کۆمەڵەی مافەکانی مرۆڤی کوردستان (کەمەمەکە) ئاماری پێشێلکاریەکانی رژێمی ئێرانی لەبەرانبەر هاوڵاتیانی کورد لە ڕۆژهەڵاتی کوردستان بڵاوکردەوە و وتی، " بەهۆی ئەوەی ڕژێم ڕیگە بەکارکردنی ڕیکخراو و کۆمەڵەکانی مافی مرۆڤ نادات، نەیانتوانیەوە هەموو تاوانەکانی تۆمار بکەن."

ئاماری کۆمەڵەکە کە لەسەر ماڵپەڕی تایبەتی کۆمەڵەکە بڵاوکراوەتەوە بەم شێوەیەیە:

لەسێدارەدان

لەم مانگەدا سیاسەتی لەسێدارەدانی هاونیشتمانان درێژەی هەبووە بە شێوازێ کە لەم مانگەدا ٦کەس لەسێدارەدراون و سزای لەسێدارەدانیش بەسەر ٢ کەسدا سەپێنراوە.

تیرۆر و کوشتن و تەقەی ڕاستەوخۆ لە هاوڵاتیان لە لایەن حکومەتی ئێرانەوە درێژەی هەبووە. کە لەم چوارچێوەیەدا هاوڵاتییەک بە شێوەیەکی گوماناوی کوژراوە و هەروەها تەقە لە کۆمەڵێک لە هاوڵاتیان کراوە و لە ئەنجامدا ٢ کەس کوژراون و ٢ کەسیش بریندار کراون.

دەستبەسەری و زیندان

لەم مانگەدا شایەتی دەستبەسەری و زیندانی کردنی بەردەوامی هاوڵاتیان لە شنۆ، ورمێ، کرماشان، مەهاباد، خوڕەم ئاوا، ئیلام، هەمەدان و لوڕستان بووین.

بە پێی ئامارە کۆکراوەکان لەم مانگە ١٢٠ کەس لە هاوڵاتیان، چالاکانی مەدەنی و سیاسیی دەستبەسەر و زیندانی کراون، شیاوی باسە کە ٧ کەس ژن بوون.

لە درێژەی سەپاندنی حوکم گەلی زاڵمانە کە دژ بە نەتەوەی کورد دەبڕدرێنەوە، ١٦ هاوڵاتی بە ٤٧ ساڵ زیندان مەحکوم کراون.

کۆڵبەران و کاسبکاران

کۆڵبەرەکان وەکوو هەموو دەم دەکرێنە ئامانجی هێرشی ڕاستەوخۆی هێزە چەکدارەکانی سپای پاسدارانی ئێران کە وەکو ڕەوتێکی تیرۆریستی ناسراوە و هێزە سنورییەکانی ئێران لەم مانگەدا ٢ کۆڵبەریان کوشتووە و ٣٧ کۆڵبەریش بریندارکراون.

خۆکوژی

ژماری خۆکوژی و کوشتنی هاوڵاتیان ڕوو لە هەڵکشانە و بەتایبەتی لەنێو گەنجان و ژناندا.

لەم مانگەدا ١٤ هاوڵاتی کۆتاییان بە ژیانیان هێناوە. لەم ڕێژەیە ١١ کەس خۆیان کوشتووە و ٣ کەس بە گۆماناوی گیانیان لەدەستداوە.

مین

بە پێی ئامارە کۆکراوەکان لەم مانگەدا هاوڵاتییەکی کورد بە هۆی تەقینەوەی مین بریندار بووە."

ف.ق