سوپای عێراق لە ۲۰ی ئایارەوە بە هێزێکی زۆر، کە پێکهاتبوو لە زرێپۆش و ئۆتۆمبێلی سەربازی هەوڵیاندا بچنە ناو کەمپی شەهید ڕوستەم جودی لە مەخمور و دەست بکەن بە تەلبەندکردنی کامپەکە و دروستکردنی بورجی چاودێری بە دەوری کامپەکەدا.

لە بەرامبەر ئەوەدا خەڵکی چوونە بەردەم ئەو هێزانە و ڕایانوەستاندن. لە ئێوارەدا سوپای عێراق هێرشی کرد و لە ئەنجامدا ٢ کەس بریندار بوون.

ئەوە بۆ سێ ڕۆژ دەچێت، کە خەڵکی مەخمور چادریان هەڵداوە و و دەستیان بە پاسەوانی کردووە.

بەپێی زانیارییەکان، هەر چوار لای کامپەکە بە ئۆتۆمبێلی زرێپۆش گیراوە و هەر چەند مەترێک ئۆتۆمبێلێکی زرێپۆش جێگیرکراوە.

لەبەر ئەوەش خەڵکی مەخمور لە چەند شوێن دا چادریان هەڵداوە و سوورن لەسەر ئەوەی ڕێگە نەدەن سوپای عێراق بۆ تەلبەندکردن و دروستکردنی بورجی چاودێری بچێتە ناو کامپەکەیان.

لە ماوەی سێ ڕۆژی ڕابردوودا خەڵکی کامپەکە لە چادرەکاندا بە شەو و ڕۆژ دەستیان کردووە بە پاسەوانی. لە لایەکی ترەوە، کۆبوونەوە لەگەڵ بەرپرسان ئەنجام دەدرێت تاوەکو کۆتایی بەو دۆخە بهێنرێت.

بەپێی زانیارییەکان، ڕێگری لە ڕۆژنامەنووسان کراوە و ڕێگایان پێنادرێت بچنە ناو کەمپەکەوە و ڕووماڵی ڕووداوەکان بکەن.

لە لایەکی ترەوە، سوپای عێراق بە تەواوی ڕێگای مەخموری داخست. لەگەڵ ئەوەشدا، مەترسییەکی گەورە بۆ خەڵکی مەخمور دروستبووە، کە هەزاران ژن و منداڵی تێدایە. هەروەها نەخۆشی درێژخایەن لە کەمپەکەدا هەیە. ئەمەش مەترسیی دەروونیی دروستکردووە.

ژ.ت