سیسێ بینگۆل سەرباری تەمەنە زۆرەکەى لە زینداندا راگیراوە و چەند نەخۆشییەکى قورسیشی هەیە و ژیانى لە مەترسیدایە. سیسێ دەڵێت "دەمەوێت لە گوندەکەى خۆم لەسەر خاکی خۆمدا بمرم". ئیهادە بۆ ئازادیى دایکە سیسێ کەمپەینێکى دەستپێکردووە.
بەپێى ئاماری ناوەندی گشتیى کۆمەڵەى مافی مرۆڤ (ئیهادە) لە زیندانەکانى تورکیا و کوردستاندا ١١٥٣ زیندانیى نەخۆش راگیراون، کە نەخۆشیى ٤٠٢ کەسیان قورسە. یەکێک لەو زیندانیانە، کە نەخۆشیى قورسی هەیە و دۆخی تەندروستیى ناجێگیرە سیسێ بینگۆلیى تەمەن ٨٥ ساڵە. سیسێ بینگۆلی لە زیندانى جۆری تیى ژنان لە تارسوس راگیراوە.
سیسێ بینگۆلی نەخۆشییەکانى گەدە، شەکرە، تەنگیى هەناسە و زەختى هەیە. تواناى ئەوەى نییە بە تەنها کارەکانى ئەنجام بدات و بە تەنها بژی. بە هاوکاریى زیندانییەکانى تر کارەکانى ئەنجام دەدات و خۆی لەسەر پێ راگرتووە.
کاتێک سیسێ بینگۆلی دواى چەندینجار باری تەندروستیى تێکچوو و لە زیندانەوە برابوویە نەخۆشخانەى دەوڵەت لە موش، نەخۆشخانەکەش راپۆرتێکى لەبارەى سیسێ بینگۆلی ئامادە کردبوو و لە راپۆرتەکەیدا هاتووە "بەهۆی کێشەى تەندروستییەوە ناتوانێت لە زینداندا بمێنێتەوە"، بەڵام سەرباری ئەو راپۆرتە، لە راپۆرتی دەزگاى تەندروستیى ئیستەنبول دا ئیدعای ئەوە کرابوو، کە توانای مانەوەى لە زینداندا هەیە و لەبەر ئەوەش پێویست ناکات ئازاد بکرێت!. لەگەڵ ئەوەشدا دوورخرایەوە بۆ زیندانى تارسوس.
دەریا یڵدرم ئەندامى کۆمسیۆنى زیندانەکان لە ئامەد رایگەیاند، بینگۆل بەهۆی کێشەى تەندروستییەوە ناتوانێت لە زینداندا بمێنێتەوە و دەبێت بە خێرایى ئازاد بکرێت.
دەریا یڵدرم باسی ئەوەیکرد "سیسێ بینگۆل لە دوایین چاوپێکەوتنیدا لەگەڵ پارێزەرەکەى وتویەتى 'ئەگەر بڕیارە بمرم، ئەوا دەمەوێت لە گوندەکەى خۆم و لەسەر خاکی خۆم بمرم' و پێشێلکردنى مافی ژیانى مرۆڤێکى ئەوەندە بە تەمەن کە چەندین نەخۆشیى قورسی هەیە، نابێت بەردەوامیى هەبێت و نابێت لە زیندانیشدا رابگیرێت".
کەمپەینى ئیمزا کۆکردنەوە بۆ سیسێ بینگۆل
یڵدرم ئاماژەى بەوەکرد، هەندێکجار سیسێ بینگۆل هۆشی خۆی لە دەست دەدات بەو هۆیەوە ناتوانێت منداڵەکانى خۆیشی بناسێتەوە و لە هەوڵدان بۆ ئەوەى سەردانی بینگۆل بکەن.
دەریا یڵدرم ئەوەشی خستەڕوو، بۆ ئەوەى سەرنجەکان رابکێشنە سەر دۆخی سیسێ بینگۆل سەردانى دادگاى دەستووری دەکەن و دەستیش دەکەن بە کەمپەینێکى ئیمزا کۆکردنەوەى بۆ سیسێ بینگۆل.
ئەوەشی وت "هۆکارى زیندانییەکردنەکەى هەر چییەک بێت، هەر زیندانییەک کە نەخۆشی قورسی هەبێت لە زینداندا رابگیرێت ئەو پیشێلکردنى مافەکانى مرۆڤ و مافی ژیانە. دەبیت بە هەموو پێوەرێک سیسێ بینگۆل ئازاد بکرێت، بەڵام سەرباری ئەوەش ئازادی ناکەن. پێویستە سیسێ بینگۆل بە خێرایى ئازاد بکرێت".
سیسێ بینگۆل لە ٦ی نیسانی ٢٠١٦ / ١٨ی خاکە لێوە لە گوندەکەى خۆیدا لە گوندی بادانێ لە ناوچەى گمگمی موش لە کاتى هەڵکوتانە سەر ماڵەکەیدا دەستگیرکرا. لەو کاتەوە بە تۆمەتی "ئەندامبوون لە رێکخستن دا" لە زینداندایە.
ر.م
