ناوەندی ڕاگەیاندنی هێزەکانی سوریای دیموکراتیک (قەسەدە) دەربارەی چالاکییەکەی هێزەکانی مەجلیسی سەربازیی مەنبەج دژی مۆڵگەی چەتەکانی دەوڵەتی داگیرکەری تورک لە گوندەواری ڕۆژئاوای مەنبەج ڕاگەیاندراوێکی بڵاوکردەوە.

قەسەدە دەڵێت: " لە چوارچێوەی وەڵامدانەوەی هێرش و تاوانەکانی دەوڵەتی داگیرکەری تورک و چەتەکانی و لە دوایینیشدا کۆمەڵکوژی گوندی "فاتسە" لە ڕۆژهەڵاتی ناوچەی عەین عیسا، ٣ منداڵ کوژران، لە کۆمەڵکوژی دووبارەی دژی گەلی کۆچبەرمان لە هەرێمی شەهبا و وەک تۆڵەسەندنەوەی شەهیدانی گوندی "عەبدوکێ"، هێزەکانمان بە هەموو یەکە سەربازییەکانیان زنجیرەیەک چالاکیی سەرکەوتوویان ئەنجامدا. لەو چالاکییانەدا مۆڵگەی داگیرکەران و چەتەکانیان لە ناوچە داگیرکراوەکانی باکوری سوریا کرانە ئامانج.

ئاماری چالاکییەکان

لە ٢٤ی ئەم تشرینی دووەم، هێزەکانمان لە مەجلیسی سەربازی مەنبەج چالاکییەکی تایبەت و بەرفراوانیان ئەنجامدا. لەو چالاکییەدا مۆڵگەی چەتەکانی سوپای تورک لە گوندی بوەیهیج ئەلعەجەمی کە دەکەوێتە ڕۆژئاوای شاری مەنبەج، لەلایەن شەڕڤانانمانەوە کرایە ئامانج. لەم چالاکییانەدا تاکتیکی هەڵکوتانە سەر و نیشانەشکێن و بۆسەدانان بەکارهێنرا و لە ئەنجامدا مۆڵگەی چەتەکان و ئۆتۆمبێلە سەربازییەکانیان تێکشکێنران. هەروەها دەست بەسەر ژمارەیەک لە چەکەکانیاندا گیرا.

ئەم چالاکییە کە بە سەرکەوتوویی ئەنجامدرا، مۆڵگەیەکی تایبەتی کردە ئامانج. هێزەکانمان چوونە ناو مۆڵگەی چەتەکان و تاروماریان کردن. لەوێ شەڕێکی دژوار ڕوویدا و لە ئەنجامدا شەڕڤانانمان ترسێکی گەورەیان لە دڵی چەتەکاندا چاند. بەم شێوەیە هێزە چەتەکان بڵاوەیان کرد و ژمارەیەکیان کاتێک هەوڵیاندا لە لێدانی شەڕڤانانمان ڕزگاریان بێت، کەوتنە بۆسەیەک و گورزی توندتریان خوارد.

شەڕڤانانمان کە لە سەرەتای شەڕەوە دەستپێشخەریی هێرشیان لە دەست خۆیاندا هێشتەوە، ڕیزەکانی چەتەکانیان بڵاوەپێکرد و نەیانهێشت کە دووبارە خۆیان کۆبکەنەوە. هەروەها هەوڵی هەڵاتنیان ڕزگاری نەکردن لە گورزی شەڕڤانانی ئێمە. دوای ئەوەی چالاکییەکە گەیشتە ئامانجی خۆی، شەڕڤانانمان چوونە سەر تەرمی هەموو چەتەکان کە لەناوەوە و دەرەوەی مۆڵگەکە کوژرابون. ئەم گرووپە چەتەیەی کە فەرماندەکانیان هەڵاتن، ئیرادەی شەڕکردنیان شکا و بەتەواوەتی تێکشکێنران.

لە ئەنجامی ئەم چالاکییەکەدا ١٧ چەتە کوژران کە هەندێکیان فەرماندە بوون و ٦ چەتە بە سەختی برینداربوون. هاوکات ٢ ئۆتۆمبیل و ٣ مۆڵگەی سەربازی تێکشکێنران و شەڕڤانەکانمان ٩ چەک لەوانەش تۆپهاوێژ و ژمارەیەک بەڵگە و تەلەفۆنی چەتەکانیان دەست بەسەردا گرت.

ئەم چەتانە کە پاشماوەی ڕێکخراوی تیرۆریستی داعشن و خراپەکاری گەورەیان لە هەرێمەکەدا ئەنجامداوە، هەروەها لە شاری باب ناڕەزایەتیی جەماوەری لەدژی ئەوان بەڕێوەچوو، وە ئێش و ئازاری زۆریان بۆ گەلەکەمان هێنا، لەکۆتاییدا بە چارەنووس و سزای پێویستی خۆیان گەیشتن.

دوای کۆتایی هاتنی چالاکییەکە و گەیشتن بە ئامانجەکانی، شەڕڤانانمان بەبێ هیچ زیانێک گەڕانەوە بۆ بنکەکانی خۆیان.

ئێمە وەک هێزەکانی سوریای دیموکراتیک (قەسەدە) چەندین جار جەختمان لەوە کردووەتەوە کە مافی ڕەوای خۆمانە بەرامبەر هەر جۆرە هێرش و تاوانێکی داگیرکەر و چەتەکانی وەڵامی گونجاو بدەینەوە. لەسەر ئەو بنەمایە، کات و شوێنی گونجاومان هەڵبژارد و وەڵامی پێویستمان بە داگیرکەران و نەیارانی گەلەکەمان دا. ئەم چالاکییە نیشانەی دڵسۆزی و قارەمانێتی شەڕڤانانمان بوو بۆ پاراستنی گەلەکەمان و تۆڵەسەندنەوەی ئەو تاوانانەی کە داگیرکەر بەرامبەر گەل ئەنجامی داوە. بەم بۆنەیەوە پیرۆزبایی لەو شەڕڤانانەمان دەکەین لەم چالاکییەدا بەشداربوون، شانازی و سەربەرزی خۆمان بە چالاکییەکەیان نیشان دەدەین. ئەم چالاکییە لە لاپەڕە شکۆدارەکانی تێکۆشانمان دژی پاشماوەکانی داعش و چەتەکانی دەوڵەتی داگیرکەری تورک دەنووسرێتەوە.