پلاتفۆرمی رێکخراوە دیموکراتیکەکانی بۆ گردبوونەوەی ١٧ی تشرینی دووەم لە ئێلیح نەخشەڕێگەی "دیموکراسی و ئازادی"یان راگەیاند. راگەیەندراوەکە لە هۆڵی سەندیکای پەترۆڵ ئێشە خوێندرایەوە. هاوسەرۆکانی گشتیی پارتی هەرێمە دیموکراتیکەکان (دەبەپە) چیدەم کلیچگون ئوچار و کەسکین بایندر، پەرلەمانتارانی پارتی یەکسانی و دیموکراسیی گەلان (دەم پارتی)، چالاکوانانی بزوتنەوەی ژنانی ئازاد (تەژەئا)ش ئامادەی ئاشکراکردنی نەخشەڕێگەکەبوون. لە شوێنی کۆنفڕانسە رۆژنامەوانیەکەدا پلاکاردی "لە پێناو وڵاتێکی دیموکراتیک ئێمە رێپێوانی گەورەی ئازادی ساز دەکەین" هەڵواسرابوو.

لە نەخشەڕێگەکەدا ئاماژە بە کێشە و قەیرانەکان لە جیهان، رۆژهەڵاتی ناوەڕاست و تورکیا کراوە، بە تایبەتی تیشک خراوەتە سەر دۆخی شەڕی جیهانی سێهەم کە لەئارادایە و بەهۆی سوڕی توندوتیژی و چەوساندنەوە کە گەیشتووەتە ئاستێکی وێرانگەر و کۆمەڵگە، ژینگە و سەرجەم کایەکانی ژیانی تووشی داڕووخان کردووە.

لەو رووەوە ئاماژە بەوەکراوە، کە "عەقڵیەتی نەتەوە-دەوڵەت ئەو گەلانە بە گژ یەکتردا دەکات کە هەزاران ساڵە لەم ناوچەیە بەشێوەی ئاشتیانە پێکەوە ژیاون. بۆیە دەرکەوتووە تاکە رێگەی چارەسەری ئەو قەیرانانە ئەوەیە کە گەلان بە دەستی خۆیان کێشەکانیان چارەسەربکەن. لەو چوارچێوەدا پاڕادایمی نەتەوەی دیموکراتیک و کۆنفیدڕاڵیزمی دیموکراتیکی بەڕێز عەبدوڵا ئۆجالان بۆ چارەسەری کێشەکانی مرۆڤایەتی دەرفەت و شانسێکی گەورە پێشکەش دەکات".

هەردەربارەی دۆخی تورکیا و ئەو قەیرانە کەڵەکەبووانەی گیرۆدەیانە، ئاماژە بەوەکرا کە "سەرچاوەی ئەو کێشانە چارەسەرنەکردنی پرسی کورد و نکۆڵیکردن لە گەلی کوردە، بۆیە چیتر دەووڵەتی تورک ناتوانێت کێشەی کورد پشتگوێ بخات. بۆ ئەوەی کێشەی کورد بگاتە چارەسەری تائێستا بەڕێز عەبدوڵا ئۆجالان چەندین جار ئیرادەی نیشانداوە. بەڵام هەموو جارێک ئەو شانس و دەرفەتە لەلایەن دەوڵەتەوە لەباربراوە. لە بری چارەسەری، دەوڵەت بە سیاسەتی ئینکار قەیرانەکانی قووڵتر کردووەتەوە. پرسی کورد گەیشتووەتە ئاستێکی حەقیقەت کە سەرباری هەموو نکۆڵی، رەتکردنەوە، گوشار و کۆمەڵکوژییەکانیش ئەمڕۆ جارێکی تر پێویستی چارەسەرکردنی لە رۆژەڤدایە.

