"لەپێناو سەرخستنی نرخ و بەهاكانی كۆمار و ئامانجەكانی ئاستی تێكۆشانی خۆمان بڵندتر دەكەین و لەهەمانكاتیشدا پاراستنی دەسكەوتەكانی گەلەكەمان لەهەرچواربەشی كوردستان بە ئەركی لەپیشینەی خۆمان و هەر تاكێكی كوردی دەزانین".
ئەندامی ئەنجوومەنی پارتی ژیانی ئازادی كوردستان – پەژاک ئامەد شاهۆ؛ لەكەسایەتی شەهیدانی كۆماری كوردستان و شەهیدانی بزووتنەوەی ئازادیخوازی گەلی كوردستاندا و بەبۆنەی ساڵیادی دامەزراندنی كۆماری كوردستان و راگەیاندنی خۆبەرێوەبەری رۆژئاوای كوردستان لەو رۆژەدا؛ پیرۆزبایی لەگەلی كورد و كوردستانیان كرد و رایدەگەیەنێت؛ لەپێناو سەرخستنی نرخ و بەهاكانی كۆمار و ئامانجەكانی ئاستی تێكۆشانی خۆمان بڵندتر دەكەین و لەهەمانكاتیشدا پاراستنی دەسكەوتەكانی گەلەكەمان لەهەرچواربەشی كوردستان بە ئەركی لەپیشینەی خۆمان و هەر تاكێكی كوردی دەزانین.
ئامەد شاهۆ تیشك دەخاتە سەر ئامانجی ناڕەزایەتیەكان و سەرچاوەی قەیرانە كەڵەكەبووەكان لە ئێران و رۆژهەڵاتی كوردستان و لەهەمانكاتدا تێكۆشانی بێ وچانی گەلان و لەنێویاندا گەلی كورد دەكات و روانگەی پەژاك بۆ پرسە كۆمەڵایەتیەكان لەنێویاندا؛ پرسی ئاین و باوەڕیەكانی شی دەكاتەوە و دەڵێت؛ قەیرانی بنەڕەتی ئێران؛ لادانە لەو بەهایانەی لەكاتی سەرهەڵدانی شۆڕشی ئاینی ئیسلام و پەیماننامەی مەدەینە كە بەپێشەنگایەتی پەیامبەر محەمەد بۆنیادنراوە. رژێمی داگیركەر و دیكتاتۆری ئیسلامی ئێران هیچ گوێ بەو پێوانانەی ئیسلامی لەسەر بۆنیادنراوە نادات و دەسەڵاتە فاشیستی و دیكتاتۆریەكەی وەكوو دەسەڵاتی رەها و خۆیان بەنوێنەری خوای سەر زەوی پێناسە دەكەن. ئەم نزیكبوونەوەی رژێم هەم لەگەڵ بنەما پیرۆزەكانی ئاینی ئیسلامدا كە لەلایەن گەلەوە وەكو ئیسلامی كەلتوری"چاندی"پەیڕەو دەكرێت ناكۆك و ناتەبایە؛ هەر ئەمەش بووەتە هۆكاری تەشەنە سەندنی قەیران و ناكۆكیەكانی ئێران و بۆ بۆنیادنانی سیستەمێكی دیموكراتیك پێویستە خوێندنەوەیەكی نوێ بۆ لایەنە هزرییەكانی ئەو سیستەمەش بكرێت؛ و وەكو پەژاكیش؛ ئێمە باوەڕیمان بەپراكتیزەكردنی پەیماننامەی مەدەینە و ئیسلامی چاندییە و تاكە بزوتنەوەین؛ بەراشكاوانە باسمان لەبەستنی كۆنگرەی ئیسلامی دیموكراتی كردوە.
