ئێوارەی دوێنێ، بەبۆنەی جەژنی نەورۆزەوە، لە لایەن دەزگای بنەماڵەی شەهیدانی مەخمورەوە یادی شەهیدان کرایەوە.

دانیشتوانی کامپەکە سەردانی گۆڕستانی شەهیدانیان کرد و بە خولەکێک ڕێزگرتن دەستیانکردن بە بەرز راگرتنی یادی شەهیدان. دوای ئەوە مۆمیان لەسەر مەزاری شەهیدان داگیرساند.

لە مەراسیمەکەدا ئەحمەد ئۆرهان باوکی شەهید خەبات مارینوس وتەیەکی پێشکەش کرد و وتی: "جەژنی نەورۆز جەژنی بندەستەکان و چەوساوەکانە. ئەو ئاگرەی کاوەی ئاسنگەر هەڵیکردووە تا ئەمڕۆ لەلایەن تەڤگەری ئازادیی کوردستانەوە گەشاوەتر دەکرێت. هەڤاڵ مەزڵوم دۆغان بە فیداکاری و تێکۆشانێکی بێ هاوتا بە ئاگری جەستەی خۆی ئەو تێکۆشانەى بڵند کرد و گەیاندییە بەرزترین لوتکە. لەو ڕۆژەوە تا ئەمڕۆ ئاگری سەرکەوتن لە شاخ و شارەکاندا ڕوو لە زیادبوون و گەشانەوە دەکات. ئێمە وەک گەلی کورد هەرگیز ڕێگە نادەین ئەم ئاگرە بکوژێتەوە. ئەم نەورۆزە لە سەرۆک ئاپۆ و شەهیدان و گەلی کورد پیرۆز دەکەین".

مەراسیمەکە بە وتنەوەی دروشمەکانی "شەهید نامرن" و "بژی سەرۆک ئاپۆ" کۆتایی پێهات.

ژ.ت