لە ناوچەی مسریجی سێرت، دوای ١١ ساڵ، نەورۆز پیرۆزکرا. نەورۆز بە درووشمی "ڕێبەرێتی ئازاد و کۆمەڵگەی دیموکراتیک" لە گەڕەکی سومەر پیرۆزکرا. هەزاران کەس بەشداربوون و جلوبەرگی کوردیان پۆشی، درووشمی "بێ سەرۆک ژیان نابێ" و "بژی سەرۆک ئاپۆ" و "ژن ژیان ئازادی" بەرزکرایەوە.

لەسەر ناوی کۆمیتەی ئامادەکاری نەورۆز، ئەلفەسیا کوبیلای گوتی نەورۆز واتا ئاشتی و خوشک_برایەتی و تێکۆشان.

پەرلەمانتار سەباحەت ئەردۆغان ساریتاش تیشکی خستەسەر بانگەوازەکەی ڕێبەر ئاپۆ بۆ ئاشتی و ڕایگەیاند ئەم بانگەوازە بۆ تەواوی گەلانە، دەبێت هەمووان بەرپرسیاربن. گوتی: "نەورۆز بەرخۆدانە، ئاشتییەکی شکۆدارە، فەلسەفەیەکە. نەورۆزی بەڕێز عەبدوڵا ئۆجالان پیرۆزبێت".

پەرلەمانتاری دەم پارتی عومەر ئۆجالان کۆمەڵکوژییەکەی دوێنێی کۆبانێی بیرهێنایەوە، تیشکی خستەسەر بانگەوازە مێژووییەکەی ڕێبەر ئاپۆ و ڕایگەیاند ئاشتی لە جەنگ زەحمەتترە و بە دیپلۆماسییەکی بەهێزەوە تێدەکۆشن، گوتی: "پێویستە بەرامبەر هەموو هەوڵە ئاژاوەگێڕییەکان هۆشیاربین و بەو پێی هەنگاوبنێین. بەڕێز ئۆجالان سەبارەت بە ڕۆژهەڵاتی ناوەڕاست گوتی: "هێزی هەرە پتەو، کوردن". کورد پێشەنگایەتی بنیاتنانی دیموکراسی دەکەن. ئێمە بە هۆشیارییەوە دەجووڵێینەوە".

پاشان ئاگری نەورۆز کرایەوە و هاوڵاتیان بەدەوری ئاگرەکەدا هەڵپەڕین.