لەبەرنامەی هەفتانەی هێڵی سێی تەلەفزیۆنی ئاریەن تیڤیدا ئامەد شاهۆ ئەندامی ئەنجوومەنی پارتی ژیانی ئازادی كوردستان - پەژاک تیشك دەخاتە سەر نزیكبوونەوەی رژێمی داگیركەر و فاشیستی ئێران لەسەر ئایین و باوەڕیەكانی كۆمەڵگە و دەڵێت؛ یەكێتیی نەتەوە موسلمانەكان بەواتای باڵادەستی نەتەوەیەك بەسەر نەتەوەیەكی تر نییە. هەموو گەلانی ئێران بەبێ جیاوازی دەتوانن بەیەكەوە و بەشێوەیەكی ئاشتییانە بژین و خۆیان بەرێوە ببەن. لەهەمانكاتدا لەسەر جیاوازی ئیسلامی دەوڵەتی كە لەلایەن رژێمی ئێرانەوە بەسەر گەلاندا دەسەپێندرێت و ئیسلامی دیموكراتیك نرخاندنی گرنگ دەكات.
ئامانجی بنەڕەتی ئیسلام، رزگاركردنی مرۆڤایەتیە
ئامەد شاهۆ دەڵێت: "ئامانجی سەرەكی ئیسلامیەت، رزگاركردنی مرۆڤایەتییە. رزگاركرنی مرۆڤایەتی لەكوێلایەتی و جەهالەتە. بەڵام هێزە دەسەڵاتدارەكان دەیانەوێت بەكارهێنانی ئیسلام بۆ مەرامە گڵاوەكانیان مرۆڤایەتی بكەنە كوێلە و ژێردەستە. مرۆڤایەتی لەنێو نەزانیدا دەهێڵنەوە. ئەو مرۆڤانەی بەدوای ئازادی و ئاگاهیەوەن دەستبەسەر دەكەن، سزا دەدەن و دەكوژن. گەڕانەوە بۆ سەر رێ و رێباز و ناوەڕۆك و گەوهەرەی ئیسلام كە خۆی لەخۆیدا دیموكراتیكە، رێگە لەبەردەم نانەوەی كێشە و ململانێ لەرۆژهەڵاتی ناوین و جیهان دەگرێت. ئەوەی كە بەدڵ و گیان خاوەنداری راستی و گەوهەری ئیسلام كردووە، گەلی كوردە؛ چونكە گەلی كورد تا ئێستا یەكێتی گەلانی ئیسلامی دەپارێزێت و خاوەنداری لەو بیروباوەڕییە دەكات. لەزەردەشتیەت، یارسانی و ئێزیدایەتی و عەلەویەتدا ئەو گەوهەرە پارێزراوە. نەتەوەیەك، دینێك یا خود باوەڕیەك بەلەناوبردنی ئەوی تر گەورە نەبووە، بوونیان گرێدراوی یەكترە. بەڵام هێز دەسەڵاتدارەكان لەئێستادا لەسەر بنەمای لەناوبردنی ئەوی تر خۆیان بەهێز و گەورە دەكەن. جیاوازی رژێمی داگیركەری ئێران، واتا خامنەیی، رەئیسی و سەلامی لەگەڵ یەزید، مەعاویە، حەجاج بن یوسف و ئەبو جەهل چییە؟ ئەوانە هەموویان مەعاوییە و حەجاجی نوێن. بۆ ئەوەی باڵادەست بن، بەئاسانی بەهۆی بابەتێكی وەكو سەرپۆش، مرۆڤێكی كورد لەسێدارە دەدەن. ئەو دەوڵەت و ئەو رژێم و سیستەمە كە ئێران بەرێوەی دەبات لەبنەماكانی ئیسلام لای داوە. دەوڵەت نەتەوە كە فۆرمی نوێ ئەو لادانەیە، تا دوایی فاشیست و دیكتاتۆریەت تەشەنە پێ دەدات. گەلی كورد بەهۆی تایبەتمەندی دیموكراتیك، یەكسانی و ئازادیخوازیخوازی خۆی