هاوسەرۆکایەتی دەستەی بەڕێوەبەریی کۆنگرەی نەتەوەیی کوردستان (کەنەکە) بە هۆی هێرشە ئاسمانیەکەی سەر فڕۆکەخانەی کشتوکاڵیی عەربەت پەیامێک ئاراستەی سەردایەتی یەکێتیی نیشتمانیی کوردستان (یەنەکە) کرد.

لە پەیامەکەی کەنەکەدا هاتووە: "دوێنێ، (١٨-٠٩-٢٠٢٣) لە سلێمانی لە فڕۆکەخانەی عەربەت هێزەکانی دژەتیرۆر کرانە ئامانجی هێزە ئاسمانییەکانی دەوڵەتی تورک. لە ئەنجامی هێرشەکاندا ٣ پێشمەرگە شەهید بوون و ٣ پێشمەرگەی دیکەش بریندار بوون. ئەو هێرشە بە تەنیا بۆسەر یەکێتی نیشتمانی کوردستان نییە، بەڵکو هێرشە بۆسەر کوردستان و هەموو گەلی کورد.

ئەو هێرشە دژی سەروەری هەرێمی کوردستان و دەوڵەتی عێراقە. چەندین ساڵە دەوڵەتی تورکیا سەروەری هەرێم و عێراق پێشێل دەکات. ئەم دۆخە لەهەمانکاتدا پێشلکردنی هەموو نۆرم و رێسا نێودەوڵەتییەکانیشە. هەروەها دژی مافەکانی مرۆڤە. ئەو هێڕشانەی دەوڵەتی تورکیا بۆسەر گەلی کوردستان تاوانی شەڕ و تاوانی دژی مرۆڤایەتین. پێویستە رێگا لەو هێرشانەی دەوڵەتی تورکیا بگیرێت و تاوانباران سزا بدرێن. ئێمە بڕوامان وایە کە ئێوە بە وردی بەدوواداچوون بۆ دۆخەکە دەکەن. ئێمە وەک کۆنگرەی نەتەوەیی کوردستان بە هەموو شێوەیەک لەگەڵتانین و پشتگیریی سەرکردایەتی یەکێتی دەکەین.

بۆ هەموو ئەو شەهید و بریندارانە هاوخەمتانین و بە توندیش ئەو هێرشانە ریسواو شەرمەزار دەکەین. لە کەسێتی شەهیدانی فڕۆکەخانەی عەربەتدا هەموو شەهیدانی کوردستان بە شکۆوە بەبیردێنینەوە و سەری رێزیان بۆ دادەنەوێنین. سەرەخۆشی لە سەرکرایەتی، هەموو ئەندام و لایەنگرانی یەکێتی نیشتمانی کوردستان و کەس و کاری شەهیدان و هەموو گەلی کوردستان دەکەین. هیوای هەرچی زووتر چاکبوونەوەش بۆ برینداران دەخوازین".

هـ . ب