رۆژی یەکشەممەی رابردوو  ١٥ی کانونی یەکەم (٢٥ی سەرماوەز) حەوت هاووڵاتی کوردی دانیشتووی سەرپێڵی زەهاو لە پارێزگای کرماشان لە ئەنجامی هەڵکوتانی هێزە ئەمنییەکانی دەوڵەتی ئێران بۆ سەر ماڵەکانیان و لە رێگەی بەکارهێنانی توندوتیژییەوە دەستبەسەرکران.

سەرباری تێپەڕبوونی هەفتەیەک بەسەر دەستبەسەرکردنی ئەو حەوت هاووڵاتیە و سەرەڕای بەدواداچوونەوەکانی بنەماڵەکانیان، کاربەدەستانی دەوڵەت لەبارەی شوێنی راگرتن و هۆکاری دەستبەسەرکردنیان هیچ زانیارییەک راناگەیەنن.

بەگوێرەی چەند زانیارییەک ئەو حەوت کەسە گواستراونەتەوە بۆ زیندانی دەزگای هەواڵگری کرماشان، بەڵام تائێستا رێگەیان پێنەدراوە چاویان بە پارێزەر و بنەماڵەکانیان بکەوێت.

ناوی ئەو حەوت کەسە بەم جۆرەیە: هێمن پاڵانی تەمەن ٢٥ ساڵ، خالید کەمەری تەمەن ٢٧ ساڵ، ئەیمەن سەفایی تەمەن ٢١ ساڵ، ئومێد ساڵحی تەمەن ١٧ ساڵ، عیرفان مورادی، کۆمار ساڵحی و پەیمان رەنجبەر.