خاوەنداری لە فرە كەلتووری، پێكەوەژیانی ئازادانەی گەلان و یەكسانی كردووە. بەهۆی پاراستنی ئەو نرخانە، بەهەزاران شۆڕشگێڕ لەكوردستان سەریانهەڵداوە. وەكو نموونە؛ ئەبو مۆسلم خۆراسانی كە لەبەرامبەر خانەدانی ئەمەوییەكان وەستاوەتەوە. سەلاحەدین ئەیوبی لەو چوارچێوەیە تێكۆشانی بەرێوە بردوە. هاوكات شێخ سەعید، سەید رەزا، قازی مەحەمەد، كەسایەتی وڵاتپارێز و دینی بوون. لەچوارچێوەی باوەڕی خۆیاندا تەسلیمیەتیان پەسەند نەكردووەو خیانەتیان بە ئیسلامی کولتووری نەکردووە. واتا لەبنەڕەتدا كوردان هیچ كاتێك خیانەتیان لەئیسلامیەتی سەردەمی حەزرەتی محەمەد نەكردووە. خیانەت لە نەتەوە و شووناسی خۆیان نەكردووە و ویستیان هەمیشە بەشێوەیەكی ئازاد و دیمۆكراتیك بژین و باوەڕییان بەوە هەبووە. بۆ پاراستنی باوەڕیەكەشیان تا دوا هەناسە تێکۆشانون و لەپێناو مەرامەکەیان چوونەتە بەردەم پەتی سێدارە.
دەبێت مزگەوتەكان بكرێنە ناوەندی تێكۆشان دژ بەرژێمی داگیركەری ئێران
ئەندامی ئەنجومەنی پەژاك لەبەردەوامی ئاخاوتنەكانیدا ئاماژە بە رۆڵی ئیسلامی دیموكراتیك و دیموكراتیزەكردنی ئیسلام دەكات و دەڵێت: "نرخاندنی ئیسلامی دیموكراتیك و ئیسلامی دەوڵەتی لەم قۆناخەدا گرنگە؛ چونكە هێزە هەرێمی و جیهانیەكان بەگوێرەی بەرژەوەندیەكانی خۆیان پێناسەی دین و هزر و باوەڕیەكان دەكەن. ئەو پێناسەیەش لەپێناو گرنگی بەرژەوەندیەكانیانە. لەژێر ئەو پێناسانەدا بەتایبەتی لەسەر جۆگرافیای رۆژهەڵاتی ناوین، دەوڵەت نەتەوە باوەكان كۆمەڵكۆژی گەلان پێكدێنن. ئەوەی بەراستی خاوەنداری لەئیسلامی كەلتوری، چاندی و دیموكراتیك دەردەكەوێت گەلانی ئازادیخوازن. لەسەرەتای دەركەوتنی هزری ئیسلامیەت تا ئێستا خاوەنداری و تێكۆشان بۆ پاراستنی ئەو باوەڕیە بەرێوە دەچێت و لەئەنجامدا نرخ و بەهاگەلێك خوڵقاوە. ئیسلامی دیموكراتیك، ئیسلامێكی ئازادیخواز، یەكسانیخواز و دادپەروەرە. لە گەوهەری ئیسلامدا یەكێتی و باوەڕی و پێكەوە ژیانی گەلان بوونی هەیە و ئامانجی بنەڕەتیش ئەوەیە. نەتەوەیەك، نەتەوەیەكی تر لەناو نابات. حەزرەتی محەمەد فەرموویەتی: "هیچ نەتەوەیەك لەسەر نەتەوەیەكی دیكەوە نییە" واتا نەتەوەی عەرەبیشی نەكردە دەسەڵاتدار بەسەر نەتەوەكانی فارس و ئازەری و توركەوە. بە یەكچاو سەیری هەموو نەتەوەكانی کردووە. لەئایەتی قورئانیشدا هاتووە، "ئێمە ئێوەمان بەفۆرم و شێوەی كلان و قەبیلە و عەشیرەی جیاواز