرشەکانى دەوڵەتى تورک، کە دواکەوتوترین و فاشیستترین هێزی رۆژهەڵاتی ناوەڕاستە. لە رووەوە شۆڕشی رۆژئاوا لە نێوان گەلانی جیهان و هێزە دیمکراتیکەکان و دەوڵەتى تورک دا بووە شەڕ. ئێستا گەورەترین بەهێزیی شۆڕشی رۆژئاوا کە نابێتە نسیبی هیچ شۆڕشێکى جیهان، ئەوەیە کە پشتیوانیکردنی گەلانی لە کۆڵ گرتووە. ئێستا گەورەترین هێزی شۆڕشی رۆژئاوا، قوڵبوونەوەیە لە کارکتەرە دیموکراتیکەکانی، بەرفراوانییەکەی و پشتوانیی گەلانی جیهان و دیموکراسی. شۆڕشی رۆژئاوا و باکووری رۆژهەڵاتی سوریا کە خاوەنی ئەو هێزەیە، هێرشەکانیش چەند قورس بن، ئەو دەزانێت بەرەنگاری بکات و بە دڵنیاییەوە هەموو کات دەبێتە هیوای رۆژهەڵاتی ناوەڕاست و گەلانی جیهان.
گەلی کورد لە هەر چوارپارچەى کوردستان و کوردان لە هەموو جیهان دا پاڵپشتی شۆڕشی رۆژئاوان. هێزی بەرخودانی شۆڕشی رۆژئاوا بێ هاوتایە. لەو چوارچێوەیەدا شۆڕشی رۆژئاوا و باکووری سوریا، کە بەرەنگاری دەکات، بە دڵنیاییەوە هێرشەکانى هەموو هێزە دواکەوتوەکان تێکدەشکێنێت، بە دڵنیاییەوە سوریا دەکاتە وڵاتێک، کە لە دیموکراتیکبوونی خۆیدا دەبێتە نمونە بۆ رۆژهەڵاتی ناوەڕاست".
ژ.ت