لەو چوارچێوەدا ماوەیەکە دەسەڵاتی ئاکەپە-مەهەپە بە شێوەیەکی تاکلایەنە باس لە پرسی کورد دەکات. پاڵنەر و هۆکارەکەی هەرچییەک بێت، ئەو مشتومڕ و گفتوگۆیانەی لەسەر چارەسەری پرسی کورد دەستیان پێکراوە ئەرێنی و گرنگن. دەبێت سەرجەم هێزە سیاسی و کۆمەڵایەتیەکان بە شێوەیەکی ئەرێنی مامەڵە لەگەڵ ئەو گفتوگۆ ومشتومڕانە بکەن. لە چارەسەری پرسی کورددا رۆڵی رێزدار عەبدوڵا ئۆجالان سەرەکیە. بەو بۆنەوە لێدوانی بەڕێز ئۆجالان 'گۆشەگیری بەردەوامە، ئەگەر هەلومەرج بڕەخسێندرێت، ئەو هێزەم هەیە کە پرۆسەکە لە زەمینە و بواری شەڕەوە بگوازمەوە بۆ بواری سیاسی و یاسایی'. ئەمەش خاوەن واتایەکی گەورە و مێژوویە. وەک دەزانرێت لە پرۆسەکانی رابردوودا بەڕێز ئۆجالان لە راگەیاندنی ئاگربەست، دیالۆگ و دانوستاندا رۆڵی گەورەی گێڕا و کاریگەری خۆی لەسەر چارەسەری نیشاندا. ئەمرۆش گەلی کورد پشتئەستورە بە سیاسەت و تیۆرییەکانی بەڕێز ئۆجالان و دەڵێت 'بەڕێز ئۆجالان موخاتەب و بەردەنگی چارەسەری و ئاشتییە'. هەروەها سیاسەتی کورد بە هەموو پێکهاتەکانیەوە رایگەیاند کە بۆ چارەسەرییەکی هەمیشەیی بەردەنگ بەڕێز ئۆجالانە و دەبێت هێزە سیاسیەکان بەرپرسیارێتیە کۆمەڵایەتیەکانیان بەجێبگەیەنن. "

لە بەشێکی دیکەی نەخشەڕێگەکەدا هاتووە، "دەزانین کە قەیرانە کۆمەڵایەتی، سیاسی و ئابوورییەکان کە دەرەنجامی گرتنەبەری سیاسەتی ئەمنیین، بە دڵنیاییەوە کۆتایی بەم دەسەڵاتە دەهێنن. ئەمڕۆ گەلی کورد و گەلانی تورکیا چاویان لەوەیە کە دەسەڵاتداری ئاکەپە-مەهەپە لەسەر پرسی کورد راستگۆ و روون بن. رێگەی ئەوەش بریتیە لەوەی بەگوێرەی دەستوری هەمیشەیی و پێوانە یاساییە گەردوونیەکان گۆشەگیری لە ئیمراڵی هەڵبگرێت، هەلومەرجی تەندروستی، سەلامەتی و ئازادی بەڕێز ئۆجالان مسۆگەر بکات. هەروەها دەبێت سازبکرێت کە بەڕێز ئۆجالان لەپێناو دەستەبەرکردنی چارەسەرییەکی دیموکراتیک هەوڵەکانی بخاتەگەڕ."

لە کۆتایی راگەیەندراوی نەخشەڕێگەکەدا هاتووە: " لەسەر ئەو بنەمایە بە ئامانجی بەرەوپێشبردنی رێگە و رێبازی چارەسەری دیموکراتیک ئێمە ١٧ی تشرینی دووەم لە ئێلیح گردبوونەوەیەک ساز دەکەین. لە بەرامبەر سیاسەتی قەیومدانان، لە بەرامبەر ئەو سیستمەی کە ئاشتی و دیموکراسی بەدیلگرتووە، لە بەرامبەر سیاسەتی تاکڕەوانە، رۆژ رۆژی فراوانکردنی تێکۆشانی ئازادییە. بەو بۆنەوە سەرجەم ژنان، گەنجان، رەنجدەران و گەلانی بندەست بانگهێشت دەکەین بۆ بەشداری لە گردبوونەوەی گەورەی دیموکراسی و ئازادی. وەرن پێکەوە لە دژی ستەم دەنگمان هەڵبرین و تێکۆشانی ئازادی گەشتر بکەین".