ئافراندوە و هیچ جیاوازیەكیش لەنێوان ئێوەدا نییە". ئەو ئایەتە "فەرموودەیە" پێناسەی یەكێتی گەلانی موسلمانە. ئەوەش ئیسلامی دیموكراتیك و كەلتوری نیشان دەدات. ئیسلامی ئەمڕۆكە كە دەسەڵاتداران نوێنەرایەتی دەكەن، لەرێگە دەركەوتن و پێچەوانەی گەوهەری ئیسلامە. ئەگەر لەئیسلامیەتدا بەبێ جیاواز باس لەپێكەوەژیانی گەلان دەكرێت؛ ئەی ئاخۆ بۆچی كوردان رۆژانە لەلایەن ئەو هێزانەی كە خۆیان بەنوێنەری ئیسلام لەقەڵەم دەدەن، رووبەرووی نکۆڵی کردن و كۆمەڵكۆژی دەبنەوە؟ واتا هەبوون و ناسنامەیان نکۆڵی دەكرێت. ئەوە نیشان دەدات كە ئەوانەی بەو شێوەیە و لەژێر ناوی ئاینی ئیسلامدا دەجووڵنەوە و پەیامبەر وەكو پەیامبەری خۆیان دەبیینن، ساختەكاری و مۆنافقی دەكەن.
ئیسلامی رژێمی ئێران، ئیسلامێكی دەوڵەتیە
لەچاوپێكەوتنەكەدا ئامەد شاهۆ لەسەر لادان و بەكارهێنانی ئاین لەلایەن هێزە دەسەڵاتدارەكانەوە بەمەبەستی بێكاریگەركردنی كۆمەڵگە دەكات و دەڵێت:"ئیسلامی دەوڵەتی ئەو ئیسلامەیە كە تێكەڵ بە ساختەكاری، دەسەڵاتداری، كۆمەڵكۆژی، دزی و تاڵان بووە. ئەو ئیسلامە ناسنامە، رەنگ و هزر و باوەڕیە جیاوازەكانی كۆمەڵگە ئینكار دەكات، جیاوازیەكان قەبوڵ ناكات و بەو شێوەیە بە بەردەوامی لەژێر ناوی ئاینی ئیسلامدا ئەو نرخ و بەهایانەی لەسەر ئەم جۆگرافیایە خوڵقاون و بۆنیادنانی كۆمەڵگە لەناو دەبات. ئەوانەی نوێنەرایەتی ئەو ئیسلامە دەكەن رژێمی داگیركەری ئێرانە، رژێمی فاشیستی توركە، رژێمی بەعسی سورییە و لەمێژووی نزیكیشدا رژێمی عێراق بەسەركێشی سەددام حۆسین یەكێك لەوانە بوو لەژێر ناوی ئیسلامدا پەلاماری گەلی کوردیاندا و دەدەن. ئەو دەوڵەتانەی لەسەر خاكی كوردستان دەژین و دەسەڵاتداریەتی بەرێوە دەبەن، لەژێر ناوی ئایندا كۆمەڵكۆژیان لەسەر كۆمەڵگە بەرێوە بردووە. كۆمەڵكۆژی و ئەنفال نموونەیەكی هەرە بەربەچاو و زیندووە. تەنانەت لەلایەن ئەو دەوڵەتە ساختەکارانەی کە خۆ بە نوێنەری ئیسلام لەقەڵەم دەدەن، گەلی کورد و رۆڵە قارەمانەکانی رووبەڕووی هێرشی دڕندانەی چەکی کیمیایی و قەدەخە کراو بووەنەتەوە و گەنجانی ئازادیخوازی ئێرانیش بە پەتی سێدارە سەرکوت و دادەمرکێندرێن. مرۆڤ وەكو بوون و ناسنامە لەمافە سەرەتایی و بنەڕەتیەكانی وەكو زمان بێ بەش هێشتوووەتەوە. شتی هەرە سروشتی و رەوای گەلان ئینكار و لەناو دەبەن. ئەوەش بەزیهنیەتی ئیسلامی دەوڵەتی بەرێوە دەچێت و دەسەپێندرێت.
ژن، ژیان، ئازادی پەیامێكە بۆ كۆمەڵگە؛ خۆتان زانا و ئازاد بكەن
لەبەردەوامی ئاخاوتنەكانیدا ئامەد شاهۆ ئەندامی ئەنجوومەنی پارتی ژیانی ئازادی كوردستان، ئاماژە بە شۆڕشی گەلان لەئێران و رۆژهەڵاتی كوردستان دەكات و گرێدان بوونی شۆڕش بە نرخی راستەقینەی ئیسلامەوە دەكات و دەڵێت: "كۆمەڵگەی كورد هەمیشە لەدژی نەزانی "جەهالەت" تێكۆشانی كردووە و نرخی راستەقینەی ئیسلامیەتیش بەو شێوەیە پاراستووە. ئەمەش لەرۆژگاری ئەمڕۆماندا لە رۆژهەڵاتی كوردستان و ئێران درێژەی پێدەدرێت. گەلی كورد سەردەستی پەسەند ناكات و لەدژی دەسەڵاتداریەتی تێكۆشاوە و شۆڕشی بەرێوە بردووە. لە ئیسلامیەتدا رەخنە و رەخنەدان و تێكۆشان هەیە. ئەوەیە كە پێ دەڵێن؛ شەڕی بچووك و شەڕی مەزن". ئێمەش وەكو بزوتنەوە باوەڕمان بەو پەرنسیپانە هەیە و بەردەوامی پێدەدەین. وەكو گەل بەهۆی داگیركاری و هێرش لەسەر بوونمان، پێویستی بەتێكۆشان دەبینین. ئەو شۆڕشەی لەئێستادا لەئێران و رۆژهەڵاتی كوردستان بەدرووشمی "ژن، ژیان، ئازادی" بەرێوە دەچێت، گەل فێری خوێندن دەکات و پەیامی زانابوون دەدات. ژن، ژیان، ئازادی پەیامی ئەوە بەگەلان دەدات كە بخوێنن و فێر ببن. لەقۆناخی نەزانی"جەهالەت"دا خوێندن، هۆشیاری و شەڕ لەدژی داگیرکەری وەكو شەرمێك سەیر دەكرا. ئێستاكەش رژێمی داگیركەری ئێران ئەم درووشمە بەلارێدا دەبات و هەوڵی رەشكردنی دەدات. لەئێستادا ئەو كەسانەی دەڵێن "ژن، ژیان، ئازادی" بە "موحارب" واتا دۆژمنی خودا" بەناو دەكرێن و سزایان بۆ دەبڕنەوە و لەسێدارەیان دەدەن. ئەو کردەوە بۆ خۆی گەورەترین نەزانی و خراپەکاری دژ بە ئیسلامە. پەیامبەریش لەكاتی خۆیدا دەبێتە ئامانجی هێزە دەسەڵاتدارەكانی ئەو كاتەی وەكو ئەبوسۆفیان و ئەبوجەهیل. بەڵام كەسایەتی وەكو حەزرەتی خەدیجە، پەیامبەر حەمزە و عەلی خاوەنداری لەرێچکەی حەزرەت محەمەد دەكەن. ئەو كەسایەتیانەش ئەمڕۆكە شۆڕشی ژن ژیان ئازادییان بەرپا کردووە و بڵێسەکەی دەگەشێننەوە رووبەرووی جەهالەت و نەزانی و داگیركەری رژێم بوونەتەوە. بە وتنەوەی ئەو درووشمە یەکسانی، ئازادی، دادپەروەری و دیمۆکراسی دەخوێنن و رووناکی بە جیهان دەبەخشن.
پێویستە چەكی ئیسلامیەت لەدەست رژێمی ئێران دەربهێنرێت
لەكۆتایی چاوپێكەوتنەكەیدا؛ ئەندامی ئەنجوومەنی پارتی ژیانی ئازادی كوردستان"پەژاك"، ئامەد شاهۆ ئاماژە بەگرنگی بەرێكخستن بوون و پێشەنگایەتی مامۆستایان لەشۆڕشدا دەكات و دەڵێت:"لەساڵی ٢٠١٣دا رێبەر ئاپۆ لەسەر یەكێتی مامۆستایانی ئاینی كورد و دامەزراندنی بزووتنەوەیەکی ئیسلامی دیمۆکراتیک ئاخاوت و وتی؛ با كۆنگرەی ئیسلامی دیموكراتیك ببەستن. بانگەوازی ئەوەی كرد كە لەسەر بنەمای ئیسلامی دیموكراتیك رێكخستنی تایبەت دابمەزرێت. كوردان تا ئێستاكە شتێكی وەهایان بۆ خۆیان بونیاد نەناوە و تەنیا بەشداری دام و دەزگای وەها بوونە و بوونەتە بەشێك لەو دام و دەزگایانە ئەوە لەكاتێكدا كە هەركامەیان نوێنەرایەتی زیهنیەتیەكی تایبەت بەخۆیان دەكەن. ئەو دین و باوەڕانەی لەئێراندا گرنگ و نرخێكی تایبەتیان هەیە. ئێمە باس لەیەكێتی ئۆمەتان دەكەین. هەر هزر، زمان، بیروڕا و هەموو فرە كەلتوریەكان پێویستە وەكو یەك، پێكەوە بژین. نەتەوەی دیموكراتیك لەسەر ئەو بنەمایە دادەمەزرێت. لەو چوارچێوەیەشدا پێویستە كاروخەبات بەرێوە ببردرێن. دەوڵەتی داگیركەری ئێران، زیاتر ئیسلامی ـ سیاسی دەسەپێنێت. بۆ ئەوەی گەل ئەو هێرشانەی رووبەروو دەبێتەوە بێكاریگەر بكات، پێویستە ئەو چەكەی بەناوی ئیسلامەوە لەدژی كۆمەڵگە بەكار دەبردرێت لەدەستی دەوڵەت دەربهێنن. هەركەس دەبێت خۆی بەرێوە ببات و ئیدارەدانی خۆی بگرێتە ئەستۆی خۆی. یەكێتی بەهێزی مامۆستایان بۆ ئەم قۆناخە پڕ گرنگە. لەدژی رژێم ناڕەزایەتی مامۆستایانی ئاینی بەهێزبوو و لەپاڵ كۆمەڵگەكە و لەپشت داوا رەواكانی گەل بوون. دەبێت ئەو هەڵوێستانە بەهێزتر بكرێن. دەبێ هەموو گۆڕەپانەكان ببنە، گۆڕەپانی ئایدئۆلۆژی، هزری و لەسەر ئەو بنەمایە شۆڕشی زیهنی پێشبكەوێت. ئەوەندە مزگەوتمان لەكوردستان هەیە. رژێم و دەوڵەتی ئیسلامی ئێران، مزگەوتەكانیان كردۆتە جێگای كۆشتنی هزر و بێ ناسنامەكردن و بێ ئێرادەكردنی مرۆڤان. پێویستە كۆمەڵگە ئەو ناوەندانە لەدەست رژێم دەربهێنن و بیانكەنەوە ناوەندی تێكۆشان، دیالۆگ، چارەسەری و خۆبەرێوەبردنی كۆمەڵگە. دەتوانن لەو ناوەندانە لەگەڵ هەموو بەشەكانی كۆمەڵگە وەكو رۆشنبیران، پارێزەران، ژن و گەنجان و ... هتد بەیەكەوە لەدژی ئیسلامی سیاسی و عەقڵیەتی فاشیستی رژێم تێكۆشان بكەن.
ژ.ت
